Sumaweena ee aga kawule towe rara
2
1 Sarara-sarara, ikomi impia namatemo sabana kasalaa-kasalaa pade jeko-jeko-mi. 2 Tempo ee ikomi nantutu kabiasaa-kabiasaa nu tou-tou ri dunia ei to nadaa. Impia komi nantutu parenta nu Mbagou Seta to nokuasai sumawee wao tuwu ri laerawa, to duuna ngkapuri ei nobago oa-dapa ri rara nu tou-tou to tado nantutu Allatala. 3 Impia ikita sumawee nasimbei mbii ante isira, ikita natuwu nantutu inggu kamanusia-ta pade nowia nuanu to nampakasana koro pade pekiri-ta. Tempo ee ikita ei-mo tou-tou to niposodo mpuu nu Allatala, nasimbei ewa tou-tou ntanina.4 Agiana nabete mpuu asi rara nu Allatala! Nipotowe mpuu-ta nu Allatala, 5 nangkajadika tempo-ta niuli namate sabana kasalaa-kasalaa-ta, Ia nopatuwu mpanculi-ta noroa-roa ante i Kristus. Ikomi nipakasalama sabana belo rara nu Allatala. 6 Pade nipatuwu nculi-ta nu Allatala noroa-roa ante i Yesus Kristus, apaa ikita nosaongu rara ante i Yesus Kristus, bona ikita mbii moparenta moroa-roa ante Ia ri rara nu suruga. 7 Allatala nowia ewa ee bona ri eo ngkapurina, manusia mamala mangkalio bakote nabete mpuu-da towe rara-Na bo kabelo nu rara-Na to tado naria simbeina ee. Towe rara-Na bo kabelo nu rara-Na ee nipopakalio-Na ante nuanu to nipowia ni Yesus Kristus si kita. 8 Lako ri towe rara nu Allatala ngkola-da komi nipakasalama, sabana peparisaya-mi si Kristus. Ee tado uli nu pampesimbukui-mi nowia nuanu to nabelo, agiana kawule niwei nu Allatala-da. 9 Ikomi nipakasalama tado sabana pampesimbukui dodo-mi. Ee-mo sabana nemo maria tou mampakalangko rara-na. 10 Ikita ei nipajadi nu Allatala manusia nabou. Ri rara posaongu rara-ta ante i Kristus Yesus, Allatala nopajadi-ta bona ikita mowia nuanu to nabelo. Nipasadiakapura-Na ta-mo sumawee nuanu ee lako impia bona ta-powia sinungka-ta matuwu.
Nipasangkani ri rara ni Kristus
11 Jadi sarara-sarara, toramo katuwu-mi impia. Ikomi tado muli nto Yahudi. Pade tou-tou to Yahudi nangulikaka komi “tou to tado nitindi”, pade isira nanguli bakote isira nitindi. Petindi ee nopanotosi bakote isira najadimo todea nu Allatala. Agiana petindi ee kawule pampetonondi to nipowia nu manusia ri woto-ra. 12 Impia komi tadopa nanguncani i Kristus, ikomi tado nireke to Yahudi, todea to nipelisi nu Allatala. Ikomi tado nesua ri rara nu potipa to nipowia nu Allatala ante todea-Na. Ikomi natuwu ri rara dunia ei tado naria sarumakaa-mi pade tadopa nanguncani Allatala. 13 Agiana tempo ei, ikomi nosaongu raramo ante i Kristus. Jadi, ikomi to impia nakawao lako ri Allatala, nipajadi najungkumo sabana kamate ni Yesus Kristus ri kou salib.
14 I Kristus-mo to nampowia-ta namala natuwu nosingkabelo, to nopasangkani to Yahudi pade to tado to Yahudi pade nogerosi wala olo, ee-mo pombepodaa to impia nampopogaa-ta. 15 Ri rara kamate-Na ri kou salib nipakabebasi-tamo ni Kristus lako ri parenta Taurat to nitulisi ni Musa ante sumawee aturana bo pepatudukina. Ante dala ee-mo to Yahudi bo to tado to Yahudi nipasangkani-Na najadi todea to natuwu nabou pade namala natuwu nosingkabelo. 16 Pade ri kamate-Na ri kou salib, i Kristus nopasangkani to Yahudi bo to tado to Yahudi, pade nampoposingkabelo-ra ante Allatala, nangkajadika naopumo pombepodaa ee. 17 Ee-mo sabana i Kristus narata bona mampopowole Kareba Belo nancambelai posingkabelo si komi tou tado to Yahudi to impia nakawao lako ri Allatala, pade ri to Yahudi to najungku ante Allatala. 18 Sabana nuanu to nipowia ni Yesus Kristus, ikita sumawee to Yahudi ba to tado to Yahudi, mamala mamei ri ngayo nu Allatala Tuama-ta ante petulungi Inosa Gasa nu Allatala.
19 Jadi, ee-mo sabana ikomi to tado to Yahudi tadomo niuli ewa tou ntani ba ewa torata. Agiana tempo ei ikomi najadimo todea nu Allatala noroa-roa ante topeparisaya si Yesus ntanina pade nosancou ante sumawee ana-ana nu Allatala. 20 Ikomi mbii ewa sou. Allatala nopatinda sou ee ri wumbu nu parawatu to nipowia nu suro-suro bo nabi-nabi. Pade watu to nampakaroso ntoto sou ee i Yesus Kristus dodo. 21 Ikomi to nosaongu rara ante i Kristus nasimbei ewa parewa nu sou to nipatinda, nombesuncu belo-belo duuna najadi saongu sou to nipantindaka i Pue. 22 Ikomi mbii ranca-mi nipatinda noroa tou-tou ntani bona majadi sou nu Allatala, apaa ikomi nosaongu rara ante i Kristus. Ri sou ee-mo Inosa Gasa nu Allatala neari.