Flp. i

Sura ni Paulus ri Todea nu Allatala ri Filipi

Popamulana

Ngata Filipi ei ngata to natolele sangana ri propinsi Makedonia. Karata ni Paulus ri Propinsi Makedonia, nipamula-namo pobago-na nampopowole Kareba Belo ri ngata Filipi. Noudamo nadea tou nangewa-ya, kaopuana nadea mbii-da tou to namparisaya i Yesus (Suro-suro 16). Nipaleisipa ni Paulus ngata Filipi, basangkia ngkani to Filipi nopakatuka-ya doi bona mantulungi-ya mopapola pobago-na.

Rapa-rapana sampulu mpae naliu lako ri pampopowole ni Paulus Kareba Belo ri Filipi nitarungku-yamo. Pamparonge nu to Filipi potarungku i Paulus ee, nipakatu mbii-ramo doi petulungi-ra si Paulus. Doi ee nikeni nu sadua to Filipi to nisanga i Epafroditus.

Patuju ni Paulus notulisi sura ei nampopatora to Filipi bona matuwu mosaongu rara pade nemo nasalai nu tou inggu-ra, bona mantambei kadea nu tou to meparisaya ri Kareba Belo (1:27 - 2:18; 4:2-4). Niulikaka mbiina-ra sabana potarungku-ya apaa pobago-na nampopowole Kareba Belo. Agiana noudamo nitarungku-ya, kadea-deaa oa-da tou namparonge Kareba Belo ee (1:12-26). Niuli mbii-na nuapa pade nitudu-na i Epafroditus manculiki ri Filipi, pade niuli mbii-na patuju-na mantudu i Timotius ngoni malou ri Filipi (2:19-30). Niulikaka mbiina-ra mainga ri tou to nangkeni pepatuduki nasala pade to nadaa inggu-ra (3:1b, 2:17-19). Pade nosukuru ri Allatala sabana doi petulungi lako ri to Filipi to nikeni ni Epafroditus (4:10-18).

Isi nu buku ei

1. Tabe (1:1-2)

2. I Paulus nosukuru ri Allatala sabana to Filipi, pade nosambayani-ra (1:3-11)

3. Noudamo nitarungku-ya, kadea-deaa oa-da tou namparonge Kareba Belo (1:12-26)

4. Nampopatora-ra bona matuwu mosaongu rara pade nemo nasalai nu tou inggu-ra, bona kadea-deaa tou meparisaya ri kareba Belo (1:27-2:18)

5. Nangune i Timotius pade i Epafroditus sabana pobago-ra si Pue (2:19-3:1a)

6. Nangulikaka-ra bona mainga ri tou to nangkeni pepatuduki nasala (3:2-4:1)

7. Nopatuduki-ra bona matuwu mosaongu rara pade mampakaroso pantutu-ra i Yesus (4:2-9)

8. I Paulus nosukuru ri Allatala sabana popakatuka-ya nu to Filipi doi (4:10-20)

9. Petabe kaopuana (4:21-23)