3
1a Kaopuana, sarara-sarara-ku, ikomi kana madonu apaa nosaongu raramo komi ante i Pue.Kakonoa mpuu-mpuu
1b Tado mantomo rara-ku motulisi nculi nuapa to nitulisi-kumo si komi, apaa nuanu ee nabelo ri kasalamaa-mi. 2 Mainga-da ri tou-tou to nowia nuanu nadaa, tou-tou to masipato raulikaka ewa dike. Isira ei nopasa bona tou-tou to madota meparisaya si Kristus kana ratindi. 3 Agiana ikita-mo tou-tou to mpuu-mpuu nitindimo. Ikita nenomba ri Allatala apaa ningawa nu Inosa-Na. Ikita nadonu sabana ikita natuwu nosaongu rara ante i Kristus. Pegoliana ikita tado neparisaya ri ada-ada to nipowia nu manusia. 4 Kakono-konona mamalada ku-parisaya ada-ada to nipowia nu manusia. Sabana ande maria sadua to motance bona mamparisaya sumawee nuanu ee, melabi-labipa yaku. 5 Yaku nitindi tempo-ku noumuru uwalu eo-dapa. Yaku to Israel lako ri muli ni Benyamin. Totua-ku poko to Ibrani. Ri rara kaparisayaa-ku natundu ri parenta ni Musa, yaku ei to Farisi. 6 Ante rara mpuu-ku nampowia parenta ni Musa nangkajadika nampaduasi todea nu Allatala. Ande rakalio lako ri parenta ni Musa, yaku ei tou to nabelo, tado naria kasalaa ri koro-ku. 7 Agiana sumawee nuanu impia nipekiri-ku mampopountu-ku, tempo ei tadomo naria lotuna si yaku sabana sumawee nuanu to nipowiamo ni Kristus si yaku. 8 Tado kawule ee ngkola, agiana nuanu ntanina to naria si yaku mbii tado naria lotuna ande rapasimbei ante panguncani-ku i Kristus Yesus, Pue-ku. Bona mamala mampalayani-Ya eemo, nangkajadika nipawia-kumo sumawee to naria nipowia-ku. Nitadiaka pura-kumo sumawee nuanu impia ee, to nireke-ku ewa rumpu bona mamala-ku mamparata i Kristus, 9 pade mpuu-mpuu nosaongu rara ante Ia. Tadomo nipesimbukui-ku oa majadi makono ri ngayo nu Allatala ante dala matundu ri parenta Taurat. Pegoliana Allatala nopanotosimo bakote yaku nakono, apaa yaku namparisaya i Kristus. Jadi Allatala nampakakono-ku ri ngayo-Na sabana yaku namparisaya i Kristus. 10 To nipodota-ku, bona ku-ncani i Kristus, pade mamparasai kuasa to nopatuwu nculi-Ya lako ri kamatea. Yaku madota metutu mantodosaka kapepaa ante Ia pade madota masimbei ewa Ia to nadota nantodosaka kapepaa duuna namate. 11 Pade yaku mbii nancarumaka kana rapatuwu mpanculi lako ri kamatea. 12 Tado naria niuli-ku nirata pura-kumo sumawee ee pade tado mbii naria niuli-ku bakote naganamo pantutu-ku i Kristus Yesus. Agiana yaku nampesimbukui bona mpuu-mpuu mamparata tombo to nipasadiaka-Na ku. Apaa eemo patuju-Na nampokio-ku mantutu-Ya. 13 Sarara-sarara saongu kaparisayaa, yaku dodo tado nanguli bakote norasi-kumo. Agiana eimo to nipowia-ku: Tadomo madota-ku mampekiri nuapa to naliumo. Yaku nampesimbukui susuduwuku-ku bona mamparata nuanu to naria ri eo ngkapurina. 14 Etumo sabana yaku nokumbeno oa susuduwuku bona mamparata tombo. Tombo eemo katuwu to nabou ri suruga to nitipa nu Allatala. Eemo patuju nu Allatala nampokio-ta mopasangkani ante i Kristus Yesus.
15 Ikita sumawee to narosomo peparisaya-ta, kana mampekiri ewa ee. Agiana ande riolo-mi maria tou to montani pekiri-na, Allatala-damo to mopanotosi si komi beiwa dala mpekiri to nakono. 16 Jadi eimo to kana rapeirara mpuu: Ikita kana matuwu mantutu oa atura to nitutu-tamo duuna eo ei.
Pepatuduki-pepatuduki ri todea nu Allatala
17 Sarara-sarara, todea nu Allatala, nipopakalio-kumo dala ngkatuwu to nipodota nu Allatala. Etumo katuwumo masimbei ante dala ngkatuwu to nipopakalio-kamo si komi. 18 Naoso-kumo nangulikaka komi. Tempo ei ante keo-ku ku'uliki mbii si komi, bakote nadea tou to katuwu-na najadi bali nu salib ni Kristus. 19 Kaopuana tou-tou to natuwu ewa ee kana maropu. Katuwu-ra kawule mampakaosa nuanu to nipodota nu rara-ra. Isira nadonu nowia nuanu to nepakaeya, apaa eemo nuanu nipodondi-ra. Isira kawule nampekiri nowia nuanu to nipobelo nu tou-tou ri dunia ei. 20 Agiana inggu-ta tado mamala ewa isira, apaa ikita ei todea nu Allatala ri suruga. Pade ngoni i Pue Yesus Kristus kana marata mpanculi lako ri suruga bona mampakasalama-ta. Ikita mopea karata-Na maponu ante lentora. 21 Woto-ta to tado naroso pade mamala maroga ei, kana nabali ni Kristus majadi ewa woto dodo-Na to tado mamala mamate. Ia mamala mampowia ee apaa Ia nakuasa mopatundu sumawe ngila ngayana.