Pepatuduki bona mosaongu rara pade mampakaede rara ewa i Kristus
2
1 Ikomi naroso, apaa ikomi nosaongu raramo ante i Kristus. Pade ikomi nadonu apaa i Kristus nampotowe komi. Ikomi ni nini nu Inosa Gasa nu Allatala, pade mombepotowe, ma'asi rara ri sadua bo ntanina. 2 Pesobamo komi mampakasana mpuu rara-ku ante nuanu ei: Mosaongu rara ante towe to nasimbei, mosaongu rara ante pekiri bo patuju to nasimbei. 3 Nemo mowia nuanu to mampakauntu koro dodo ba bona mampakalangko rara. Agiana butu duana komi kana maede rara, nemo maria pekiri bakote ikomi neliu lako ri tou ntani. 4 Mi-kalioda kaparaloua nu tou ntani, nemo kawule mourusi dodo koro-mi. 5 Pesimbukuimo oa moinggu ewa inggu ni Kristus Yesus:6 Noudamo i Kristus Yesus nasimbei ante Allatala,
agiana tado nikeni-Na kakuasaa bo pocundaa-Na to
nalangko ee.
7 Pegoliana, nantutu dota dodo-Na nipawia-Na
sumawee ee pade najadi ewa batua. Ia najadi ewa
manusia pade natuwu ewa manusia.
8 Tempo-Na natuwu ewa manusia, Ia nampakaede rara-Na, pade natuwu natundu ri
Allatala duuna namate ri kou salib.
9 Eemo sabana Allatala nambeikaka-Ya posundaa
to nalangko mpuu pade kakuasaa to nabete mpuu
riolo nu sumawee kakuasaa ntanina.
10 Patuju nu Allatala, bona i Yesus rabila.
Eemo sabana, sumawee to naria ri suruga, ri dunia,
pade riunde nu dunia kana menomba si Yesus.
11 Jadi, sumawee tou kana mangaku bakote
i Yesus Kristusmo Pue, ante eemo Allatala Tuama-ta
rapemabose.
Powiamo oa kasalamaa-mu
12 Ee-mo sabana, sarara-sarara to nipotowe-ku, nasimbei ewa katundu-mi oa si-yaku tempo-ku noroa-roa ante ikomi, peliu-liuna ngkapuri ei tempo-ta nombekawaosi, ikomi kana matundu dodo si-yaku. Ikomi nipakasalamamo nu Allatala, jadi pesimbukuimo oa matuwu ewa katuwu nu tou to nipakasalamamo nu Allatala. Powiamo nuanu ee ante maponu pebila bo matundu ri Allatala. 13 Allatala dodomo nantulungi komi. Ia nobago ri rara-mi bona ikomi madota pade mowia mantutu nuapa to nipodota-Na. 14 Pobagomo ngila-ngayana ante tado mokangua pade mobungka. 15 Powiamo ewa ee, bona ikomi magasa bo tado masala. Ikomi natuwu ri dunia to naponu ante tou daa, agiana ikomi nemo ewa isira ee. Katuwu-mi kana magasa apaa ikomi ei ana-ana nu Allatala. Eemo sabana katuwu-mi kana mewanta bona mampakabaa-ra, nasimbei ewa betue-betue to newanta nampakabaa dunia ei. 16 Pade ri tempona komi manguli kareba to nambei katuwua, ikomi kana majadi ewa pewanta to nampakabaa dunia ei. Ande ikomi matuwu ewa ee, mariamo ngoni tance-ku madonu mancambelai komi ri tempo karata mpanculi ni Yesus Kristus. Nuanu ee nopadupa bakote pampesimbukui-ku tado dodowee agiana nariada bunturuna. 17 Beiwa ba kana rapatesi-kuda pade raa-ku majadi ewa tinuwu to nipopenomba-mi ri Allatala bona majadi pampetonondi bakote ikomi neparisaya si-Ya. Ande rapana yaku kana mampomate komi, yaku kana madonu. Pade yaku mbii kana madonu sabana penomba-mi ri Allatala. 18 Iwee mbii ante ikomi, ikomi kana madonu ante nuapa to nadupamo ri rara ngkatuwu-mi pade nuapa to nadupamo si yaku.
I Timotius pade i Epafroditus
19 Niparisaya-ku bakote ante petulungi ni Pue Yesus, yaku magasi mantudu i Timotius si komi, bona mawoe rara-ku mamparonge kareba nancambelai komi. 20 Riolo nu sumawee tou isei, kawule i Timotius ngkola tou to namposimbei rara-ku. Ia mpuu-mpuu madota mampangawa komi. 21 Tou-tou ntanina kawule nourusi urusia nu koro dodo-ra, tado urusia ni Yesus Kristus. 22 Nikalio dodo-mimo kadupana, bakote nogunada i Timotius. Ia nobago ntomomo noroa-roa ante i yaku bona mampopowole Kareba Belo lako ri Allatala. Ikami rodua ei ewa ana pade tuama. 23 Ee-mo sabana, ia-mo to ku-sarumaka magasi kutudu si komi ngoni, ande ku-ncanipa beiwamo botusia nu kara-kara-ku ei. 24 Niparisaya-ku bakote i Pue kana mantulungi-ku bona magasi-ku mampelei komi. 25 Nitudu-mimo sarara-ta saongu kaparisayaa i Epafroditus bona mampangawa-ku. Tempo ei, yaku kana mantudu mpanculi-ya si komi. Nobago-yamo pade nampewuku noroa-roa ante i yaku. 26 Nalentora mpuu-ya si komi sumawee, pade tado naroo rara-na apaa nironge-mimo kareba bakote nadua-ya. 27 Nakono mpuuda i Epafroditus nadua pade kemamate. Agiana Allatala nampotowe-ya. Tado kawule ia ngkola nipotowe nu Allatala, agiana ante i yaku mbiida, bona nemo mantambei susa rara-ku. 28 Eemo sabana pade nabete mpuu rara-ku mantudu mpanculi-ya si komi, bona madonu komi momberata ante ia, pade bona maroomo rara-ku. 29 Jadi, tarima-yamo ante donu rara ewa sadua sarara saongu kaparisayaa. Bilamo sumawee tou to ewa ia. 30 I Epafroditus kemamate pade nabia-ya nambei inosa-na ri pobago ni Kristus. Ia nowia sumawee ee nampangawa-ku, bona mancambei komi apaa ikita nombekawaosi.