Sura ni Paulus ri Todea nu Allatala ri Filipi
Tabe
1
1 Lako si Paulus pade i Timotius, batua-batua ni Kristus Yesus. Sura ei nipakatu ri todea nu Allatala ri ngata Filipi, ante sumawee topangkeni todea nu Allatala pade topampangawa topangkeni todea nu Allatala. 2 Towe rara bo kasanaa lako ri Allatala Tuama-ta pade lako si Pue Yesus Kristus mamporoasi komi.
Posukuru pade sambaya
3 Butu ngkani-ku nantora komi, yaku nosukuru ri Allatala. 4 Pade butu ngkanina-ku nosambayani komi sumawee, yaku nosambaya ante donu rara. 5 Yaku nosukuru ri Allatala apaa lako ri paramulana duuna eo ei, ikomimo to nantulungi-ku nampopowole Kareba Belo lako ri Allatala. 6 Niparisaya mpuu-ku Allatala dodomo to nopamula bago belo ee si komi, pade Ia kana mopapola bago ee duuna ri Eo ni Kristus Yesus marata mpanculi. 7 Masipato amimo maria pampekiri-ku ewa ee si komi, sabana ikomi mpuu-mpuu nipotowe-ku, pade sabana ikomi nantulungi-ku nowia bago to niwei nu Allatala si yaku. Ikomi naoso nantulungi-ku tempo-ku tadopa nitarungku bo tempo-ku nitarungku apaa nantunduka bo nampakaroso Kareba Belo ee. 8 Nincanida nu Allatala bakote nalentora mpuu-ku si komi ante towe lako si Yesus Kristus dodo. 9 Eimo sambaya-ku si komi: Bona ikomi mampotowe oa Allatala pade singkapada manusia, pade bona mantambei oa panguncani-mi nuanu to nakono pade nuanu to nabija. 10 Bona mi-ncani mampelisi nuapa to nabelo, pade tuwu-mi kana magasa pade tado maria kasalaa-mi ri eo ni Kristus marata mpanculi. 11 Sumawee nuanu to nipowia-mi mpuu-mpuu nabelo. Kawule i Yesus Kristus ngkola to nampakule nampowia komi mamala mowia sumaweena ee, bona Allatala kana rapemabose pade raune.
Posabiti ni Paulus ri rara tarungku
12 Sarara-sarara, yaku madota bona ikomi manguncani, sabana nuanu to najadi si yaku ei, nangkajadika neliu ntotopa kadea nu tou namparonge pade namparisaya Kareba Belo ee. 13 Bunturuna sumawee surodado to nojaga sou bete nu mbagou pade tou-tou ntani ri ngata ei nanguncani bakote yaku nitarungku sabana nolayani i Kristus Yesus. 14 Pade potarungku-ku eimo to najadi saba nangkajadika nadea tou to Karasite ri ngata ee niparisaya ntoto ramo i Pue. Eemo sabana nantambei ntotomo kabia-ra nampopowole lolita nu Allatala ante tado naria eka-ra. 15 Naria mbiida basangkia dua riolo-ra to nampopowole i Kristus apaa nasingki rara-ra, pade madota mobungka. Agiana naria mbii tou ntanina nampopowole i Kristus ante patuju to nabelo. 16 Tou-tou ee nampopowole i Kristus apaa isira nampotowe Allatala bo nampotowe-ku. Isira mpuu-mpuu nanguncani bakote Allatala nambeimo bago ee si yaku bona mopadupa bakote nakonoda Kareba Belo ee. 17 Agiana tou ntani to nasingki rara-ra si yaku ee nampopowole i Kristus ante patuju to tado nabelo. Isira nampopowole bona mampakauntu dodo koro-ra. Nisarumaka-ra mamala mampowia-ku mantambei masusa ri rara ntarungku.
18 Agiana tado mangkia! Sabana nou mbiipa sangkia, ba rapopowole ante belo rara, ba ante patuju to tado nakono, i Kristus kana rapopowole oa. Eemo nampakasana dodo-ku, nasana mpuu rara-ku, 19 apaa nincani-ku ante sambaya-sambaya-mi pade ante petulungi nu Inosa ni Yesus Kristus, yaku kana rapakabebasi. 20 To nipodota ntoto-ku pade nisarumaka-ku tado maeya-ku ri ngayo nu Allatala ri bago-ku ei . Pegoliana ku-sarumaka yaku mabia mosabiti tado kawule ri tempo ei, ba sinungka ku-matuwu, ba tempo-ku mamate, i Kristus rapemabose dodo. 21 Apaa patuju ngkatuwu-ku kawule mampemabose i Kristus ngkola. Pade ande mamate-ku, neliu ntoto mbiipa belona si yaku. 22 Agiana ande matuwu dodo-ku, mamala-kudapa mowia kapolaa nu bago ee. Etumo sabana pade tado nincani-ku ba umbana to kana ku-pelisi, ba matuwu dododa ba mamateda. 23 Yaku ei madota mpuu-kumo mampaleisi dunia ei bona matuwu moroa ante i Kristus, sabana eemo ntoto to nabelo si yaku. 24 Agiana, bona mamala-ku mantulungi komi nabelo loupa matatapu-ku meari ri dunia. 25 Eemo sabana, nisarumaka mpuu-ku, yaku kana matuwu oa bona mamala mantulungi komi, bona ikomi mpuu-mpuu mamparisaya i Kristus pade mantambei masana ri rara nu peparisaya-mi si Pue. 26 Patuju-ku, tempo-ku marata nculi ngoni mampelei komi, ikomi mpuu-mpuu mampemabose i Kristus Yesus sabana yaku.
Pepatuduki bona mampewuku oa
27 Eemo sabana, nuanu to niparalou ntoto-mi kana matuwu mantutu nuanu to nipepatudukii ri rara Kareba Belo nancambelai i Kristus. Tado nincani-ku ba mamei-kudapa mampelei komi ba tadomo. Agiana nincani-ku pade nisarumaka-ku, ikomi tado molengo pade mosangkani oa ante saongu patuju to naroso. Eemo peparisaya si Pue nantutu Kareba Belo lako ri Allatala. 28 Ikomi kana mabia, nemo maeka ri bali-bali-mi. Ante eemo ikomi nampopakalio ande isira kana madagi, pade ikomi kana medagi, apaa Allatala dododa to nambei komi pedagi ee. 29 Sabana niweimo nu Allatala rasi si komi, tado kawule meparisaya si Kristus, agiana bona mantodosaka kapepaa sabana namparisaya bo nampalayani i Kristus. 30 Ikomi tempo ei namparasai kapepaa ewa kapepaa to nitodosaka-ku, to nariamo nikalio-mi nipewuku-ku impia. Tempo ei mbii nincani-mida bakote yaku nampewuku oa dapa ewa impia.