Sura ni Paulus ri Todea nu Allatala ri
Kolose
Popamulana
Naopupa i Paulus nampopowole Kareba Belo ri ngata Efesus rarana rompae labi kasaena, naloumo topeparisaya lako ri ngata Efesus nampopowole Kareba Belo ri ngata Kolose nangkajadika nariamo to Kolose namparisaya i Yesus. Ngata Kolose ei ngata ri Propinsi Asia Kodi to tado nakawao lako ri ngata Efesus. Basangkia mpae naliu naopu ee, nitarungkumo i Paulus sabana nampopowole Kareba Belo. Tempo-na ri rara tarungku, nitulisika-namo to Kolose sura ei.
To nangkeni sura ei ri to Kolose i Tikhikus, niporoasi ni Onesimus. I Onesimus ei batua to nangani lako ri maradika-na, agiana ia nitudu ni Paulus manculiki ri Kolose si Filemon to najadi maradika-na ee.
Ri rara sura-na ri to Kolose ee, i Paulus nampopatora-ra bakote naria topepatuduki-topepatuduki to tado nakono. Topepatuduki-topepatuduki ee nanguli ande madota-ta rapakasalama, tado magana ande kawule mamparisaya i Yesus, agiana i kita mbii kana mampenombai karampua to nokuasai langi bo ri karampua to nokuasai dunia. Ikita mbii kana ratindi mantutu ada nu to Yahudi pade ada-ada bo atura to Yahudi ntanina. Nipopatora mbii-na to Kolose nemo raparisaya-ra pepatuduki nasala ee. Niuli-na si sira maganamo mamparisaya i Yesus, apaa kawule i Yesus ngkolada to mamala mampakasalama manusia. Pepatuduki to nasala ee kawule mampakapusa manusia, apaa pepatuduki ee tado lako si Yesus.
Ri rara nu sura ee mbii i Paulus nopatuduki beiwa inggu to masipato rapowia nu topantutu i Yesus.
Isi nu sura
1. Tabe pade sambaya ni Paulus (1:1-14)
2. I Yesus-mo poko nu ngila ngayana (1:15-23)
3. Pobago ni Paulus nampopowole Kareba Belo (1:24-2:5)
4. Kana matuwu mosaongu rara ante i Yesus (2:6-15)
5. Nemo nabagiu nu pepatuduki to tado nakono (2:16-23)
6. Kana mampawia inguu to nasae, pade matuwu ante inggu nabou (3:1-17)
7. Pepatuduki ri toponcamboko, ri ngana-ngana bo totua, ri batua bo maradika (3:18-4:1)
8. Popatuduki ri tou to tado neparisaya (4:2-6)
9. Petabe bo lolita-lolita kaopuana (4:7-18)