3
1 Ikomi nipatuwu mpanculimo noroa ante i Kristus. Etumo sabana ikomi kana mampesimbukui bona mamparata bagia to naria ri suruga, ri poparentaa ni Kristus noroa ante Allatala. 2 Pekirimo kara-kara to ri suruga, tado kara-kara ri dunia ei. 3 Sabana namatemo komi, pade katuwu-mi nitalendusi nu Allatala noroa ante i Kristus. 4 Jadi, kakono-konona poko ngkatuwu-mi iamo i Kristus. Pade ande meonga-Ya ngoni, ikomi mbii kana rakalio moroa-roa ante Ia ri rara nu pampemabose-Ya.Manusia nabou
5 Eemo sabana, pawiamo dota nu dunia to nokuasai rara-mi, ewa mogou sala, mowia nuanu to tado naowo, dota-dota rara ntanina to nadaa pade nampokeilu nuanu nu singkapada manusia. Apaa sumaweena ee nasimbei ante nenomba ri karampua. 6 Sumawee inggu ewa eemo to nampakeni sodo nu Allatala ri tou-tou to tado natundu si-Ya. 7 Ikomi dodo mbii impia nowia inggu nadaa ewa ee, tempo-mi nikuasai dapa nu dota-dota rara to nadaa ee. 8 Agiana ngkapuri ei, ikomi kana motadiaka inggu-inggu to nadaa ee lako ri koro-mi: Nemo oa masodo, ba mangkarabuta, mamparei tou, mampololita tou, mamboli daa rara ri tou ntani. Pade nemo maria mesuwu lolita-lolita narumu lako ri ngudu-mi. 9 Nemo oa mombeboasi, apaa katuwu sae ante sumaweee ingguna nipawiami-mo. 10 Ikomi ngkapuri ei niweikakamo katuwu to nabou. Ikomi-mo manusia to nabou, to nipakabou oa nu Allatala, Topepajadi, nantutu gambara dodo-Na. Patujuna bona ikomi manguncani mpuu-mpuu Allatala. 11 Etumo, apaa ikomi nipajadimo nu Allatala manusia nabou, tadomo naria sore pontania to Yahudi ba to tado to Yahudi, tou to nitindi ba tou to tado nitindi, to lako ri ngata ntani ba to lako ri bulu, batua pade to nabebasi. Sumaweena nasimbei apaa nosaongu rara ante i Kristusmo komi. 12 Sarara-sarara, ikomi eimo todea nu Allatala. Allatala nampotowe komi pade nampelisi komi bona majadi ana-ana-Na. Etumo sabana ikomi kana mampopekalio towe rara, belo rara, maede rara, madole, pade mancabara ri rara nu kapepaa. 13 Sore mancabara komi sadua bo ntanina, pade mombe ampungi komi ande maria to mamboli daa rara-na ri tou ntani. I Pue ante sana rara-Na noampungimo komi, etumo ikomi mbii kana madota mombeampungi sadua bo ntanina. 14 Pade eimo to niparalou ntoto : Ikomi kana mombepotowe, sabana towe eemo to nopasiromu bo nampeganai komi. 15 I Kristusmo to nampoposingkabelo komi. Jadi, nemo mi-powia nuanu to mampakagero posingkabelo ee, apaa patuju nu Allatala nampokio komi bona ikomi sumawee matuwu mosingkabelo bo majadi saongu woto. Ikomi kana mosukuru oa ri Allatala. 16 Pepatuduki-pepatuduki ni Kristus to naponu petiroi kana matida ri rara-mi. Ikomi kana mombepatuduki pade mombedederi ante pepatuduki to nabelo mpuu. Pododiamo mazmur pade dodia-dodia peune ante dodia-dodia penomba si Pue, pododiakamo Allatala ante sukuru ri rara-mi. 17 Pade ngila ngayana to nipowia-mi ba niuli-mi, kakono-konona ee kana rapowia pade rauli ri rara sanga ni Pue Yesus. Pade posukurumo komi ri Allatala, Tuama-mi, sabana nuanu to nipowia ni Yesus si komi.
Kasintundu nu toposancou
18 Sarara-sarara bangkele to nobaleilo-mo! Katundu-mo komi ri baleilo-mi. Eemo to masipato napowia nu bangkele to namparisaya i Pue Yesus.
19 Sarara-sarara baleilo to nobangkele-mo! Potowemo bangkele-mi. Nemo maseke inggu-mi si sira.
20 Ikomi ngana-ngana, katundu-mo komi ri totua-mi ri rara nu ngila ngayana, apaa inggu ewa eemo to nampakadonu rara nu Allatala.
21 Sarara-sarara to najadi tuama, nemo mi-pakadua rara nu ana-mi, bona nemo masue rara-ra.
22 Sarara-sarara to najadi batua, ri rara nu ngila ngayana, ikomi kana matundu ri maradika-mi ri dunia ei. Nemo matundu si sira kawule tempo-ra mangkalio ngkola komi, bona raune komi. Agiana katundu-mo komi si sira ante rara mpuu-mi, apaa ikomi nampabila i Pue. 23 Nuapapa bago to niweikaka komi, kana mipowia ante rara mpuu-mi, mi-rapaika ewa mampobagoka i Pue, tado mampobagoka manusia. 24 Toramo bakote ikomi kana mantarima tombo lako si Pue. Nuanu to nipasadiaka ni Pue todea-Na, eemo to kana raweikaka komi. Sabana kakono-konona maradika to nipobagoka-mi, eemo i Kristus. 25 Pade yema-yema to mowia nuanu nasala, ia kana mangkolo kasalaa-na ee, apaa i Pue tado nampelisi tou.