1 Tesalonika i

Sura ni Paulus to paramulana ri todea nu Allatala ri Tesalonika

Popamulana

Ngata Tesalonika ei tina nu ngata propinsi Makedonia. Todeana maria roatu njobu kadeana. Saganta ntongo todeana tado to Yahudi to namparisaya karampua-karampua to tado nakono, pade saganta mbii todeana poko to Yahudi. I Paulus, i Timotius pade i Silwanus nangkeni Kareba Belo ri to Tesalonika, nangkajadika basangkia dua to Tesalonika ei namparisaya i Yesus (Tutura Suro-Suro. 17:1-4). Tadomo nasae naopu ee, i Paulus ante roa-roa-na nangani lako ri Tesalonika, apaa naria basangkia dua tou to tado neparisaya nowia kagesoaa pade nangoco-ra bona raduasi (Tutura Suro-Suro. 17:5-10). Tadomo nasae naopu ee, nalentoramo i Paulus ri sarara-sarara-na to neparisaya ri Tesalonika pade madota malou mampelei-ra. Noudamo iwee tadopa naria loga-na mampotomuka-ra. Eemo sabana pade nitudumo ni Paulus i Timotius malou mampotomuka-ra bona nakalio ntoto ba narosoda peparisaya-ra ba tado (1 Tes. 3:1-2). Nanculipa i Timotius lako ri Tesalonika, nitulisimo ni Paulus sura ei.

Patuju ni Paulus notulisi sura ei nadea ngaya. Nipopatoraka-na to Tesalonika beiwa inggu-na bula-na namporoa-ra (2:1-12). Nipakadonu-na pade nipakaroso-na rara nu tou to niduasi sabana peparisaya-ra (2:1-13 - 3:1-3). Nipadukina-ra inggu to masipato napoinggu to Karasitee (4:1-10). Niulikakana-ra bona nemo malose-ra ri rara nu pobagoa-ra eo-eona (4:11-12). Nipatudukina-ra nuapa ngoni nuanu madupa ri to Karasitee to namatemo pade ri to Karasitee to natuwu-dapa ri eo karata ni Pue Yesus karongkanina (4:13-17). Sumawee nuanu nitulisi ri rara nu sura ei nampololita karata ni Pue Yesus karongkanina (1:9-10; 2:19-20; 3:14; 4:13-17; 5:1-2, 23-24).

Isi nu buku ei

1. Petabe paramulana (1:1)

2. Tutura ni Paulus bo tutura todea nu Allatala ri Tesalonika (1:2-3 - 3:1-3)

a. I Paulus nangune todea nu Allatala sabana nangkalio inggu ntodea nu Allatala ri Tesalonika (1:2-10)

b. I Paulus nampakakono koro-na ri todea nu Allatala ri Tesalonika pade nampololita bago-na ri Tesalonika (2:1-12)

c. I Paulus nanguli kalentorana madota mampotomukara (2:13 - 3:13)

3. I Paulus nopatuduki todea nu Allatala ri Tesalonika (4:1 - 5:24)

a. I Paulus nopatuduki-ra bona matuwu mosingkabelo ante sarara-sarara to neparisaya (4:1-12)

b. I Paulus nopatudukira nuapa ngoni to madupa ri eo karata ni Pue Yesus karongkanina (4:13 - 5:11)

c. I Paulus nopatudukira bona matuwu mosingkabelo ante sarara-sarara saongu kaparisayaa (5:12-22)

4. Petabe kaopuana (5:23-28)