Pobago ni Paulus ri Tesalonika
2
1 Sarara-sarara! Nincani dodo-mida karata-ka si komi tado nalenge bayangi. 2 Nincani dodo-mida sintou tadopa narata-ka si komi ri Tesalonika, ikami niduasimo bo nikanene ri Filipi. Agiana noudamo nadea tou nangewa-ka, Allatala-ta nambeika-kamo kabiaa bona moparata si komi Kareba Belo lako ri Allatala. 3 Pepatuduki-ka si komi tado pepatuduki nasala, bo tado mbii naria patuju nadaa ri rara-ka ba mampabagiu komi. 4 Agiana ikami nololita oa nantutu dota nu Allatala, apaa ikami niuli nu Allatala masipato mampopokareba Kareba Belo ee. Ikami tado nampesimbukui bona mampakadonu rara nu manusia, agiana ikami nampesimbukui mampakadonu rara nu Allatala to nampesori rara-ka. 5 Nincani dodo-mida tado-namo sangkania-ka nololita namomi si komi ba nampaboasi komi bona mowunika patuju-patuju to mampakauntu koro dodo. Nincanida dodo ni Pue Allatala rara-ku. 6 Ikami mbii tado nampesimbukui bona naune nu tou, ba lako si komi, ba lako ri tou ntani. Kakono-konona masipato-kada mi-une, apaa ikami ei suro nu Kristus. 7 Agiana inggu-ka si komi nabelo mpuu tempo-ka natida riolo-mi, ewa sadua tina nopasisi ana-ana-na. 8 Sabana nikeni nu towe-ka, ikami nasadia nambeika komi tado kawule Kareba Belo lako ri Allatala ee, agiana ante tuwu mbii-kapa. Sabana nipotowe mpuu-ka komi! 9 Nitora-midapa beiwa pampesimbukui bo kapari ngkatuwu-ka. Eo bengina-ka nobago tado namo saduaa komi nipakasusa-ka tempo-ka nampopowole Kareba Belo lako ri Allatala ee si komi.10 Ikami natuwu nagasa, nanoa pade tado naria sala-ka si komi to namparisayamo i Yesus Kristus. Nikalio dodo-mida nuanu to nipowia-ka, iwee mbii-da Allatala. 11 Nincani-mida bakote ikami nantulungi komi ewa sadua tuama nantulungi ana-ana-na. 12 Ikami nopatuduki komi, pade nampakaroso rara-mi pade nerapi mpuu-mpuu bona ikomi matuwu nantutu dota nu Allatala, to nampokiomo komi najadi todea-Na ri Poparentaa-Na pade ngoni mamparasai pampemabose-Ya.
Kadonua ri todea nu Allatala
13 Naria mbiipa sangaya to nowia-ka nosukuru oa ri Allatala, apaa tempo-ka noparata Kareba Belo lako ri Allatala si komi, ikomi namparonge pade nantarima kareba ee tado ewa kareba lako ri manusia agiana kareba to mpuu-mpuu lako ri Allatala. Ia-mo to nobago oa ri rara-mi, to neparisaya si Yesus Kristus. 14 Sarara-sarara, ikomi nantodosaka peduasi lako ri ngata dodo-mi, ngata Tesalonika. Ee nasimbei ante to Yahudi to neparisaya si Yesus ri propinsi Yudea to niduasi mbii nu tou sangata dodo-ra. 15 Tou-tou eemo to nopatesi i Pue Yesus bo nabi-nabi, pade nampaduasi-ka. Isira eemo nampodaa sumawee tou, pade Allatala tado mpuu nasana si sira. 16 Isira mbii nampesimbukui mampopeuntu-ka moparata kareba ri tou-tou to tado to Yahudi kareba to mamala mampakasalama tou-tou ee. Nangkajadika tou-tou to Yahudi ee notambei oa jeko-jeko-ra duuna nagana mpuu. Pade kaopuana tempo ei isira nantarima suku nu Allatala! 17 Agiana sarara-sarara, tempo-ka nampawia komi singoni, nakawao lako ri mata, agiana najungku ri rara, ikami nalentora mpuu si komi pade nampesimbukui mpuu-mpuu bona motomuki mbii ante ikomi. 18 Ikami madota malou mampelei komi, pade nipesoba-kamo basangkia ngkani, agiana Mbagou Seta nantolawani-ka. 19 Kakono-konona ikomimo sarumakaa pade kadonua-ka. Sabana ande marata ngoni i Pue Yesus, pade ikita mampotomuka-Ya, ikomimo to kana majadi pemabosea-ka! 20 Kakono-konona ikomimo pemabosea-ka pade kadonua-ka!