Kareba belo to niparata ni Timotius
3
1 Kaopuana lentora-ka tadomo nitahangi-ka, eemo sabana aginamo ikami maboli ri ngata Atena. 2 Pade nitudu-kamo sarara-ta i Timotius bona malou si komi. Ia eemo to namporoasi-ka nampobagoka Allatala bona moparata Kareba Belo nancambelai i Yesus Kristus. Patuju-ka nantudu i Timotius malou si komi bona ia mampakaroso rara-mi pade mampatuduki komi bona mpuu-mpuu meparisaya si Yesus Kristus, 3 bona tado namo saduaa mpuu lako riolo-mi tado maroso kaparisayaa apaa kapepa-kapepa-ta ei. Nincani dodo-mida bakote kapepaa-kapepaa ee nipakatatapu amimo nu Allatala. 4 Ri tempo-ka noroa ante ikomi-dapa, niuli ami kamo si komi bakote ikita kana mapepa. Pade nuanu ee nakono mpuu-mpuu najadimo, ikomi dodo nincani-mida. 5 Eemo sabana nitudu-kumo i Timotius, apaa madota mpuu-ku manguncani beiwa kaparisayaa-mi si Yesus Kristus. Apaa naeka-ku Mbagou nu Seta mampesorimo komi mangkajadika sumawee nuanu nipowia-ka tado maria lotuna.6 Nanculimo i Timotius pade niparata-namo si kami kareba nasana nancambelai beiwa komi neparisaya si Yesus Kristus pade beiwa pombepotowe-mi. I Timotius nanguli si kami bakote ikomi nampalinga oa nuanu to nabelo nancambelai-ka ri rara-mi, pade ikomi mbii madota motomu ante ikami, nasimbei ewa ikami mbii madota mampotomuka komi. 7 Eemo sabana, sarara-sarara, ri rara nu kasusa pade kapepa-ka, ikami nadonu apaa namparonge kareba nancambelai komi. Peparisaya-mi si Yesus Kristus nampakawoe rara-ka. 8 Nangkajadika tempo ei nirasai mpuu-mpuu-ka tuwu, asala maroso dodo pokongkore-mi, mosaongu rara ante i Pue. 9 Ikami nadonu mpuu-mpuu apaa ikomi neparisaya dodo si Pue Allatala. Eemo sabana ikami nosukuru ri Allatala apaa nikeni nu kadonua-ka ee. 10 Eo bengi-na ka nerapi si-Ya ante rara mpuu, bona ikami mamala dodo motomu ante ikomi bona mampeganai nuapa to niparalou-mi ri rara mpeparisaya-mi si Yesus. 11 Niperapi-ka ri Allatala Tuama mboto-ta, pade si Pue-ta i Yesus mantudoka-ta dala bona mamala-ka motomu ante ikomi! 12 Ikami nosambaya bona i Pue Allatala mopajadi towe-mi mantambei oa bona mombepotowe ntoto komi ante tou ntani, ewa towe-ka si komi. 13 Ka-perapi mbii si Pue bona mampakaroso rara-mi, mangkajadika komi magasa pade tado marumu ri ngayo nu Allatala Tuama-ta, ri tempo nu Pue-ta i Yesus marata moroa ante sumawee todea-Na to nagasa.