Pepatuduki bona matuwu magasa
4
1 Kaopua-na sarara-sarara, niweikaka-kamo komi pepatuduki nancambelai beiwa komi kana matuwu bona mampakawoe rara nu Allatala. Nincani-ku ikomi natuwu ewa ee amimo. Agiana tempo ei ri rara kuasa ni Pue Yesus, ka-perapi ante mpuu-mpuu si komi bona mipesimbukui ntotopa mowia nuanu ewa ee. 2 Nincani dodo-mimo bakote pepatuduki-pepatuduki to niwei-kamo komi ri rara kuasa ni Pue Yesus. 3 Dota nu Allatala, bona ikomi matuwu si-Ya ngkola, pade mokawaosi parabuata mogou sala. 4 Butu dua baleilo riolo-mi kana manguncani beiwa matuwu moroa ante bangkele-na ante dala to mampakawoe rara nu Allatala pade manusia. 5 Nemo mi-palambaka dota rara-mi mokuasai koro-mi, ewa katuwu nu tou-tou to tado nanguncani Allatala. 6 Nemo maria namo saduaa mowia gou sala ri sarara to saongu kaparisayaa, ba mampabagiu-ya bona mampogou sala bangkele-na ba baleilo-na. Impia niweika-kamo komi pepopatora mpuu-mpuu, bakote i Pue kana mosuku tou-tou to mampowia nuanu nadaa ewa ee. 7 Allatala nampokio-ta, tado bona ikita matuwu ante parabuata mogou sala, agiana bona ikita matuwu magasa. 8 Tou to namporou pepatuduki ei, tado namporou manusia, agiana namporou Allatala to nambei Inosa Gasa nu Allatala si komi.9 Tadomo ka-tulisi oa si komi nancambelai beiwa komi mampotowe sarara-sarara to saongu kaparisayaa. Ikomi dodo nipatuduki nu Allatala bona mombepotowe. 10 Pade nuanu ee nipopakalio-mimo ri sumawee sarara to saongu kaparisaya ri sumawee propinsi Makedonia. Agiana sarara-sarara, ikami merapi mpuu-mpuu bona ikomi mombepotowe ntoto-pa. 11 Pesimbukuimo matuwu ante maroo rara pade nemo mogalo-galo katuwu nu tou ntani. Pobagomo komi dodo mangonco kaparaloua ngkatuwu-mi, ewa to niparentaka-ka komi impia. 12 Ande ewa ee damo katuwu-mi, tadomo mancarumaka tou ntani komi, pade tou-tou to tado namparisaya i Yesus kana mampabila komi.
Karata ni Pue
13 Sarara-sarara, ikami madota bona ikomi manguncani kakonoana nancambelai tou-tou to namatemo, bona nemo mentuu gaga rara-mi ewa tou-tou ntani to tado naria sarumaka-na. 14 Eemo sabana ikita namparisaya bakote i Pue Allatala kana mopasintobu sumawee tou namate to namparisaya i Yesus, bona isira matuwu moroa ante Ia. 15 Eimo lolita ni Pue to ka-parata si komi: Ri tempo karata ni Pue Yesus karongkanina, ikita to natuwu-dapa, tado mampokoului tou-tou to nokoulumo namate. 16 Ri karata mpanculi-Na, ande mariapa pampetonondi rawei, pade panakoulu nu malaeka ni Pue mongare ante wotu narimboso pade tabue nu Allatala ratawusimo, i Pue Yesus dodomo to kana mesompo lako ri suruga pade tou to peparisaya to namatemo kana mokoulu rapatuwu mpanculi. 17 Maopu ee-da, ikita to natuwu-dapa ri tempo ee kana moroa-roa raongko sangkani ante isira ri rara nu gawu-gawu bona motomu ante i Pue ri laerawa. Pade ikita kana matida ante i Pue duuna masae-masae. 18 Etumo sabana, ikomi kana mombepakaroso mporara ante lolita-lolita ei.