Mainga
5:1-11
5
1 Sarara-sarara, tadomo ka-tulisi si komi neipia tempona nuanu ee kana madupa. 2 Sabana nincani mpuu-mpuu-mida bakote eo karata ni Pue ee kana majadi ewa to pangio to marata kawengina. 3 Ande tou manguli: “Sumaweena naroo dodo pade na'ama,” ri tempo ee-ramo ncamole-mole mamparata suwa, pade tado namo saduaa naliu nu suwa ee. Nuanu ee kana majadi ncamole-mole ewa dua to nitodosaka nu bangkele to moana. 4 Agiana ikomi tado to natuwu ri rara nu kadedia, nangkajadika eo ee tado mampakabatoro komi ewa karata nu topangio. 5 Sarara sumawee, iko-mimo to natuwu ri kabaasana, pade tuwu-ta nipakabaa ni Pue. Ikita tado to natuwu ri rara nu kadedia, to nolumako kawengina. 6 Etumo sabana ikita nemo ewa tou to kawule maleta-leta ngkola. Agiana ikita kana mainga pade manoto dodo rara-ta. 7 Sabana isira to naleta, naleta kawengina, pade isira to nalangu, nalangu kawengina. 8 Agiana ikita ei to natuwu ri kabaasana, etumo sabana pampekiri-ta kana mabaa. Ikita kana meparisaya oa si Pue, bo mampotowe tou-tou ntani pade mancarumaka mpuu-mpuu bakote Allatala kana mampakasalama-ta. Nuanu ee ewa kaliawo to motalendusi-ta tempo mpoiwali. 9 Allatala nampelisi-ta tado bona rasuku, agiana bona rapakasalama-ta apaa namparisaya mpuu-mpuu i Pue-ta i Yesus Kristus. 10 Ia namate nosulewata-ta bona ri tempo karata-Na ngoni, baa matuwu-ta dapa, ba mamate-tamo, ikita kana matuwu moroa ante i Yesus. 11 Etumo sabana, ikomi kana mombepopatora pade mombepakaroso oa, nasimbei ewa to nipowia-mimo tempo ei.Pepatuduki-pepatuduki
12 Sarara-sarara, ka-perapi mpuu-mpuu bona ikomi mampabila topangkeni-topangkeni to nobago ntomo riolo-mi. Isira to nipelisi-mo ni Pue bona mangkeni pade mopatuduki komi. 13 Bila-ramo ante mpuu-mpuu pade ante towe apaa nantora nuanu to nipowia-ra. Katuwumo ante mosingkabelo.
14 Ka-perapi mbii sarara-sarara, ontika belo-belomo tou to tado madota mobago, pakaroso rara tou to naeka, tulungimo tou to namparalou petulungi, pade pancabaramo ri sumawee tou. 15 Jagaimo bona tado maria to mobalasi nuanu nadaa ante nuanu nadaa mbii, pesimbukuimo oa mowia nuanu nabelo, ri sadua sarara saongu kaparisayaa pade ri sumawee tou.
16 Ikomi kana madonu oa, 17 pade mosambaya dodo oa-da, 18 posukurumo komi ri rara nu sumawee ngila ngayana. Nuanu ewa eemo to nipodota nu Allatala si komi apaa ikomi namparisaya i Yesus Kristus.
19 Nemo ralawa pobago nu Inosa Gasa nu Allatala. 20 Nemo mampandaente kareba-kareba to niwei nu Inosa Gasa nu Allatala. 21 Pekiri mpuu-mpuu kareba-kareba to nironge-mi ee, ba nakono-da ba tado. 22 Kaowaosimo sumawee nuanu to nadaa.
Tabe
23 Yaku nosambaya bona i Pue Allatala mambeika-ta kasanaa nu rara, mopajadi komi tou to mpuu-mpuu natuwu ri rara-Na. Nisarumaka-ku i Pue Allatala kana mampajagai rara-mi, pekiri-mi bo woto-mi, nangkajadika tado maria kasalaa-mi ri tempo ni Pue-ta i Yesus Kristus marata mpanculi. 24 I Pue Allatala to nampokiomo komi, kana mowia nuanu ee sabana Ia mamala raparisaya mampakadupa potipa-Na.
25 Sambayani-ka sarara-sarara. 26 Pombetabe-tabemo komi ante towe ri sarara-sarara saongu kaparisayaa ri Tesalonika.
27 Ante kakuasa ni Pue, ku-perapi ante mpuu-mpuu bona ikomi mobasaka sura ei ri sumawee sarara saongu kaparisayaa.
28 Towe rara lako si Yesus Kristus, Pue-ta, mamporoasi komi!