Sura ni Paulus to paramulana ri todea nu Allatala ri Tesalonika
Tabe
1
1 Sarara-sarara ri Tesalonika, to najadi todea nu Allatala pade i Pue Yesus Kristus. Ikami, i Paulus, i Silwanus, bo i Timotius nancarumaka Allatala mambei towe rara pade kasanaa nu rara si komi. Wua nu lolita ni Paulus
2 Ikami nosukuru oa ri Allatala sabana ikomi sumawee pade ikami nosambayani oa komi. 3 Sabana nitora oa-ka beiwa komi nampopakalio ri rara nu inggu bakote ikomi neparisaya si Yesus Kristus, beiwa pampotowe-mi tou ntani, pade beiwa pancarumaka-mi ante mpuu-mpuu si Pue-ta i Yesus Kristus. 4 Nincani-kada, sarara-sarara, bakote Allatala nampotowe komi pade nampelisimo komi bona mantutu-Ya. 5 Sabana ikami noparata Kareba Belo si komi tado kawule ante lolita-lolita ngkola, agiana ante kuasa ni Pue lako ri Inosa Gasa nu Allatala. Pade niparisaya mpuu-mpuu-ka kakono nu Kareba Belo ee. Nincani-mida beiwa-ka natuwu ante patuju nantulungi komi ranca-ka natida riolo-mi. 6 Noudamo ikomi niduasi nu tou ntani, agiana ikomi nosombo ante donu rara kareba to niparata-ka si komi. Apaa ikomi nantutu nuanu nabelo to nipowia-ka pade nuanu nabelo to nipowia ni Pue. Kadonua nu rara ee niwei nu Inosa Gasa nu Allatala. 7 Ante eemo ikomi najadi jonjo ri sumawee tou to neparisaya si Yesus ri propinsi Makedonia pade ri Propinsi Akhaya. 8 Sabana mopamula lako si komi, Kareba Belo nancambelai i Pue-ta nowolemo duuna narata ri propinsi Makedonia pade Propinsi Akhaya. Pade tado kawule ee ngkola, kareba nancambelai beiwa peparisaya-mi ri Allatala nowolemo riumba-umba, nangkajadika tadomo maria nuapa-pa ka-uli. 9 Sumawee tou ee nololita nancambelai beiwa pantarima-mi ka sintou-ka impia narata si komi. Isira mbii nanguli nancambelai beiwa pampawia-mi karampua-karampua pade negoli nampenombai Allatala to natuwu bo nanoa. 10 Isira mbii nololita nancambelai beiwa komi nampopea karata mpanculi ni Yesus, Ana nu Allatala, ri dunia lako ri suruga, to nipatuwu mpanculimo nu Allatala lako ri kamatea. I Yesus ee mbiimo to mampakasalama-ta lako ri suku nu Allatala to kana marata.