4
1 Sarara-sarara to najadi maradika. Ikomi kana moinggu mabelo bo manoa ri batua-batua-mi. Toramo bakote ikomi mbii naria maradika-mi ri suruga. 2 Ikomi kana mosambaya oa bo mainga, pade mosukuru oa ri Allatala. 3 Sambayani mbii-ka kami bona Allatala mambeika-ka kalogaa mampopowole kareba nancambelai ntoliro ni Kristus. Apaa tempo ei-ku nitarungku sabana nampopowole kareba ee. 4 Pade posambaya mbii komi bona mamala-ku mopanotosi ntoliro ee ante kakono-konona, apaa nuanu ee mpuumo to kana kupowia. 5 Ri rara nu kasintundu-mi ante tou-tou to tadopa neparisaya, ikomi kana matuwu ante kapandea pade mampake belo-belo butu loga to naria. 6 Ande ikomi mololita ante isira, lolita-lolita to miuli kana maolu bo marasa raronge. Ikomi kana manguncani beiwa sono to masipato manconoi pepekutana-ra.
Kaopuana pade petabe
7 I Tikhikus, sarara towea-ta kana mangulikaka komi nancambelai sumawee nuapa to najadi si yaku. Ia ei sadua to natundu namporoa-ka nampobagoka i Pue. 8 Eemo sabana yaku nantudu-ya malou si komi, bona mi-ncani beiwa kareba-ka isei, bona maroso rara-mi. 9 I Tikhikus nitudu-ku noroa ante i Onesimus, sarara towea-ta. Ia ei tou lako ri ngata dodo-mi, pade natundu mpuu si Kristus. Isira rodua ei damo mangulikaka komi sumawee nuanu to najadi isei. 10 I Aristarkhus, to noroa ante i yaku ri rara nu tarungku ei, nopakatu tabe-na si komi. Iwee mbii i Markus, sarara sangkani ni Barnabas nopakatu mbii tabe-na si komi. Nancambelai i Markus ei, nipakatuka-kumo komi kareba, ande marata-ya si komi tarima belo-ya. 11 I Yesus to nikasangai i Yustus, nopakatu mbii tabe-na si komi. Totolu ngkola ei to Yahudi to nobago namporoasi-ku nowia bago lako ri Allatala. Isira-mo to mpuu-mpuu nantulungi-ku. 12 Tabe lako si Epafras. Ia mbii to lako ri ngata dodo-mi. Ia ei batua ni Kristus Yesus, to nosambayani oa komi. Ia nerapi ante rara mpuu-na ri Allatala bona kaparisayaa-mi majadi maroso pade ikomi mpuu-mpuu manguncani, pade bona magana katundu-mi mampowia dota nu Allatala. 13 Nikalio dodo-ku bakote ia-mo to mpuu-mpuu nampobago-ka komi, pade nampobago-ka tou-tou to ri Laodikia pade ri Hierapolis. 14 Dokutoro i Lukas, to nipotowe-ta, pade i Demas nopakatu tabe-ra si komi. 15 Parata mbii tabe-ka ri todea nu Allatala ri Laodikia, iwee mbii si Nimfa, pade ri tou-tou to notobu nosambaya ri sou-na. 16 Maopu-pa sura ei rabasa-ka komi, pakatu mbii ri todea nu Allatala ri Laodikia bona isira mbii mobasa. Iweetu mbii ikomi kana mobasa sura to nipakatuka-ku todea nu Allatala ri Laodikia. 17 Pade ulikaka i Arkhipus bona bago mampalayani i Pue to niwei si-ya, kana napakaopu mpuu-mpuu. 18 Tabe lako si yaku, i Paulus. Kaopua nu sura ei nitulisi-ku ante pale dodo-ku. Nemo mi-kalingani bakote yaku ri rara nu tarungku dapa!
Towe rara nu Allatala mamporoasi oa komi.