2
1 Yaku madota bona ikomi manguncani beiwa pampewuku mpuu-mpuu-ku nantulungi komi pade nantulungi tou ri ngata Laodikia, pade ri tou to tadopa nombencani ante yaku. 2 Sumaweena ee nipowia-ku bona rara-ra maroso pura, pade isira sumawee kana mombepotowe bo mosaongu rara. Bona ande ewa ee, isira mpuu-mpuu meparisaya pade manguncani i Kristus to impia nipontolirodapa nu Allatala. 3 I Kristus- mo to nampopeumba sumawee noto rara bo kapandea nu Allatala to tadopa nincani nu tou. 4 Patuju-ku nanguli lolita ei, bona tado mamala komi nabagiu nu tou ante lolita-lolita-ra to mamala mampakalulu rara-mi. 5 Apaa noudamo nakawao-ku lako si komi, agiana rara-ku namporoasi dodo komi. Pade nadonu mpuu rara-ku nangkalio komi nosaongu rara pade naroso dodo peparisaya-mi si Kristus.Kaponu ngkatuwu ri rara ni Kristus
6 Sarara-sarara, nitarima-mimo i Kristus Yesus najadi Pue-mi. Eemo sabana ikomi kana matuwu mosaongu rara ante Ia, 7 pade ikomi kana matuwu molari ri rara ni Kristus. Ikomi kana mopatinda katuwu-mi pade i Kristus majadi parawatuna. Ikomi kana mantambei karoso nu peparisaya-mi si Kristus, mantutu nuanu to nipatudukikamo si komi, pade rara-mi maponu ante posukuru.
8 Agiana ikomi kana mainga, nemo ngoni maria to mampotodoyoa komi ante lolita-lolita nu manusia to tado naria lotuna, to kawule mepakapusa. Lolita-lolita ee tado lako si Kristus, aga kawule pamparata nu manusia ngkola-da pade lako ri karampua-karampua to nakuasa ri dunia ei. 9 Sabana sumawee inggu pade kuasa nu Allatala naria si Kristus tempo ni Kristus najadi manusia. 10 Pade ikomi natuwu mpuu bo tado nakakuranga nuapa-pa apaa ikomi nosaongu rara ante i Kristus. Nabetepa kuasa ni Kristus lako ri sumawee to nakuasa pade noparenta ri suruga bo ri dunia. 11 Apaa nosaongu raramo komi ante i Kristus, nitindimo komi, agiana petindi ee tado nipowia nu manusia, petindi ee to nipowia ni Kristus ri rara-mi, to nampakabebasi komi lako ri kuasa nu jeko. 12 Sabana tempo-mi nibaptis, ikomi nitana noroa ante i Kristus, pade ante pebaptis ee mbii, ikomi nipatuwu mpanculi noroa ante i Kristus, apaa ikomi namparisaya kuasa nu Allatala to nopatuwu mpanculi i Kristus lako ri kamatea. 13 Noudamo impia ikomi ewa tonamatemo apaa nowia jeko, pade tado nitindi. Agiana ngkapuri ei Allatala nopatuwu mpanculi komi noroa ante i Kristus. Niampungi-mo nu Allatala sumawee jeko-mi. 14 Impia-komi masipato rasuku nu Allatala sabana nangewa parenta-Na. Agiana tempo ni Yesus namate ri kou salib, tadomo nireke nu Allatala sumawee kasalaa-mi ee, pade nipakabebasi-Na mo komi lako ri parenta Taurat to nantomo. Eemo sabana tadomo rasuku komi. 15 Tempo ni Yesus namate ri kou salib, nidagi-Namo sumawee inosa-inosa to nadaa to noparenta pade nakuasa. Nilali-Namo sumawee kuasa-ra neparenta pade nipopakalio-Na ri sumawee isi nu dunia bakote Ia-mo topedagi.
Oncomo kara-kara to ri wumbuna
16 Etumo sabana nemo mi-palambaka tou mampomasala komi nancambelai kondia ba inua, ba eo-eo bete nu agama, ba eo-eo karamea ri wula bou, ba ri Eo Peuntua mpuumo. 17 Sabana atura-atura bo ada-ada ewa ee kawule wao nuanu to kana marata ngoni, agiana kadupaa lako ri sumaweena ee, ia-mo i Kristus. 18 Nemo mipalambaka koro-mi napakarugi nu tou to kalioaana naede rara bo nenomba ri malaeka-malaeka. Tou ee kawule nalangko rara ante pampekiri nu dunia ei pade nampomole nuanu nikalio-ra, 19 nangkajadika i sira ei tadomo natundu si Kristus to najadi Woo. Ri penini ni Kristus, sumawee woto nipasisi bo nipasangkani nu ua-ua bo lesoka, pade natuwu nantutu dota nu Allatala.
20 Ikomi namatemo noroa-roa ante i Kristus, pade nipakabebasimo lako ri inosa-inosa to nokuasai dunia ei. Jadi, nuapa pade katuwu-mi ewa tou to nikuasai oa-dapa nu dunia ei? Nuapa pade natundu ri atura-atura ewa eimo komi: 21 “Nemo mangkakamu ei”, “Nemo mantomi etu”, “Nemo mantui ei"? 22 Sumawee atura ee aga nancambelai nuanu naopumo nipake pade tadomo naria lotuna. Nuanu ee kawule atura-atura bo pepatuduki-pepatuduki to nipowia nu manusia. 23 Atura-atura ee kalioaana nabelo, apaa nopatuduki tou menomba ri malaeka, mampakaede rara pade moduasi koro. Agiana sumaweena ee tado nantulungi komi bona meuntu mowia dota rara-mi to nadaa.