Sura ni Paulus ri Todea nu Allatala ri
Kolose
Tabe
1:1-2
1
1 Sura ei lako si yaku i Paulus, to niongko nu Allatala najadi suro ni Kristus Yesus, pade lako si Timotius sarara-ta, 2 nipakatu si komi todea nu Allatala ri ngata Kolose. Towe rara pade kasanaa lako ri Allatala, Tuama-ta, mamporoasi komi.Posukuru pade sambaya
1:3-14
3 Butu ngkani-ka nosambayani komi, ikami nosukuru oa ri Allatala, Tuama nu Pue-ta i Yesus Kristus, 4 apaa nironge-kamo kareba peparisaya-mi si Kristus Yesus pade towe-mi ri sumawee todea nu Allatala. 5 Ikomi neparisaya bo nepotowe sabana ikomi nancarumaka nuapa to nipasadiaka komi nu Allatala ri suruga. Nuanu nisarumaka-mi ee nironge-mimo tempo nu Kareba Belo niparata si komi. Kareba Belo ee nakono mpuu-da, 6 bo nowole ri sumawee dunia, nangkajadika nantambei kadea nu tou to namparisaya i Yesus Kristus pade isira nowia inggu to nabelo. Iwee mbii nuanu to najadi si komi, nopamula lako ri pamparonge-mi Kareba Belo ee, nangkajadika nirasai mpuu-mpuu-mi kabelo nu Allatala. 7 Kabelo nu Allatala ee nironge-mimo lako si Eprafas, roa sampobagoa-ka to nipotowe-ka. Ia ei batua ni Kristus to natundu nobago nantulungi komi. 8 Ia-mo to nanguli si kami bakote ikomi nombepotowe sabana ni nini nu Inosa Gasa.
9 Etumo sabana, nopamula lako ri pamparonge-ka kareba nancambelai komi, ikami nosambayani oa komi. Ikami nerapi ri Allatala bona Inosa Gasa-Na mambeikaka komi kapandea pade kanotoa nu rara bona ikomi manguncani mpuu nuapa dota nu Allatala, 10 bona ikomi mamala matuwu mantutu dota nu Allatala, pade mampakasana rara-Na apaa ikomi nowia oa parabuata to nabelo. Pade noto rara-mi nancambelai Allatala mbii mantambei oa. 11 Ikami nosambaya bona Allatala mampakaroso roso rara-mi ante sumawee kuasa-Na to nabete mpuu bona mampowia komi mpuu-mpuu maroso pade mampakule mampongayo ngila ngaya nu kapepaa ante mancabara pade madonu. 12 Ikami nosambaya bona madonu oa rara-mi mosukuru ri Tuama-ta, Allatala, apaa Ia-mo to nampowia komi majadi masipato bona mamparata bagia lako ri nuapa to nitipa-Na ri todea-Na ri rara nu Poparentaa-Na to nabaa. 13 Allatala-mo to nampakabebasi-ta lako ri kuasa nu kadedia pade nopajadi-ta todea ri rara nu Poparentaa nu Ana-Na to nipotowe-Na. 14 Sabana Ana-Na ee-mo, ikita nipakabebasi, ee batuana niampungimo jeko-jeko-ta.
I Kristusmo pokona
15 I Kristusmo gambara nu Allatala to tado nikalio, i Kristusmo ana ulumbua, poko nu ngila ngaya nuanu to nipajadi. 16 Ri rara ni Yesus Kristus Allatala nopajadi ngila ngayana ri suruga pade ri wongko nu dunia, ngila ngaya nuanu to nikalio pade nuanu to tado nikalio, pade mbii sumawee Inosa to nakuasa pade to noparenta. Sumaweena nipajadi ante kuasa-Na pade nantutu dota-Na. 17 Sintou tadopa naria ngila ngayana, naria amimo i Kristus. Pade Ia mbiimo to noatoro bo nokuasai ngila ngaya nuanu to nipajadi nu Allatala. 18 Ikita to namparisaya i Kristus nirapaika woto-Na, pade i Kristus najadi woo-ta. Woo-ta noatoro woto-ta, iwee mbii Ia noatoro todea to neparisaya si-Ya. Ia-mo to nambei-ta katuwua bou, apaa Ia-mo ana Ulumbua. Batuana Ia-mo to paramulana natuwu mpanculi lako ri kamatea. Ee-mo sabana Ia najadi poko nu sumawee ngila ngayana. 19 Allatala dodomo to nampodota bona ngila ngaya nuanu to naria ri koro nu Allatala, maria mbii ante magana-gana ri koro nu Ana-Na. 20 Pade lako ri Ana-Na ee mbii Allatala nobotusi bona mowia ngila ngayana mosingkabelo mpanculi ante Ia, sumawe nuanu naria ri dunia, iwee mbii to naria ri suruga. Allatala nowia ee ri rara nu kamate nu Ana-Na ri kou salib. 21 Impia komi nakawao lako ri Allatala. Ikomi nampobali-Ya apaa inggu pade pekiri-mi to nadaa. 22 Agiana ngkapuri ei, ante kamate nu Ana-Na nangkajadika posintuwu-mi ante Allatala nabelo mpanculi. Kamate nu Ana-Na ee nowia komi najadi nagasa, narawa pade tado naria nakeruta ri pangkalioaa nu Allatala. 23 Ee-mo sabana ikomi kana meparisaya dodo pade mentida mpuu-mpuu ri rara nu kaparisayaa-mi. Nemo mi-pawia sarumakaa to niweikaka-mo komi tempo-mi nantarima Kareba Belo lako ri Allatala. Kareba Belo ee niparatamo ri butu dua tou ri dunia. Pade yaku, i Paulus, niongko najadi topoparata Kareba Belo ee.
Pobago pade kapepaa ni Paulus
1:24 - 2:5
24 Ngkapuri ei nadonu-ku nantodosaka kapepaa sabana yaku nobago nantulungi komi. Apaa yaku nampeganai ri koro-ku kapepaa to nipakatantu ni Kristus kana ku-todosaka. Kapepaa to nitodosaka-ku nangkeni belo ri todea to neparisaya, to nirapaika woto ni kristus. 25 Yaku niongko nu Allatala mantulungi todea-Na. Niparisayaka-Na si yaku bago ee, bona yaku damo moparata Kareba Belo ee si komi. 26 Kareba ee nopanotosi dota nu Allatala to nipontoliro ri sumawee manusia lako ngkoulu , agiana ngkapuri ei nipanguncanika-Namo ri todea-Na. 27 Apaa dota nu Allatala bona nancani nu todea-Na kabelo bo kabete nu ntoliro-Na ri sumawee manusia. Ntoliro ee-mo: I Kristus matida ri rara-ta, jadi ta-ncanimo bakote ikita mpuu-mpuu matuwu mosingkabelo ante Allatala duuna masae-sae. 28 Kareba nancambelai i Kristus ee-mo to nipopowole-ka ri sumawee tou. Ikami nampopatora-ra pade nampatuduki-ra ante sumawee kapandea to naria si kami. Patuju-ka bona butu dua tou mamala rakeni ri ngayo nu Allatala, majadi tou to natoualu ri rara nu peparisaya, apaa nopasangkanimo ante i Kristus. 29 Ee-mo sabana pade nobago ntomo-ku, nipesimbukui mpuu-ku nangkakamu bago-ku nantutu karosoa to niwei-ku ni Kristus, apaa naroso mpuu kuasa-Na ri rara ngkatuwu-ku.