4
1 Etumo sabana, sarara-sarara-ku to nipotowe-ku, ikomi kana mpuu-mpuu matuwu mamparisaya i Pue. Rara-ku nalentora si komi. Ikomimo nipodondi-ku to nowia-ku nadonu.Pepatuduki-pepatuduki kaopuana
2 Sarara-ku i Euodia pade i Sintike, ku-perapi ante mpuu-mpuu bona ikomi mosaongu rara ewa tou-tou to saongu kaparisaya si Pue. 3 Ntanina lako ee, wega sampobagoa-ku to natundu, ngawamo bangkele rodua ei bona mosingkabelo-ra. Isira nobago ntomo-mo namporoasi-ku nampopowole Kareba Belo lako ri Allatala, nasimbei ewa i Klemen pade sumawee tou ntani to nobago namporoa-roa-ku. Sanga-sanga-ra naria nitulisi ri rara Buku Katuwua.
4 Kadonu oamo komi sabana ikomi natuwu nosaongu raramo ante i Pue. Sangkani mbiipa ku'uli: Kadonumo. 5 Palambakamo sumawee tou mangkalio inggu pade parabuata-mi to nabelo. Toramo, tadomo masae i Pue kana marata. 6 Sintou mamparata kasusaa, nemo mokantabu rara-mi nancambelai ba nuapa-pa. Pegoliana butu ngkanina komi mosambaya, perapimo sumawee kaparaloua-mi ri Allatala. Butu ngkanina komi mosambaya, nemo mikalingani mosukuru si-Ya, 7 mangkajadika kasanaa lako ri Allatala to tado namala nincani nu manusia, kana mojagai rara bo pekiri-mi to nosaongu raramo ante i Kristus Yesus.
8 Eimo kaopuana to madota ku'uli si komi, sarara-sarara. Ikomi kana mampekiri oa nuapa to nakono, to nibila, to nanoa ri mata nu Allatala bo manusia, to tado naria kasalaana, to nepakadonu, pade to nabelo nironge. Ntanina lako ee pekiri mbii nuanu to nabelo pade sumawee to masipato naune nu tou. 9 Powiamo oa sumawee nuanu to nipeguru bo to nitarima-mi lako si yaku, nuanu to niuli-ku bo to nipowia-ku. Ande ikomi mowia ewa ee, Allatala kana molali pokantabu nu rara-mi, pade kana mantulungi komi.
Posukuru ri pewei nu todea nu Allatala
10 Nabete mpuu kadonu nu rara-ku apaa yaku nosaongu rara ante i Pue. Noudamo nasae-tamo nogaa, agiana ikomi nampopakalio nculi beiwa pampotowemi-ku. Nipotowe amimi-kuda, agiana tado naloga komi nampangawa-ku ri tempo ee. 11 Yaku nanguli ewa ei tado ba nakapuncia-ku, apaa nampetumbu-kumo bona mampakaosa rara ante nuanu to naria si yaku. 12 Nirasai-kumo beiwa natuwu netowei. Nirasai mbii kumo beiwa natuwu neliu lako ri kaparalouaa-ku. Ba neipia-pia pade ba riumba-umba-ku maria, nampetumbu-kumo nampakaosa rara ante nuanu to naria siya-ku. Ba nabosu-ku, ba naoro-ku, ba naria pelabiana ba nakapuncia. 13 Ante kuasa to niwei ni Kristus si yaku, naria karosoa-ku nampongayo sumaweena ee. 14 Agiana ikomi nantulungi-ku ri rara nu kasusaa-ku pade nuanu to nipowia-mi ee mpuu-mpuu nabelo. 15 Sarara-sarara to Filipi! Nincani mpuu-mida bakote ikomi ngkola todea nu Allatala to nambei doi si yaku tempo-ku nampawia ngata Makedonia impia. Tempo ee-mo paramula ntotona Kareba Belo ee nipopowole-ku si komi. 16 Ranca-ku ri ngata Tesalonika pade namparalou pengawa, nelabi lako ri sangkanimo komi nopakatu pengawa-mi siya-ku. 17 Yaku nanguli ewa ei tado bakote yaku nampemei oa pengawa lako si komi. Patuju-ku to madota ku-kalio, ikomi kana mowia oa inggu mabelo, mangkajadika Allatala kana mobalasi kabelo-mi. 18 Nitarima-kumo sumaweena, ba nelabi-labipa lako ri kagana-na. Sumawee pengawa to nipakatu-mi siya-ku, nitarima-kumo lako si Epafroditus. Tempo ei sumawee to niparalou-ku naria puramo. Pengawa-pengawa lako si komi ee ewa kawongi nu tinuwu to nipopenomba ri Allatala pade to nitarima nu Allatala ante donu rara-Na. 19 Allatala to nasugi mpuu, to nipenombai-ku ri rara ni Yesus Kristus kana mampeganai sumawee kaparaloua-mi. 20 Raunemo Allatala, Tuama-ta duuna masae-sae! Amin.
Tabe
21 Paratamo tabe-ku ri sumawee todea nu Allatala to nosaongu rara ante i Kristus Yesus. Pade tarima mbii tabe lako ri todea nu Allatala to naria namporoa-ku isei. 22 Sumawee todea nu Allatala ri ngata ei, peliu-liuna isira to nobago ri sou nu Mbagou Bete, nopakatu tabe-ra si komi. 23 Towe rara lako si Pue Yesus Kristus mamporoasi komi sarara sumawee.