Matundu pade towe
6
1 Ngana-ngana, tutumo parenta nu totua-mi, apaa ee-mo to masipato napowia nu todea ni Pue. 2 Ri rara Buku Nagasa naria parenta iweei: “Bilamo tuama-mu pade tina-mu.” Ee-mo poko nu parenta to nitutu ante potipa nu Allatala: 3 “Bona mabelo katuwu-mu pade malanga umuru-mu ri dunia ei.”4 Pade ikomi tuama-tuama, nemo mi-powia nuanu to mampakadua rara nu ana-mi, agiana patuduki-ramo ante pepatuduki pade pedederi ni Pue. 5 Sarara-sarara to najadi batua, tutumo parenta nu maradika-mi to naria ri dunia ei. Bila-ramo pade tutumo parenta-ra ante mpuu-mpuu, nasimbei ewa pantutu-mi parenta ni Kristus. 6 Nemo tempo-mi nakalio ngkola nu maradika-mi pade mobago mabeloda komi, bona na-une komi. Agiana pobagomo komi ante rara mpuu-mpuu najadi batua ni Kristus to nantutu dota nu Allatala. 7 Powiamo bago-mi ante sana rara, nasimbei ewa ikomi nampalayani i Pue, tado nampalayani manusia. 8 Toramo bakote butu dua nu tou, ba batua-ya, ba tado batua, kana mantarima balasia lako si Pue majadi tombo lako ri nuanu to nabelo to nipowia-na.
9 Iweetu mbii ikomi to najadi maradika, ikomi kana moinggu mabelo ri batua-mi. Nemo migarataa-ra. Toramo bakote ikomi pade batua-mi ee nasimbei-da maradika-mi. Ia-mo i Pue to ri suruga, Ia tado nangkalio lence.
Parewa poiwali lako ri Allatala
10 Kaopuana sarara-sarara, ikomi kana majadi maroso ante karosoa to nitarima-mi lako ri kuasa ni Pue, apaa ikomi nosaongu rara ante Ia. 11 Pakemo sumawee parewa mpoiwali to niwei nu Allatala si komi, bona mamala komi mentida mangewa pebagiu nu Mbagou Seta, 12 apaa ikita noiwali tado nangewa manusia, agiana nangewa sumawee seta-seta to nokuasai dunia to nadaa ei. Ikita nangewa wao-wao tuwu to nokuasai laerawa. 13 Ee-mo sabana, pakemo sumawee parewa mpoiwali to niwei nu Allatala si komi, bona ande marata tempona nuanu to nadaa mamparumpa komi, mamala komi mampongayo nuanu to nadaa ee, pade maroso dodo pentida-mi duuna poiwali-mi ee maopu.
14 Pakarosomo pokongkore ante mampake pepatuduki to nakono majadi sulepe-mi. Pake mbii kanoaa majadi powaru ase bona motalendusi komi. 15 Ante doli rara-mi moparata Kareba Belo to nangkeni kasanaa, ee-mo to majadi sapatu-mi. 16 Ri rara nu sumawee ngila ngayana, pakemo kaparisayaa-mi si Pue majadi kaliawo. Ante kaparisayaa ee-mo komi mamala mopatesi sumawee pana apu lako ri to daa. Ande maroso peparisaya-mi, kana mi-pakule mampadagi pesori. 17 Pakemo kasalamaa to niwei nu Allatala majadi songko ase to motalendusi komi. Pade tarimamo lolita nu Allatala lako ri Inosa Gasa nu Allatala. Lolita nu Allatala ee kana majadi guma-mi. 18 Powiamo sumaweena ee ante mosambaya butu jaana ante mantutu penini nu Inosa Gasa nu Allatala. Posambaya oamo, pade mainga oa ri rara nu sumawee ngila ngayana pade nemo maria kadagia, agiana mosambaya oa. Pade butu ngkani komi mosambaya, sambayani mbii sumawee todea nu Allatala. 19 Pade sambayani mbii-ku, bona nawei-ku nu Allatala lolita-lolita to masipato ku'uli. Posambayamo bona tado maria eka-ku mampopowole ntoliro nu Allatala to nitulisi ri rara nu Kareba Belo. 20 Apaa yaku nobago najadi suro bona mampopowole Kareba Belo ee, ee-mo sabana pade nitarungku-kumo tempo ei. Jadi posambayamo komi ri Allatala bona mabia-ku mololita mancambelai Kareba Belo ee, ewa to masipato ku-pololita.
Tabe kaopuana
21 Bona mamala mi-ncani beiwamo katuwu-ku tempo ei, i Tikhikus kana mangulikaka komi nancambelai sumawee nuanu to nirasai-ku. I Tikhikus ei sarara-ta saongu kaparisayata to nipotowe-ta pade ia mbii nobago mpuu-mpuumo nampalayani i Pue. 22 Ee-mo sabana pade nitudu-ku ya-mo malou si komi bona mi-ronge dodo lako si-ya beiwamo katuwu-ka sumawee tempo ei, bona mawoe rara-mi.