Matuwu ri rara nu kabaasana
5
1 Ikomimo ana-ana nu Allatala to nipotowe-Na. Jadi pesimbukuimo mantutu inggu nu Allatala. 2 Katuwumo mombepotowe ewa i Kristus mbii nampotowe-ta pade to nampakasalama-tamo ante nampalambaka koro-Na namate. Ante kamate-Na ee, Ia najadi penomba to nawongi bo nampakawoe rara nu Allatala. 3 Ikomi ei todea nu Allatala. Ee-mo sabana, tado masipato komi mogousala ante pade mowia inggu to tado naowo, ba mampokeilu nuanu nu singkapada manusia. Noudamo kawule mi-kasangai ngkola tado masipato. 4 Ikomi mbii tado masipato manguli lolita to tado naowo bo to tado naria lotuna, ba mokuwawa ante manguli nuanu to tado masipato rauli. Agiana ikomi kana mosukuru ri Allatala. 5 Peirara belo-belo: Sumawee tou to nogou sala, tou to nowia inggu to tado naowo, bo tou to nampokeilu nuanu nu singkapada manusia tado masipato majadi todea to naparenta ni Kristus bo Allatala. Isira nasimbei ewa tou to nenomba ri karampua. 6 Nemo mi-palambaka tou mampakapusa komi ante lolita-lolita to tado naria lotuna. Apaa nuanu ee kana mampakasodo Allatala. 7 Ee-mo sabana, kawaosimo tou-tou ewa ee.
8 Impia komi natuwu ri rara nu kadedia amida, agiana tempo ei nosaongu raramo komi ante i Pue, jadi ikomi ri rara nu kabaasanamo. Ee-mo sabana ikomi kana matuwu ri kabaasana. 9 Kabaasana ei-mo to nampowia tou mamala mowia sumawee nuanu to nabelo, nanoa pade nakono. 10 Jadi ikita kana mampesimbukui manguncani pade mampowia nuanu to mampakasana rara ni Pue. 11 Nemo mowia parabuata-parabuata to tado naria lotuna to nipowia nu tou-tou to natuwu ri rara nu kadedia. Agiana ikomi kana mopanotosi bakote parabuata-ra ee nadaa. 12 Apaa nuanu nadaa to nipowia-ra bongo-bongo ee nepakaeya mpuu, noudamo kawule rapololita ngkola. 13 Agiana sumawee nuanu to niwanta nu kabaasana, kana manoto rakalio. Apaa sumawee to nanoto nikalio, ee-mo kabaasana 14 Ee-mo sabana pade niuli:
“Pematamo, ikomi to naleta,
pade katuwu mpanculimo lako riolo nu tomate,
pade kabaasa ni Kristus kana mampawanta komi.”
15 Ee-mo sabana, peirara belo-belo dala ngkatuwu-mi. Nemo matuwu ewa tou-tou to nadoyo. Agiana katuwumo ewa to nabija. 16 Pakemo pakabelo-belo kalogaa to naria si komi mowia nuanu to nabelo, apaa tempo ei inggu nu manusia nadaa mpuu. 17 Nemo madoyo, agiana pesimbukuimo bona mi-ncani nuapa dota ni Pue. 18 Nemo nalanguti nu anggur komi, apaa ande malangu komi kana mampakagero katuwu-mi. Agiana katuwu-mi kana nakuasai nu Inosa Gasa nu Allatala. 19 Ulimo lolita-lolita ri buku Mazmur, pade dodia-dodia to nipake nangune Allatala ri rara nu pombepololitaka-mi. Ante donu rara-mi, ikomi kana mododia mangune i Pue ante mpuu-mpuu. 20 Ri rara nu sumawee ngila ngayana, ikomi kana mosukuru oa ri Allatala Tuama-ta, ri rara sanga ni Yesus Kristus Pue-ta.
21 Pakaedemo rara-mi ri sadua bo ntanina. Powiamo ee apaa ikomi nampabila i Yesus Kristus.
Towe ni Kristus najadi sarumakaa nu toponcamboko
22 Bangkele to nobaleilomo, katundumo ri baleilo-mu ewa katundu-mu si Pue. 23 Apaa baleilo-da to nokapalani bangkele-na, nasimbei ewa i Kristus to nokapalani todea nu Allatala pade Ia dodo mbiimo Mbagou Topepakasalama ri todea nu Allatala to najadi woto-Na. 24 Nasimbei ewa todea nu Allatala to natundu si Kristus, iwee mbii ri rara nu ngila ngayana bangkele to nobaleilomo kana matundu ri baleilo-na.
25 Iwee mbii baleilo to nobangkelemo, potowemo bangkele-mu ewa i Kristus nampotowe todea nu Allatala pade nambei koro-Na mamate bona mampakasalama todea nu Allatala ee. 26 Ante ee Ya-mo nopajadi-ta todea-Na, to nipakagasa ante ue pade lolita-Na. 27 I Kristus nowia ewa ee bona todea-Na mamala ewa pongante bangkele to nokongkore ante magaya mpuu ri ngayo-Na, majadi todea-Na to mpuu-mpuu magasa, pade to tado maria kakeruta ba kasalaa mpuumo. 28 Iwee mbii baleilo to nobangkelemo kana mampotowe bangkele-na nasimbei ewa pampotowe-na koro dodo-na. Yema mampotowe bangkele-na, nampotowe koro dodo-na. 29 Tado naria tou to nampodaa woto dodo-na. Agiana ia nopiara bo nojagai woto-na ewa i Kristus nopiara todea-Na. 30 Apaa ikita ei woto-Na. 31 Ri rara Buku Nagasa nitulisi: “Ee-mo sabana sadua baleilo kana mampawia tuama-na bo tina-na pade mopasangkani ante bangkele-na, bona isira majadi saongu woto.” 32 Lolita ri Buku Nagasa ee nandala mpuu batuana, agiana patuju-ku iwei: lolita ee nampololita katetokaiaa ni Kristus ante todea-Na. 33 Agiana lolita ee naria mbii katetokaiaana ante ikomi: Butu dua baleilo to nobangkelemo kana mampotowe bangkele-na nasimbei ewa pampotowe-na koro dodo-na, pade butu dua bangkele to nobaleilomo kana mampabila baleilo-na.