Ntoliro pampokio tou-tou to tado to Yahudi
3
1 Ee-mo sabana yaku, i Paulus nitarungku apaa nampopowole Kareba belo nancambelai i Yesus Kristus si komi tou-tou to tado to Yahudi. 2 Nironge-mimo bakote Allatala nambei-kumo bago noparata Kareba Belo si komi tou-tou to tado to Yahudi. Bago ee niwei-Na si yaku lako ri towe rara-Na. 3 Allatala nanguli ntoliro-Na si yaku. Nancambelai nuanu ei nitulisi-kumo saodi ri rara nu sura ei. 4 Ande mi-basamo nuapa to nitulisi-ku ee, ikomi kana manguncani ntoliro nancambelai Kristus ewa to nincani-ku. 5 Impia ntoliro ee tado naria niuli ri manusia, agiana tempo ei nipopakalio-mo nu Inosa Gasa nu Allatala ri suro-suro pade ri nabi-nabi to nipelisi-Na. 6 Ei-mo ntoliro ee: Lako ri Kareba Belo ee, tou-tou to tado to Yahudi mantarima mbii rasi-rasi lako ri Allatala to impia nipasadiaka to Yahudi ngkola. Pade tou-tou to tado to Yahudi moroa-roa ante to Yahudi majadi bagia-bagia ri saongu woto, ee-mo woto ni Kristus, pade kana mantarima sumawee nuanu to nitipa nu Allatala ri tou to nosaongu rara ante i Yesus Kristus.7 Lako ri towe rara-Na, Allatala nambei-ku rasi bona mobago mampopowole Kareba Belo ee. Ante kuasa-Na to nobago ri koro-ku, Ia nopajadi-ku nampakule nampowia bago ee. 8 Riolo nu sumawee todea nu Allatala, yakumo to tado mpuu masipato. Agiana lako ri towe rara-Na, Allatala nambeikaka-ku rasi bona mobago mampopowole Kareba Belo nancambelai kabelo ni Kristus to tado naria kaopuana ee ri tou-tou to tado to Yahudi, 9 pade bona lako si yaku, sumawee tou manguncani beiwa Allatala to nopajadi dunia bo langi, nopadupa liwo-Na to lako impia leke nipontoliro-Na ri manusia. 10 Patuju nu Allatala bona tempo ei to nakuasa ri suruga bo to nakuasaa ri laerawa, manguncani kapande nu Allatala ri rara nu sumawee ngila ngayana, rakalio lako ri nuanu to nadupa ri todea nu Allatala. 11 Allatala nowia sumaweena ee nantutu liwo-Na to nipakatatapu ami-mo lako ri paramulana duuna masae-sae. Pade liwo-Na ee nipadupa-Na ante nuanu to nipowia ni Yesus Kristus, Pue-ta. 12 Ikita mamala mamei ri ngayo nu Allatala ante tado maeka-eka apaa ikita namparisaya i Kristus pade nosaongu rara ante Ia. 13 Ee-mo sabana, ku-perapi si komi, nemo maeka komi mangkalio kapepaa to nitodosaka-ku sabana ikomi, apaa sumawee kapepaa ee mangkeni kabeloa si komi.
Sambaya ni Paulus
14 Ee-mo sabana yaku notumbukotu nosambaya ri Tuama. 15 Ia-mo to nambei katuwua ri sumawee to natida ri suruga bo ri dunia. 16 Yaku nosambaya ri Allatala to neliu mpuu kuasa-Na, bona lako ri kuasa-Na ee Ia mampakaroso rara-mi ante Inosa-Na, 17 nangkajadika lako ri peparisaya-mi, i Kristus kana matida ri rara-mi. Yaku nosambaya bona katuwu-mi nakuasai nu towe ni Kristus, pade towe-Na ee molari mandala ri rara-mi, 18 bona ikomi moroa ante sumawee todea nu Allatala ntanina majadi manguncani mpuu-mpuu, bakote neliu mpuu, pade tado naria kaopuana kabete towe ni Kristus si komi. 19 Yaku mbii nosambaya bona ikomi mamala manguncani towe ni Kristus, noudamo tado rapakule manguncani pura. Ante ee-mo rara pade katuwu-mi kana maponu ante inggu nu Allatala to nagana mpuu. 20 Ante kuasa nu Allatala to nobago ri rara-ta, Allatala namala nampowia neliu-liu lako ri sumawee to mamala ta-perapi bo ta-pekiri. 21 Jadi, kameimo sumawee todea-Na mampemabose-Ya mopamula lako ri tempo ei duuna masae-sae, sabana nuanu to nipowia ni Yesus Kristus. Amin.