Sura ni Paulus ri Todea nu Allatala ri Efesus
Tabe
1
1 Sura ei lako si yaku, i Paulus. Yaku najadi suro ni Yesus Kristus nantutu dota nu Allatala. Sura ei nipakatu ri todea nu Allatala to namparisaya i Kristus Yesus ri ngata Efesus. 2 Towe rara bo kasanaa lako ri Allatala Tuama-ta pade lako si Pue Yesus Kristus mamporoasi komi.Kasugia lako ri suruga ri tou-tou to nipelisi
3 Kamei-tamo mangune Allatala, Tuama nu Pue-ta i Yesus Kristus. Sabana Ia nantiroi-ta ante sumawee rasi lako ri suruga, apaa ikita nosaongu rara ante i Kristus. 4 Sintou tadopa nipajadi nu Allatala dunia ei, nipelisi-tamo nu Allatala ante dala nampoposangkani-ta ante i Kristus bona ikita majadi todea-Na to nipatani, pade matuwu ante tado maria kasalaa ri ngayo-Na. 5 Apaa Allatala nampotowe-ta, eemo sabana lako ri paramulana impia, nipakatatapu-Namo nampelisi-ta majadi ana-ana-Na. Nuanu ee nipowia nu Allatala ri rara ngkamate ni Yesus Kristus, apaa ee-mo to nipodota-Na. 6 Ikita masipato mangune Allatala apaa niwei-Namo towe rara-Na to mpuu-mpuu nepakamoleara to nadea mpuu si kita, ri rara ni Yesus Kristus, Ana-Na to nipotowe-Na ee. 7 Sabana kamate ni Kristus, nipakabebasi-tamo nu Allatala lako ri suku nu jeko, batuana niampungi-Na-tamo lako ri jeko-jeko-ta. Pade nipowia-Na iwee apaa ikita nipotowe mpuu-Na, 8 pade towe-Na ee niwei-Na ante nelabi-labi si kita, nantutu kapandea bo dota rara-Na. 9 Nipanotosimo nu Allatala si kita liwo-Na to nipontoliro-Na lako impia. Nantutu dota dodo-Na, Allatala nampakatatapu lako ngkoulu bona liwo-Na ee napadupa ni Kristus. 10 Liwo-Na ee ande maratapa tempona, i Kristus kana majadi topangkeni to mopasangkani ngila ngaya nuanu to naria ri suruga bo ri dunia.
11 Allatala nampowia ngila ngayana nantutu dota dodo-Na pade pobotusi dodo-Na. Lako ri paramulana nipelisi-Na ka-mo majadi todea-Na to nosaongu rara ante i Kristus. 12 Nangkajadika ikami to nokoulu ntoto nesarumaka si Kristus mamala mangune-Ya apaa nabete mpuu kuasa-Na.
13 Iwee mbii ikomi. Ikomi najadimo todea nu Allatala, tempo-mi namparonge petetesi nu Allatala, ri rara Kareba Belo to nampakasalama komi. Ikomi neparisaya si Yesus Kristus, ee-mo sabana Allatala nambei Inosa Gasa nu Allatala to nitipa-Na si komi majadi pampetonondi bakote ikomi najadimo todea nu Allatala. 14 Apaa Inosa Gasa nu Allatala naria si kita, jadi tempo ei mbii ikita mamala mamparisaya bakote ngoni Allatala mpuu-mpuu kana mampakabebasi-ta lako ri dunia to nadaa apaa ikita todea-Na, bona mangune Allatala apaa nabete mpuu kuasa-Na.
Sambaya bona manoto rara nancambelai pampemabose i Kristus
15 Jadi, pamparonge-kupa bakote ikomi mpuu-mpuu namparisaya i Pue Yesus, pade bakote ikomi nampotowe sumawee todea nu Allatala, 16 tado nabotu-botu-ku nosukuru ri Allatala nancambelai komi. Nikasangai oa-ku sanga-mi tempo-ku nosambaya. 17 Niperapi-ku ri Allatala, Tuama to nakuasa mpuu to nipenombai ri rara sanga ni Yesus Kristus, Pue to nitutu-ta, bona Ia mambei Inosa-Na si komi. Pade Inosa Gasa nu Allatala mampakanoto rara-mi pade mampopanguncanika Allatala si komi duuna ikomi mpuu-mpuu manguncani Allatala. 18 Niperapi-ku bona Allatala mampakanoto pekiri-mi bona mabaa, bona mincani nuapa to mamala mi-sarumaka lako ri Allatala to nampokio komi. Pade bona mi-ncani beiwa kabelo pade kadea mpuu nu rasi-rasi to nipasadia nu Allatala ri todea-Na, 19 pade nabete mpuu kuasa nu Allatala to niwei-Na si kita to neparisaya. Kuasa nu Allatala ee kuasa to naroso mpuu, 20 to nipake-Na nopatuwu mpanculi i Yesus Kristus lako ri kamatea pade nambeikaka-Ya poncundaa to nalangko mpuu noroa ante Allatala ri suruga.
21 Isee-mo i Kristus noparenta ante kuasa to neliu kabetena lako ri kuasa nu topoparenta, tonakuasa, pade topangkeni. I Kristus tado kawule nakuasa ri tempo ei ngkola, agiana ri tempo ngkapuri mbiina. 22 Allatala nowia ngila ngayana ee natundu si Yesus Kristus, pade nambei i Yesus Kristus ri todea nu Allatala bona majadi woo nu sumawee ngila ngayana. 23 Pade ikita todea nu Allatala nirapaika ewa woto ni Kristus to nampeganai sumawee ngila ngayana.