Pedederi-pedederi kaopuana
13:1-10
13
1 Ei katolungkanina-kumo namei si komi. ri rara Buku Nagasa nitulisi: “Butu ngaya nu kara-kara kana rapakaroso nu rodua ba totolu sabi, bona kara-kara ee mamala ratangara.” 2 Ri tou-tou to impia nowia jekomo, pade tou-tou ntanina, nipopatora ncala-ku ra-mo impia tempo-ku namei si komi karongkanina. Jadi tempo-ku nakawao lako si komi, ku-popatora nculi mbii komi bakote ande marataki-ku ngoni, tado namo saduaa-ra mamala mabebasi lako ri suku. 3 Kana ku-weikaka pura komi sumawee popadupa to nipodota-mi, bakote i Kristus mpuu-mpuu nololita si yaku. Tado malente-Ya si komi. Ia kana mampopakalio kuasa-Na ri tongo-tongo-mi. 4 Nalente ami-Yada tempo-Na ni salibkan, agiana ngkapuri ei-Ya natuwu sabana kuasa nu Allatala. I kami mbii nalente ri rara ngkatuwu-ka nosaongu rara ante i Kristus, agiana tempo-ka mampongayo komi, i kami najadi naroso noroa ante i Kristus sabana kuasa nu Allatala. 5 Pekutanamo koro dodo-mi, ba mpuu-mpuumo komi natuwu najadi topeparisaya si Kristus? I komi kana manguncani bakote i Kristus Yesus nokuasai rara-mi. Apaa ande tado nikuasai ni Kristus rara-mi, batuana tado mpuu-mpuu komi namparisaya-Ya. 6 Ku-sarumaka komi manguncani bakote i kami napande nampowia bago to niparisaya si kami. 7 I kami nosambaya ri Allatala bona nemo mowia nuanu nadaa komi. Tado bona mampopakalio bakote i kami napande nampowia bago to niparisaya sikami, agiana bona i komi mowia nuanu to nipodota nu Allatala. Noudamo ikami niuli nadoyo, tado mangkia. 8 Tado mamala-ka mangewa nuanu nakono. I kami kawule mamala mowia banuapapa mantutu kakonoana. 9 I kami nadonu majadi malente, asala i komi maroso. I kami nosambaya bona magana mpuu katuwu-mi. 10 Ee-mo sabana pade nitulisi-kumo sura ei tempo-ku tadopa naria riolo-mi. Ande marata-ku damo ngoni, tadomo masarepa-ku si komi ante kuasa to niwei ni Pue si yaku. Kuasa ee niwei bona mampakaroso komi, tado bona mampakaropu komi.Petabe
13:11-13
11 Kaopuana, sarara-sarara-ku, i komi kana madonu, pade pesimbukuimo mampakabelo inggu-mi. Tarimamo sumawee pedederi-ku. I komi kana mosaongu rara pade matuwu mosingkabelo. Allatala to neliu towe-Na pade nepoposingkabelo ee kana mamporoasi komi.
12 Pombetabemo komi ante rara mpuu-mi ewa toposarara! Sumawee todea nu Allatala nopakatu tabe si komi.
13 I Pue Yesus Kristus mantiroi komi, Allatala mampotowe komi, pade Inosa Gasa nu Allatala mamporoasi komi sumawee.