I Paulus nantarima pangkalioaa pade popanotosi
12:1-10
12
1 Yaku kana mampomole oa koro-ku, noudamo tado naria lotuna. Agiana yaku mbii madota mampomole sumawee nuanu to nipopakalio ni Pue si yaku ri rara-ku bo ri rara nu pangipi-ku. 2 Sampulu aopo mpae naliu, naria sadua topeparisaya to nincanika-ku niongko nu Allatala nalou ri pearia to nalangko ntoto ri suruga. Tado nincani-ku ba nateongko mpuu-mpuuda woto-na ri suruga, ba kawule nuanu nipopakalioka ngkola-yada. Allatala ngkola nanguncani. 3 Sangkanipa ku'uli: Nincani-ku tou ee. Agiana, tado nincani-ku, ba ante woto-nada niongko nalou ri suruga, ba kawule nuanu to nipopakalio nu Allatala ngkolada. Allatala ngkola to nanguncani. 4 Tou ee ncamole-mole niongko nalou ri Firdaus pade nironge-na lolita to tado nipakule nu manusia nopasowa, bo nitagika manusia mopasowa. 5 Nuanu najadi ri tou ee ngkolada to madota ku-pomole, tado mampomole koro dodo-ku. Yaku kawule madota mampomole nuanu to nopanotosi kalente-ku. 6 Ande rapana yaku mbii madota mampomole banuapapa, tado madota-ku maboa. Yaku kana manguli nuanu nakono. Agiana nitahangi-ku rara-ku, bona tado maria to manguli bakote yaku neliu lako ri nuanu to nikalio-namo nipowia-ku ba to nironge-namo nipololita-ku.7 Bona tado gaga malangko rara-ku sabana sumawee nuanu to neliu mpuu to nipopakalio nu Allatala si yaku ee, niweikaka-ku sangaya dua ri koro-ku ewa rui netosu. Dua ee nirapaika ewa suro nu Mbagou Seta to nampaduasi-ku bona tado malangko rara-ku. 8 Tolu ngkani-ku nekakae si Pue nerapi bona ralali dua ee lako si yaku. 9 Agiana nisonoi-ku ni Pue: “Yaku nampotowe-ko pade naganamo ee si-ko. Apaa tempo-mu tado naroso, iseemo rakalio karoso nu kuasa-Ku.” Ee-mo sabana pade nipobelo-kupa mampomole kalentea-kalentea-ku, bona kuasa ni Kristus masompo motalendusi-ku. 10 Jadi nadonu-ku ante kalentea-kalentea-ku. Yaku mbii nadonu ande sabana i Kristus yaku rapanawu, rapakasusa, radapa-dapa bo mantodosaka kapepaa. Apaa tempo-ku nalente, kuasa ni Kristus mpuu-mpuu nampakaroso-ku.
Pokantabu rara ni Paulus
12:11-21
11 Ewa todoyo mpuu-kumo nololita ei, agiana i komida to nampowia-ku ewa ei. Kakono-konona i komida mangune-ku. Apaa noudamo tado naria lotu-ku, tado mamala-ku nadagi nu suro-suro to neliu mpuu etu. 12 Sumawee kadupaa bo nuanu neliu mpuu pade sumawee bago-bago bete nipopakaliomo ante pancabara si komi bona mopadupa bakote yaku ei suro. 13 Tado nipopontani-ku komi ante todea nu Allatala ntanina. Pontaniana sangaya ngkola, tado naria-ku nampakasesa komi. Ande nuanu ee niuli nasala, merapi ampu-ku si komi sabana kasalaa ee. 14 Katolungkanina ei ku-mo mangkalouii komi, pade tado madota-ku mampakasesa komi, apaa tado gagu-mi to nipodota-ku, agiana koro-mi. Apaa tado ngana-ngana mampopaeloka totua-na, agiana totuada mampopaeloka ana-ana-na. 15 Jadi, ante donu rara masadia-ku mambeika komi banuapapa to naria si yaku, ande mamala ante koro-ku mbii ku-weikaka komi. Ande yaku mpuu-mpuu nampotowe komi, nuapa pade saodi ngkola pampotowe-mi ku?
16 Nincani dodo-mimo bakote tado naria-ku nampakasesa komi. Agiana naria tou nanguli bakote yaku ei nebagiu, yaku namparata kauntua lako si komi apaa nibagiu-ku. 17 Nariamo komi nibagiu nu tou to nitudu-ku malou si komi, nangkajadika nampakauntu koro-ku? 18 Nitudu-kumo i Titus nalou si komi, pade nitudu mbii-ku sarara topeparisaya ntanina mamporoasi-ya. Naria i Titus nangala kauntua lako sikomi? Nincani-mida bakote i kami rodua ei patuju-ka nobago nasimbei pade noinggu nasimbei mbii. 19 Nipekiri-mi sinungka ei-ka nampesimbukui mantunduka koro-ka ri ngayo-mi? Tado ee patuju-ka. Nincanida nu Allatala bakote sumawee nuanu niuli-ka ee nantutu dota ni Kristus. Pade sumawee nuanu nipowia-ka bona mampakaroso kaparisayaa-mi. 20 Apaa nokantabu rara-ku ande tempo-ku mampotomuka komi ngoni, ku-rata komi tado masimbei ewa nuanu to nisarumaka-ku, pade i komi mbii mamparata-ku tado masimbei ewa nuanu to nisarumaka-mi. Nemo-nemo ngoni maria tou mombewiko, masingki rara, masunca, mampekiri koro dodo, mombepanawu, mombe patuju, malangko rara pade mampakagesoa. 21 Naeka-ku nemo-nemo tempo-ku marata ngoni Allatala mampakaeya-ku ri ngayo-mi, pade yaku kana mokeo apaa nadea riolo-mi to najeko impia, tadopa nobali bo tado neuntu nogou sala, nowia nuanu narumu bo nuanu to tado masipato rapowia.