Topobago-topobago ri potipa nabou
3
1 Nipekiri-mi ikami nangune dodo koro-ka? Ikami tado nasimbei ante basangkia dua tou to namei si komi pade nampopesuwuka komi sura peune, ba namperapi sura peune lako si komi. Tado niparalou-ka sura ewa ee. 2 Ikomi dodomo to najadi sura peune-ka, to natetulisi ri rara-ka pade mamala rancani bo rabasa nu sumawee tou. 3 Isira dodo mbii mamala mangkalio bakote ikomi najadi sura to nitulisi ni Kristus, to nikeni-ka si komi. Sura ee tado nitulisi nampake tinta, agiana nitulisi ante Inosa Gasa nu Allatala to natuwu, tado mbii nitulisi ri wongko watu potulisia, agiana nitulisi ri rara nu Manusia. 4 Ikami nabia nololita ewa ee apaa ikami namparisaya Allatala sabana nuanu to nipowiamo ni Kristus si kami. 5 Tado naria dala-ka manguli bakote ikami nampakule mowia bago ei, agiana Allatala-da to nambei pampakule ee si kami. 6 Ia-mo to nambei pampakule si kami nobago ri rara nu potipa to nabou. Potipa to nabou ee tado atura to nitulisi, agiana lako ri Inosa Gasa nu Allatala, apaa atura to nitulisi ee mangkeni kamatea, agiana Inosa Gasa nu Allatala nambei katuwua duuna masae-sae. 7 Tempo nu potipa nasae ee nipowia pade nitulisi ri watu, pewanta lako ri Allatala nabaa mpuu nampaindo lence ni Musa. Pewanta ee nerangkila mpuu, nangkajadika tado nipakule nu to Israel nangolole lence ni Musa, noudamo nalipomo pewantaa ee. Jadi, ande tempo nu potipa nasae ee nipowia, nabete mpuu kakuasaa nu Allatala nikalio, 8 natantumo meliu ntotopa kabaa nu pewanta-Na rakalio ri rara mpobago nu Inosa Gasa nu Allatala. 9 Ande ri potipa to nangkeni suku ri manusia, pewanta lako ri Allatala ni kalio, meliu ntotopa kabaa nu pewanta-Na ri potipa nabou to nampoposingkabelo mpanculi manusia ante Allatala. 10 Potipa nasae ee impia niuli nabaa mpuu pewantana. Agiana ande rapasimbei ante kabaa pewanta potipa nabou, mamalamo rauli tadomo naria pewanta nu potipa nasae ee. 11 Apaa potipa nasae ee singoni ngkola kasae nu pewantana. Agiana pewanta nu potipa nabou, natida duuna masae-sae.
12 Apaa ikami nancarumaka potipa nabou ee, ee-mo sabana pade nabia-ka nampopowole Kareba Belo. 13 Ikami tado ewa i Musa to notalibungkuni lence-na bona tado rakalio nu to Israel pewanta lako si Pue to kasae-saeaa nalipo lako ri lence-na. 14 Pekiri nu to Israel ee natewuntamo. Duuna ngkapuri ei mbii ande rabasa-ra potipa nasae ee, tado nincani mpuu-mpuu-ra batuana, apaa pekiri-ra natetalibungkuni. Potalibungkuni pekiri ee kawule mamala ralali ande tou ee mosaongu rara ante i Kristus. 15 Duuna ri eo ei mbii, ande rabasa-ra buku ni Musa, potalibungkuni ee naria dapa oa nampawunta pekiri-ra. 16 Agiana ande megolimo rara-ra si Pue, potalibungkuni ee kana malali lako ri tou ee. 17 To niuli i Pue ei, Ia-mo Inosa Gasa nu Allatala. Inosa Gasa nu Allatala ee-mo to mamala mampakabebasi-ta. 18 Jadi, tadomo naria oa nuanu notalibungkuni lence-ta, pade ikita sumawee nampopakalio kabaa pewanta ni Pue ri rara ngkatuwu-ta. Kabaa pewanta ee narata lako si Pue, ee-mo Inosa Gasa nu Allatala. Inosa Gasa nu Allatala ee-mo to nobali katuwu-ta majadi masimbei ewa i Pue Yesus, bona mantambei ntotopa kabaa pewanta-Na rakalio ri katuwu-ta.