Gagu nagasa ri rara nu kura tana
4:1-15
4
1 Tado nasue rara-ka nampowia bago ei, sabana Allatala to nambeikaka-ka bago ei lako ri kadoli nu rara-Na. 2 Tado nadota-ka nantutu inggu-inggu to niwunika to nepakaeya. Tado nebagiu-ka bo nobalibeo lolita nu Allatala. Ikami aga nopanotosi nuanu to nakono, bona rancani ri rara nu sumawee tou bakote ikami mamala raparisaya. 3 Ande nariadapa to tado nanguncani Kareba Belo to niparata-ka ei, isira ngkolamo to kana rapakaropu. 4 Mbagou Seta to nakuasa ri dunia tempo ei nowunta pekiri nu tou-tou to tado neparisaya ee. Ia-mo to nantolawani-ra bona tado mamala rakalio-ra pewanta nu Kareba Belo nancambelai pampemabose i Kristus to nasimbei ante Allatala. 5 Kareba to niparata-ka ee tado kareba nancambelai koro dodo-ka, agiana kareba nancambelai i Yesus Kristus, bakote Ia-mo i Pue, pade ikami ei-mo batua-mi nantutu dota ni Yesus. 6 Apaa Allatalamo to nanguli: “Lako ri rara nu kadediana kana meumba kabaasana,” Ia mbii-mo to nampopeumba kabaasa ri rara-ta, bona pekiri-ta majadi mabaa bona manguncani kabaasa lako ri Allatala to newanta ri lence ni Kristus. 7 Ikami nantarima gagu nagasa ee, pade niboli ri woto-ka to nirapaika ewa kura tana to tado naroso. Nuanu ee najadi bona mopanotosi bakote kuasa to nabete mpuu ee narata lako ri Allatala, tado lako si kami. 8 Ri rara nu ngila ngayana ikami niduasi, agiana tado nateparumpisi-ka. Naoso-ka naingu, agiana tado naopu rara-ka. 9 Ikami niduasi nu tou, agiana tado nipaleisi-ka nu Allatala. Noudamo naoso-ka ninampa, agiana tado namate-ka. 10 Riumba-umba-ka malou, nirasai oa-ka kapepaa ewa to nirasai ni Yesus tempo-Na nipatesi. Nuanu ee najadi bona sumawee tou mangkalio bakote i Yesus natuwu ri rara-ka. 11 Sinungka-ka matuwudapa, naria oa to madota mopatesi-ka sabana i kami nantutu i Yesus. Nuanu ee najadi bona katuwu ni Yesus manoto rakalio ri rara ngkatuwu-ka to mamala mamate ei. 12 Jadi, ikami samata nampongayo kamatea oa, agiana nadonu rara-ka apaa ikomi kana mantarima tuwu mabelo duuna masae-sae.
13 Ri rara Buku Nagasa nitulisi: “Yaku neparisaya, ee-mo sabana pade nololita-ku.” Iwee mbii ante ikami. Ikami nololita sabana neparisaya-ka. 14 Niparisaya-ka bakote Allatala to nopatuwu mpanculimo i Pue Yesus, kana mopatuwu mpanculi mbii-ka moroa-roa ante i Yesus, bona ikita sumawee mamala mokongkore ri ngayo nu Allatala. 15 Sumawee kapepaa to nirasai-ka ee, nangkeni kabeloa si komi. Apaa ande mantambei kadea nu tou mamparasai towe nu Allatala, mantambei mbii kadea nu tou mosukuru si-Ya. Ante nuanu ee-mo Allatala rapemabose.
Nemo masue rara, tempo mampongayo kamatea
4:16-5:10
16 Ee-mo sabana tado nasue rara-ka, noudamo woto-ka kalente-lentea, agiana butu eona nantambei karoso nu rara-ka. 17 Apaa kapepaa ngkapuri ei nalingaa pade kawule singoni ngkola nirasai-ka. Nuanu ee kana mangkeni kasanaa to meliu mpuu si kami duuna masae-sae. Kasanaa ee neliu mpuu ande rapasimbei ante kapepaa ee, 18 apaa ikami tado nampeirara nuanu to namala nikalio, agiana nuanu to tado namala nikalio. Nuanu to namala nikalio ee singoni ngkola, agiana nuanu to tado namala nikalio ee bate-batena duuna masae-sae.