5
1 Nincani-ta bakote ande woto-ta to nirapaika bambaru ri dunia ei ragerosimo, Allatala kana mopasadiaka-ta saongu sou ri suruga to matida duuna masae-sae, to nipowia dodo nu Allatala. Sou ri suruga ee-mo woto-ta to nabou. 2 Ri rara nu bambaru-ta ee, i kita samata nekakae apaa nalentora mpuu-ta madota meari ri sou-ta ri suruga ee. 3 Apaa ande ta-ratadamo sou-ta to nabou ee, mamala rauli i kita nowarumo, tadomo nolendo-ta. 4 Sinungka-ta neari ri rara nu bambaru-ta ri dunia ei, ikita nekakae apaa nantomo nuanu nikolo-ta. Tado ba madota-ta mawia woto-ta lako ri dunia ei, agiana sabana madota raweika woto nabou lako ri suruga, bona woto-ta to mamala mamate ee rasambei ante woto to natuwu duuna masae-sae. 5 Allatala dodomo to nampakasadia-ta mantarima woto nabou ee, pade nambei Inosa-Na si kita bona mampakaroso bakote sumawee nuanu to nitipa nu Allatala kana madupa.6 Eemo sabana naroso oa rara-ka. Nincani-ka bakote sinungka-ka matuwu ante woto-ka ri dunia ei-dapa, nakawao-ka lako ri sou to ka-pearii moroa ante i Pue. 7 Apaa ikami natuwu nantutu nuanu to niparisaya-ka, tado nantutu nuanu nikalio. 8 Ee-mo pade naroso rara-ka. Nipobelo-kapa mawia lako ri woto-ka ei, bona mamala moroa ante i Pue. 9 Jadi nipesimbukui mpuu-ka nampakadonu rara-Na, ba ri tempo-ka neari ri dunia ei, ba tempo-ka meari moroa ante i Pue. 10 Apaa i kita sumawee kana rapopokongkore ri ngayo nu potangaraa ni Kristus, pade butu dua-ta kana mantarima nuanu masipato ta-tarima, mantutu nuanu nipowia-ta sinungka-ta natuwu ri dunia ei, nuanu to nabelo ba nuanu nadaa.
Pobago bona mangkeni posingkabelo
5:11-21
11 Nincani-ka nuapa batuana maeka si Pue, ee-mo sabana pade nipanotosi-kamo ri butu dua tou nancambelai koro-ka. Nincanida nu Allatala rara-ka, nisarumaka-ku ikomi nanguncani rara-ka. 12 Tado niperapi-ka bona miune-ka. Agiana ikami madota mambei komi loga mampoperingi-ka, bona mamala komi mampongayo tou to kawule nampoperingi nuanu to nikalio nu manusia, tado nampoperingi rara nu tou to mpuu-mpuu nabelo. 13 Ande ikami nikalio ewa to nawiwa, nuanu ee najadi bona rapemabose Allatala. Pade ande ikami nikalio ewa tonoto, nuanu ee najadi bona mangkeni kabeloa si komi. 14 Apaa aga towe ni Kristus to nokuasai katuwu-ka. Pade nincani mbii-ka bakote ande sadua tou nampomate sumawee tou, batuana ee bakote sumawee tou namatemo. 15 I Kristus nampomatemo sumawee tou, bona tou-tou to natuwu-dapa tado-mo matuwu mantutu dota dodo, agiana mantutu dota ni Kristus to namatemo bo nipatuwu mpanculika-ra.
16 Ee-mo sabana, tadomo nadota-ka nampareke tou nantutu pekiri nu manusia. Ikami dodo mbii impia naria nampareke i Kristus ewa ee, agiana ngkapuri ei-pa tadomo ewa ee. 17 Jadi, tou to nosaongu raramo ante i Kristus, mpuu-mpuu najadi manusia boumo. Nuanu nasae tadomo naria, sumaweena najadi naboumo. 18 Sumaweena ee nipowia nu Allatala. Ri kamate ni Kristus nampoposingkabelo mpanculi-ta ante Allatala, pade Allatala mbiimo to nambei-ta bago bona mangkeni tou-tou manculi ri Allatala. 19 Ikami nampopowole bakote ante kamate ni Kristus, Allatala nampoposingkabelo mpanculi manusia ante Ia. Tadomo nireke-Na sumawee kasalaa-kasalaa to nipowia nu manusia. Pade i kami-mo to nitudu nu Allatala mampopowole kareba ee.
20 Ikami ei-mo suro-suro ni Kristus. Lolita to niuli-ka si komi ee lolita nu Allatala to niuli-Na si kami. Jadi ante kuasa ni Kristus, ka-perapi mpuu-mpuu si komi bona mosingkabelo mpanculimo ante Allatala. 21 I Kristus tado najeko, agiana Allatala nampowia-Ya nangkolo sumawee jeko-ta, bona mosingkabelo mpanculi-ta ante Allatala sabana posaongu rara-ta ante i Kristus.