I Paulus i rara nu pobagoa-na
6:1-10
6
1 Apaa ikami nobago noroa-roa ante Allatala, ka-perapi mpuu-mpuu nemo mi sapa-sapai kabelo rara nu Allatala ee. 2 Ri rara nu Buku Nagasa, Allatala nanguli:“Ri tempo to Ku podota, kana Ku ronge pekakae-mi,
pade ri eo Ku mepakasalama, kana Ku tulungi komi.”
Kakono-konona, eimo tempo to nipodota ee. Kakono-konona, eo ei-mo eo pepakasalamaa ee.
3 Tado madota-ka pobagoka ei rasalai. Ee-mo sabana ikami nampesimbukui bona tado motance-ka ba si yema-yema mowia nuanu ee. 4 Pegoliana, ri rara nu ngila ngayana, ikami nopanotosi bakote ikami ei batua-batua nu Allatala. Apaa, sumawee ngaya nu kapepaa nitodosaka-kamo ante nancabara. 5 Ikami niduasi, nitarungku, pade nidulu, ikami nobago ntomo, naoso-ka tado naleta pade naoso mbii-ka tado naria kondia-ka. 6 Ante kabula nu rara, nabija, nancabara, pade ante belo rara, ikami nopanotosi bakote ikami batua nu Allatala. Pade nancarumaka mbii ri petulungi nu Inosa Gasa nu Allatala, pade ante towe mpuu-mpuu, 7 pade ante nampopowole kareba lako ri Allatala bo ante kuasa nu Allatala, ikami nopanotosi bakote ikami ei batua-batua nu Allatala. Ikami nangkakamu dota nu Allatala najadi parewa mpoiwali bo pantunduka-ka koro-ka. 8 Ikami nibila, agiana nikanene mbii, niune, bo nipanawu mbii. Noudamo nanoa-ka, agiana niuli naboa. 9 Niuli tado natolele sanga-ka, agiana i kami nincanika nu sumawee tou. Niuli namate-kamo, ntanono natuwu-kadapa. Noudamo niduasi-ka, tado namate-ka. 10 Noudamo nipakatudu mbuku rara-ka, agiana nadonu oa mbii-ka. Ikami nikalio netowei mpuu, agiana nadeamo tou nipakasugi-ka. Ikami nikalio tado nakariaa, agiana naria pura ngila ngayana si kami.
Nemo oa maria tado meparisaya
6:11-7:1
11 Sarara-sarara ri Korintus! Niuli pura-kamo nuanu ri rara-ka si komi. Sumawee isi rara-ka nisuwuraka pura-kamo. 12 Tado niwunta-ka rara-ka si komi, agiana i komi-da to nowunta rara-mi sikami. 13 Yaku nololita si komi ewa to nampololitaka ana-ana dodo-ku. Jadi beamo rara-mi si kami. 14 Nemo madota komi moroa ante tou-tou to tado namparisaya i Yesus. Tou nabelo bo tou nadaa tado mamala moroa, pade kabaasana tado mamala mogalo ante kadedia. 15 I Kristus tado mamala rapasimbei ante Mbagou Seta. Tou neparisaya tado mamala moroa ante tou tado neparisaya. 16 Nuapa kasimbeiaa nu sou nu Allatala ante sou penombaa ri karampua? I kita ei sou nu Allatala, Ia-mo Allatala to natuwu ewa tonitulisi ri rara Buku Nagasa:
“Yaku kana matida riolo-ra,
pade matuwu moroa-roa ante isira.
Yaku kana majadi Allatala-ra,
pade isira kana majadi todea-Ku.
17 Ee-mo sabana, pawiamo tou-tou to tado nanguncani Allatala ee,
pade popatanimo komi lako si sira.
Nemo mi-tui nuanu to narumu,
bona kana Ku tarima komi.
18 Yaku kana majadi Tuama-mi,
pade ikomi kana majadi ana-ana Ku,
ewa ee-mo lolita ni Pue To Nakuasa Mpuu.”