7
1 Sarara-sarara to nipotowe-ku! Sumawee potipa ee niwei si kita. Ee-mo sabana i kita kana mampakarawa koro-ta lako ri sumawee nuanu to nampakarumu rara pade woto-ta. Ikita kana maeka ri Allatala, pade mambei sumawee katuwu-ta si-Ya.Kasanaa nu rara maopupa matudu mbuku rara
7:2-16
2 Tarima-kamo ri rara-mi. Tado naria kasalaa-ka ba si yema-yema, pade tado naria namo saduaa mpuumo tou nipakarugi-ka. Tado naria-ka nangala kauntua lako ba si yema-yema mpuumo. 3 Yaku nanguli ewa ee, tado bona mampomasala komi. Apaa ewa nuanu to niuli-kumo impia, i kami nampotowe mpuu komi, pade tado mogaa-ta tempo-ta matuwu ba mamate mpuumo. 4 Yaku namparisaya mpuu komi. Nadonu mpuu rara-ku si komi, noudamo nadea kasusaa nirasai-ka, rara-ku nawoe mpuu nipowia-mi. Nadonu mpuu rara-ku.
5 Tempo-ka narata ri Makedonia mbii, tado naria loga-ka nampopeuntu lenge-ka. Lako riumba-riumba kasusaa namparumpa-ka, lako ri tou ntani topepobungkaka, pade lako ri rara-ka nesuwu eka. 6 Agiana Allatala nampakaroso rara nu tou to nasuemo, pade nampakaroso mbii rara-ka ante karata ni Titus. 7 Rara-ka nawoe tado kawule nikaratai ni Titus ngkola, agiana apaa ia mbii nopasibali beiwa kawoe nu rara-na nipowia-mi. Niuli-na si kami bakote nalentora mpuu komi madota motomu ante yaku, pade ikomi nancoso rara ri inggu-mi impia pade ngkapuri ei madota mamposambira-ku. Nuanu ee nampakantambei ntoto kadonu nu rara-ku.
8 Noudamo isi sura-ku nampakatudu mbuku rara-mi, tado nisoso-ku rara-ku notulisi sura ee. Nisoso ami-kuda rara-ku saodi, tempo-ku nanguncani bakote sura-ku ee nampakatudu mbuku rara-mi, noudamo singoni ngkola. 9 Agiana tempo ei nadonumo rara-ku. Kadonu-ku ee tado sabana nipakatudu mbukuka-ku rara-mi, agiana lako ri katudu mbuku nu rara-mi ee nowia komi nancoro. Katudu mbuku nu rara-mi ee nantutu dota nu Allatala. Jadi tado nipakarugi-ka komi. 10 Apaa katudu mbuku nu rara nantutu dota nu Allatala nangkeni pancoro bona mamparata kasalamaa komi. Tado mancoso rara komi. Katudu mbuku nu rara sabana nantutu dota nu manusia aga mekeni ri kamatea. 11 Peiraramo nuapa bunduna si komi katudu mbuku nu rara to nantutu dota nu Allatala. Bunduna ee i komi mpuu-mpuu madota mopadupa bakote tado nasala komi. I komi najadi nampodaa jeko, i komi naeka, i komi nalentora motomu ante yaku, najadi nasagena rara-mi, i komi nadotamo nosuku tou nasala. Ri rara nu ngila ngayana ei nipopakalio-mimo bakote tado nasala komi.
12 Jadi, noudamo nitulisi-kumo sura ee, tado nitulisi-ku bona mampomasala tou to nowia sala ee. Tado mbii nitulisi-ku sabana tou to nipakarugi nu to nowia sala ee. Yaku notulisi sura ee bona ri ngayo nu Allatala manoto rara-mi bakote nabete mpuu towe-mi si kami. 13 Ee-mo sabana pade nawoe rara-ka.
Ntanina lako ee, nadonu mpuu rara-ka namparonge bakote i komi nampakadonu rara ni Titus, pade nampakaroo rara-na. 14 Nipomole ami-kumo komi si Titus. Nosukuru tado nipakaeya-mi ku. Sumawee nuanu niuli-kamo si komi ee nakono. Iwee mbii nuanu to nipomole-ka si Titus nancambelai komi ntanono nakono mpuu-da. 15 Nantambei ntotomo pampotowe komi ni Titus tempo-na nantora bakote i komi nantutu sumawee nuanu niuli-na. I komi nantarima-ya ante pebila bo natundu si-ya. 16 Nadonu mpuu rara-ku, sabana i komi mamala raparisaya ri rara nu ngila ngayana.