Pobago ante towe
8:1-15
8
1 Sarara-sarara, i kami madota bona i komi manguncani mbii beiwa kabelo nu Allatala ri todea-Na ri propinsi Makedonia. 2 Noudamo nadea kapepaa to nitodosaka-ra, neliu mpuu kadonu-ra. Pade noudamo netowei katuwu-ra, agiana nadoli mpuu rara-ra. 3 Nikalio dodo-ku bakote i sira nambei tado kawule nantutu pampakule-ra, agiana neliu lako ri pampakule-ra. 4 Ante dota dodo-ra nerapi mpuu-mpuu si kami bona rawei-ra loga mantulungi todea nu Allatala ri Yudea. 5 Nuanu niwei-ra neliu kadeana lako ri nuanu nisarumaka-ka. Paramula ntotona nambei katuwu-ra si Pue, naopu ee si kami, nantutu dota nu Allatala. 6 Ee-mo sabana niperapi mpuu-ka i Titus bona manculiki-ya si komi. Ia-mo to nopamula bago nopasintobu petulungi-mi ee. Ee-mo pade nitudu-ka ya-mo mopapola bago ante towe ee. 7 Sumawee nuanu nipowia-mi neliu kabelona lako ri ntanina. Kaparisayaa-mi neliu mpuu karosona, neliu kapande-mi nololita, nincani mpuu-mpuu-mi pepatuduki to nakono. Nabete mpuu rara-mi mantulungi tou ntani, pade nabete mpuu towe-mi si kami. Jadi nabelo ntotopa ande mi-pesimbukui mantulungi tou to netowei ante madea ntoto mbiipa.8 Tado niparenta-ku komi kana mambei madea. Agiana bona mopanotosika komi beiwa ntoto kasagena nu tou ntani nantulungi singkapada manusia-na. Yaku mbii madota manguncani sudu riumba ntoto pepotowe-mi. 9 Apaa i komi nanguncani bakote i kita nipotowe mpuu ni Yesus Kristus, Pue-ta. Noudamo nasugi-Ya, agiana Ia nampopetowei koro-Na bona mangkeni belo si komi. Ante petowei-Na ee, i komi majadi masugi ri pangkalioaa nu Allatala.
10 Ei-mo pamparata-ku, sipatonamo komi mampakaopu bago to nipamula-mimo mpae naliu. Apaa i komimo to paramula ntotona nampekiri bo nopamula bago ei. 11 Jadi, papolamo bago-mi ante towe ee mantutu pampakule-mi. I komi kana masagena mampakaopu bago ee, ewa kasagena-mi impia noliwo mowia bago ee. 12 Ande madoli rara-mi mewei, natantumo Allatala kana mantarima pewei-mi ee mantutu nuapa to naria si komi, tado mantutu nuanu to tado naria si komi.
13 Tado naria patuju-ku mampakantomo kenia-mi pade mampakalingaa tou ntani, agiana bona tado mantomo sambira kenia-mi. 14 Tempo ei komi neliumo kagana ngkatuwu-mi, jadi masipatomo komi mantulungi-ra. Baneipia-pia ngoni ande i komi mbii makakuranga pade magana si sira, mamala-ra mantulungi komi, bona tado mantomo sambira katuwu-mi. 15 Ri rara Buku Nagasa naria nitulisi:
“Tou to nopasintobu nadea, tado naria peliuana
pade tou to nopasintobu saodi tado nakakuranga.”
I Titus nitudu
8:16-24
16 Nosukuru mpuu-ka ri Allatala sabana Ia nampakasagena rara ni Titus ewa ikami bona mantulungi komi. 17 Apaa tado kawule nipoio-na perapiaka, agiana ia mbii nasagena nantulungi komi. Ante dota dodo-na nalou nampotomuka komi. 18 Pade nitudu mbii-ka sadua sarara-ta to nibila mpuu nu todea nu Allatala sabana pobago-na nampopowole Kareba Belo, mamporoasi i Titus malou si komi. 19 Tado kawule ee, sarara-ta ee mbii nipelisimo nu todea nu Allatala isei mamporoasi-ka molumako malou ri Yudea mangkeni pengawa ee, bona rapemabose i Pue pade bona mi-kalio kadoli nu rara-ka netulungi.
20 I kami nainga mpuu bona nemo maria tou mampomasala-ka ri pangkeni-ka petulungi nadea poromuana ee. 21 Ikami madota manoro tado kawule ri ngayo ni Pue ngkola, agiana ri ngayo nu manusia mbii.
22 Nitudu mbii-ka saduapa sarara-ta ntanina mamporoasi ri Titus. Nadea ngkanimo nikalio-ka kabete nu rara-na nantulungi tou ntani. Pade tempo ei nabete mpuu rara-na mantulungi komi, apaa nisarumaka mpuu-na komi. 23 I Titus ei roa-ku sampobagoa bona mantulungi komi. Pade sarara-ta rodua ee, to namporoasi i Titus, i siraa ee to nitudu nu todea nu Allatala pade to nampakadonu rara ni Kristus. 24 I kami nancarumaka komi bona mampopakalio towe-mi si sira, bona sumawee todea nu Allatala manguncani bakote i komi nampotowe-ra pade nuanu nipomole-ka si sira nancambelai komi nakonoda.