Popasintobuka to Yerusalem doi
9:1-5
9
1 Kakono-konona tado-mo raparaluu mbii motulisi si komi nancambelai petulungi to nipakatukamo todea nu Allatala ri Yudea. 2 Nincani-kuda bakote i komi madota metulungi, pade nipomole-kumo komi ri tou-tou ri Makedonia. Niuli-ku si sira bakote nopamula lako ri pae naliu sarara-sarara ri Akhaya nasadia-ramo mambei petulungi-ra. Pade kasagena nu rara-mi newei, nampakasagenamo rara to Makedonia. 3 Noudamo ewa ee, yaku kana mantudu i Titus ante sarara-ta rodua ee mampotomuka komi. Jadi kana masadiamo komi mambei petulungi-mi, bona lolita-ku nampomole komi ri to Makedonia tado aga lolita boa. 4 Apaa ande maria to Makedonia mantutu-ku ngoni malou si komi, pade tadopa masadia komi, maeya mpuu-ka ngoni, apaa niuli-kamo si sira bakote masadiada komi metulungi. Pade i komi dodo mbii kana maeya. 5 Jadi ee-mo pade nitudu-kumo sarara-ta totolu ee mokoulu malou si komi bona moposintobu petulungi to nitipa-mi ee. Yaku nowia ewa ee bona ande marata-ku ngoni, petulungi-mi ee nasadiamo. Jadi manotomo rakalio bakote petulungi-mi ee niwei-mi ante donu rara, bo ante dota dodo-mi.Mambei ante donu rara nangkeni rasi
9:6-15
6 Toramo! Tou to nosawu saodi sawua, saodi ngkola mbii ulina na-tarima. Agiana tou to nosawu nadea, madea mbii ulina na-tarima. 7 Butu dua tou kana mambei ante doli rara-na. Nemo mambei ante dua rara ba rapasa-pasa damo, apaa Allatala nampotowe tou to nambei ante doli rara. 8 Allatala nakuasa mambei komi rasi to nadea mpuu, bona magana oa kaparalouaa-mi duuna mamala komi mowia ngila ngaya nuanu nabelo mantulungi tou ntani. 9 Ri rara Buku Nagasa nitulisi:
“Ia nobagi-bagi, Ia nambeikaka to netowei,
kabelo nu rara-Na natatapu duuna masae-sae.”
10 Allatala nopasadiaka topobonde sawua pade nopasadiaka-ta kondia. Ia mbii kana mopasadia bo mampakadea nuanu to mi-sawu, bona mantambei ntoto kadoli nu rara-mi 11 Allatala nambeikaka komi ngila ngaya kabeloa, nangkajadika komi nampakule nantulungi tou ntani ante doli rara. Ante nuanu ee, nadea tou nosukuru ri Allatala. 12 Apaa bago ante towe to nipowia-mi ei tado kawule mampeganai kaparalouaa todea nu Allatala, agiana mbii mampakadea tou mosukuru ri Allatala. 13 Lako ri bago ante towe to nipopakalio-mi ee, madea tou kana mangune Allatala, apaa nikalio-ramo katundu-mi ri Kareba Belo nancambelai i Kristus to niparisaya-mi ee. Isira mbii kana mangune Allatala sabana kadoli nu rara-mi nobagi-bagi si sira bo ri tou ntani nuanu to naria si komi. 14 Isira kana mosambayani komi ante towe, apaa nabelo mpuu rara nu Allatala si komi. 15 Ikita kana mosukuru ri Allatala sabana nabete mpuu rasi niwei-Na si kita!