Inggu ni Paulus
10:1-11
10
1 Naria basangkia dua riolo-mi to nanguli bakote yaku naeka ande mosintingayo ante i komi, agiana nabia ande mombekawaosi. Jadi, sabana kaede rara bo pancabara ni Kristus, 2 ku-perapi mpuu-mpuu, bona ande marata-ku ngoni iseturi, tado masarepa lolita-ku si komi. Apaa noliwo ami-kumo mangontika tou-tou to nanguli bakote i kami noinggu ewa tou to tado nanguncani Allatala. 3 Nakono amida bakote i kami ei natuwu ri rara dunia-dapa, agiana i kami natuwu tado nantutu patuju nu dunia ei. 4 Parewa-parewa mpoiwali to nipake-ka tado parewa mpoiwali nu dunia ei, agiana parewa mpoiwali nu Allatala to nakuasa. Ante parewa-parewa ee namala-ka nampakaropu pentidaa nu bali to naroso. 5 Ikami nampakapua pentidaa nu bali to nipowia ante kalangko rara nu manusia to nampalawa panguncani ri Allatala. Ikami notawani pekiri nu tou-tou pade nampowia-ra natundu si Kristus. 6 Pade ande matundumo komi ante rara mpuu-mi, masadia-kamo mosuku sumawee tou to tado natundu.7 Ikomi mangkalio nuanu ri ngayo-mi. Yema-yema mampangaku mpuu-mpuu i Kristus najadi Pue-na, ia mbii kana manguncani bakote ikami mbii nampangaku i Kristus najadi Pue-ka, nasimbei ewa ia. 8 Tado maeya-ku ande ku-popeliu gaga mampomole kakuasaa to niwei ni Pue si kami, apaa kakuasaa ee niwei bona mampakaroso kaparisayaa-mi tado bona mampakagero kaparisayaa-mi. 9 Tado madota-ku ande ikomi manguli bakote yaku noparaeka komi ante sura-sura-ku. 10 Apaa naria tou nanguli: “Sura-sura ni Paulus nasarepa bo neparaeka, agiana ande maria-ya ri tongo-tongo-ta, nalente-yamo pade lolita-lolita-na natawoo!” 11 Tou-tou to nanguli ewa ee kana manguncani bakote ande maria-ka ri tongo-tongo-mi, inggu-ka nasimbei ewa nuanu to nitulisi-ka ri sura-ka.
Pamparata ni Paulus nancambelai koro-na
10:12-11:6
12 Tado mabia-ka manguli koro-ka nasimbei ante tou to nangune dodo koro-ra. Nadoyo mpuu-ra! Isira nangune dodo koro-ra nantutu pekiri-ra pade nampasimbei nuanu ee ante koro dodo-ra. 13 Agiana ikami tado mampomole nuanu ri sawaliku nu bago to niwei si kami. Ikami kawule madonu ri bago to niweimo nu Allatala si kami. Pade i komi mbii nesua ri rara nu bago ee. 14 Tado nilui-ka posioloa nu ngata Korintus to nipakatatapu ri rara nu pobagoa-ka. Ande rapana niliu-ka posioloa ee, natantumo tado marata-ka si komi. Kakono-konona, ikamimo to paramula ntotona narata nampopowole Kareba Belo nancambelai i Kristus si komi. 15 Ikami kawule nampomole bago to nipakatatapu-mo si kami, tado nampomole bago nu tou ntani to tado nipakatatapu ka-powia. Agiana nisarumaka-ka bakote tempo nu kaparisayaa-mi mentumbu, mamala-ka mowia bago to neliu betena ri tongo-tongo-mi. 16 Ante nuanu ee, mamala-ka mampopowole Kareba Belo ee mbii ri ngata-ngata ntani ante tado mampomole koro-ka ri pobagoa nipowia-ka ri ngata kabagoa nu tou ntani.