Pampangawa todea nu Allatala ri Yerusalem
16:1-4
16
1 Kapolana, yaku madota mampololita nancambelai popasintobu-mi doi rapopampangawa sarara-ta todea nu Allatala ri Yerusalem. Powiamo ee mantutu atura to niweika-ku todea nu Allatala ri Galatia. 2 Butu eo minggu, ikomi sore-sore mopatani doi-mi saganta mantutu dea nu pamparata-mi nopaelo. Bolimo doi ee ri sou-mi duuna marata-ku si komi, bona ri tempo ee tadomo mopasintobu oa doi komi 3 Ande marata-kudamo ngoni, ku-tududamo tou-tou to mamala mi-parisaya. Ku-weikaka-radamo sura rakakamua-ra, bona malou-ra mangkeni doi pengawa-mi ee ri Yerusalem 4 Ande mi-pekiri nabelo ntotopapa ante yaku malou, kana malou-ku mamporoasi-ra.Liwo ni Paulus
16:5-9
5 Tulou-kudamo si komi ande moliu-kupa ri Makedonia, apaa naria rara-ku moliu isee 6 Dota-ku, masae-ku saodi matida si komi, ba dunna maliu tempo nu lengi, bona mamala komi mantulungi-ku mopapola polumako-ku malou ri ngata ntanina. 7 Tado madotaku mampeseiki komi singoni ngkola. Ande napodota ni Pue, yaku madota matida masae saodi ante i komi. 8 Agiana yaku kana matida ri ngata Efesus duuna ri eo bete Pentakosta. 9 Apaa nadea kalogaa-ku isei mobago bona mangkeni kabeloa ri tou, noudamo nadea to nangewa-ku isei.
Basangkia ngaya pepopanguncanika
16:10-18
10 Ande marata i Timotius si komi, tarima belo-belo-ya bona tado maria nuanu napokaeka si komi, apaa ia mbii to nampobagoka i Pue nasimbei ewa yaku. 11 Nemo maria tou mampoewewe-ya. Agina i komi kana mantulungi-ya mopapola polumakoa-na ante sana rara, apaa yaku bo sarara-sarara todea nu Allatala ntanina nopea-ya isei. 12 Nancambelai sarara-ta i Apolos, basangkia ngkani-yamo moroa ante sarara-sarara todea nu Allatala ntanina nitudu-ku mampelei komi, agiana tadopa nadota-ya. Ande maria loga-na mabelo ngoni, kana tulou-yada.
13 Ikomi kana mainga pade pakaroso peparisaya-mi. Pakaroso rara-mi pade nemo maeka. 14 Sumawee nuanu to mi-powia, kana mi-powia ante towe. 15 Nincani-mimo i Stefanus sancou. Isiramo to paramula ntotona najadi topeparisaya ri Akhaya. Ante rara mpuu-mpuu-ra nobago nantulungi todea nu Allatala. 16 Ku-perapi si komi ante rara mpuu-ku bona mantutu peninini nu tou-tou ewa ee, bo tou-tou ntani to namporoasi-ra nobago. 17 Nasana mpuu rara-ku nikaratai ni Stefanus, i Fortunatus bo i Akhaikus, apaa isiramo najadi pancambei-mi namei si yaku. 18 Isira nampakadonu rara-ku bo rara-mi. Jadi ku-perapi si komi, bilamo tou-tou ewa isira ee.
Petabe
16:19-24
19 Todea nu Allatala ri Asia kodi nopakatu tabe-ra si komi. I Akwila, i Priskila bo todea nu Allatala to nosintobu ri sou-ra nopakatu mbii tabe ante rara mpuu-ra si komi sabana peparisaya-mi si Pue. 20 Sumawee todea nu Allatala isei nopakatu tabe-ra si komi. Pombetabemo komi ante towe ri rara nu saongu kaparisayaa.
21 Ante pale dodo-ku notulisi ei: Tabe lako si yaku, i Paulus.
22 Yema to tado mampotowe i Pue Yesus palambaka-yamo masilaka. Maranata, Pue-ka, karatamo.
23 Towe rara lako si Pue Yesus mamporoasi komi.
24 Yaku nampotowe komi sumawee to nosaongu rara ante i Kristus Yesus.