I Lazarus nipatuwu mpanculi
11:1-44
11
1 Naria sadua to nisanga i Lazarus neari ri ngata Betania noroa ante sarara-na i Maria bo i Marta. 2 I Maria ee-mo bangkele to nolanai paa ni Yesus ante lana wongi pade niparisi-na ante wulua-na. Sangkani tempo, naduamo i Lazarus. 3 Jadi, nipetetesiimo nu sarara-na bangkele rodua ee si Yesus: “Pue, sarara-ka to nipotowe-Mu ee nadua.” 4 Nirongepa ni Yesus petetesi ee, nanguli-Yamo: “Dua etu tado rapomate, nuanu ee najadi bona rapemabose Allatala, pade bona rapemabose mbii Ana-Na.” 5 Nipotowe amida ni Yesus i Marta, i Maria bo i Lazarus. 6 Agiana nirongepa ni Yesus kareba bakote nadua i Lazarus, nitungkei-Na roeyopa kasaena natida ri pearia-Na. 7 Naopu ee nanguli-Yamo ri ana-ana guru-Na: “Manculi-tamo ri Yudea.” 8 Nesonomo ana-ana guru-Na: “Guru, tadopa nasae to Yahudi radou madota mowunu-Ko ante watu, nuapa pade malouki mbiimo-Ko radou?” 9 Nesono i Yesus: “Saeyo sampulu rojaa kasaena. Tou to nolumako poeyona, tado matetancunu apaa nikalio-na kabaasa nu dunia. 10 Agiana tou to nolumako kawengina, kana matetancunu paa-na, apaa tado naria to nampakabaa dala-na.” 11 Iweemo lolita ni Yesus ri ana-ana guru-Na. Naopu ee nanguli mbii-Yamo: “Wega-ta i Lazarus naleta-mo, agiana Yaku kana malou mampopemata-ya.” 12 Nesonomo ana-ana guru-Na: “Pue, ande naleta-da i Lazarus, kana mabelo-da dua-na.” 13 Patuju nu lolita ni Yesus ee bakote namatemo i Lazarus. Agiana niuli nu ana-ana guru-Na i Lazarus ei naleta dodowee-da. 14 Ee-mo sabana pade nipanotosika lou-ramo ni Yesus, nanguli-Ya: “Namatemo i Lazarus. 15 Agiana nadonu-Ku tado naria isee tempo kamate-na, apaa kamate-na ee nangkeni belo si komi, bona mamala komi meparisaya. Jadi, bulawee ee malou-tamo mangkalio-ya.” 16 Pade nangulimo i Tomas to nisanga mbii Toporapi ri ana-ana guru ni Yesus ntanina: “Malou-ta mantutu-Ya, bona mamate mamporoa-Ya.”17 Karata ni Yesus ri Betania, bila aopo eomo i Lazarus nitana. 18 Ngata Betania ei najungku Yerusalem, rapa-rapana tolu kilo kawaona. 19 Nirata-ra isee nadeamo to Yahudi namei si Marta bo si Maria nampakawoe rara-ra sabana kamate nu sarara-ra ee. 20 Pamparonge ni Marta bakote mapara maratamo i Yesus, nesuwu-yamo nampotomuka i Yesus, agiana i Maria ri rara ncou dodo. 21 Pade nangulimo i Marta si-Ya: “Pue, ande naria-Ko isei, ketado mamate sarara-ku. 22 Agiana noudamo iwee, nincani-kuda bakote bulawee ee mbii, Allatala kana mambeikaka-Ko nuapa-pa to Muperapi si-Ya.” 23 Nangulimo i Yesus si Marta: “Sarara-mu etu kana matuwu mpanculi.” 24 Nesono i Marta: “Nincani-kuda i Lazarus kana matuwu mpanculi ande rapakatuwu nculi tomate ri Eo Kaopu nu Dunia.” 25 Agiana nanguli i Yesus si Marta: “Yaku-mo to mambei katuwua pade mampakatuwu mpanculi tomate. Tou to namparisaya-Ku kana matuwu mpanculi, noudamo namate-yamo. 26 Pade tou to natuwu, to namparisaya-Ku, tado mamate duuna masae-sae. Niparisaya-muda nuanu ee?” 27 Nesonomo i Marta: “Pue, niparisaya-ku bakote Iko-mo Ana nu Allatala, Mbagou Topepakasalama to kana marata ri dunia ei.” 28 Naopupa i Marta nanguli ewa ee, nanculi yamo ri sou nampokio i Maria, pade nantewei-ya: “Nariamo i Guru ee-ria, nipokio-Na ko.” 29 Namparonge ee, nagasi-gasimo i Maria neongko pade nalou nampotomuka i Yesus. 30 Tempo ee tadopa nesua ri rara ngata i Yesus, ri sawaliku nu ngata-Yadapa ri potomua-Na ante i Marta ee see. 31 Tou-tou to Yahudi to nampakawoe rara ni Maria ri sou ee, nangkalio i Maria neongko pade nagasi-gasi nesuwu, nalou-ramo nantutu-ya, apaa niuli-ra malou mokeo ri dayo-yada. 32 Naratapa i Maria si Yesus pade nangkalio-Ya, notumbukotumo i Maria ri ngayo-Na pade nanguli: “Pue, ande naria-Ko isei tempo ee, ketado mamate sarara-ku.”
33 Pangkalio ni Yesus i Maria nokeo pade tou-tou to Yahudi to namei namporoa i Maria ee mbii nokeo, nentuumo rara-Na. Nasusa mpuu rara-Na, pade nepekutana-Yamo si sira: 34 “Riumba dayo-na?” Nesono-ramo: “Tumei-Ko Pue, pade kaliomo.” 35 Pade nokeomo i Yesus. 36 Pade nangulimo tou-tou to Yahudi ee: “Kalio, nipotowe mpuu-Na i Lazarus.” 37 Agiana naria mbii basangkia dua tou riolo-ra nanguli: “To buro namala nekalio mpanculi nipowia-Na, nuapa pade tado namala nitagi-Na bona tado mamate i Lazarus?” 38 Nentuu mbiimo rara ni Yesus, pade nalou-Yamo ri dayo ni Lazarus. Dayo ee gua, pade wombona niwunta ante watu bete. 39 Nangulimo i Yesus: “Encumo watu etu!” Agiana nanguli i Marta sarara ntomate ee: “Pue, aopo eo ya-mo nitana. Nawoumo bata-na.” 40 Nangulimo i Yesus si Marta: “Niuli-Kumo si-ko: Ande meparisaya-ko, kana mu-kalio bakote nabete mpuu-da kuasa nu Allatala.” 41 Pade niencu-ramo watu ee. Naopu ee nitingaramo ni Yesus langi pade nanguli: “Tuama, Yaku nosukuru si-Ko, apaa nipetalingai-Mu Ku-da. 42 Nincani-Ku bakote Iko nampetalingai oa-Ku, agiana Yaku nanguli ei bona raronge nu tou-tou to naria isei, bona raparisaya-ra bakote Iko-da to nantudu-Ku.” 43 Naopu nanguli ewa ee, nongaremo i Yesus ante wotu narimbuku : “Lazarus, pesuwumo-ko!” 44 Pade nesuwu mpuumo i Lazarus lako ri rara dayo. Paa-na bo pale-na natebungu ante sompu-nadapa, pade lence-na natelowi ante suruba. Nangulimo i Yesus ri tou-tou to naria isee: “Bolesimo sompu-na etu bona mabebasi-ya molumako.”
Kasintundu mopatesi i Yesus
11:45-57
45 Nadea lako riolo nu tou-tou to Yahudi to namei nampelei i Maria negoli namparisaya i Yesus, sabana nangkalio kajadia ee. 46 Agiana basangkia dua-ra nalou ri to Farisi pade nopasibali nuanu to nipowiamo ni Yesus. 47 Ee-mo sabana to Farisi bo tobalia-tobalia ri matana noromu ante Topotangara Agama. Nanguli-ra: “Nuapa to kana ta-powia? Nadeamo kadupaa to nipowia nu tou ee. 48 Ande ta-palambaka oa-Ya, sumawee tou kana mamparisaya-Ya. Kaopuana ngoni maratamo surodado lako ri Roma mogerosi Sou nu Allatala pade moropui todea-ta.” 49 Agiana naria sadua lako riolo-ra to nisanga i Kayafas, to najadi Tobalia Bete ri tempo ee, nanguli si sira: “I komi tado nanguncani banuapa-pa. 50 Apa tado nanoto rara-mi bakote aginamo sadua tou mamate, aga nemo sumawee todea maropu.” 51 Kakono-konona i Kayafas nololita ewa ee, tado neumba lako ri pekiri dodo-na. Agiana apaa ia najadi Tobalia Bete ri tempo ee, noawili-yamo bakote i Yesus kana mangkamateka to Yahudi. 52 Pade tado kawule to Yahudi ngkola, agiana mbii bona mopasintobu bo mopasangkani ana-ana nu Allatala to nosimpogara. 53 Jadi, nopamula lako ri eo ee, nasintundu-ramo bona mopatesi i Yesus.
54 Ee-mo sabana, tadomo neonga oa i Yesus ri ngayo nu tou dea riolo nto Yahudi. Nangkosu-Yamo lako ri Yudea, pade nalou ri ngata to nisanga Efraim, to najungku tongompada bei. Isee-Yamo natida noroa ante ana-ana guru-Na.
55 Tempo ee najungkumo posusa Eo Bete Paskah nto Yahudi. Jadi nadeamo tou lako ri ngata-ngata nto Yahudi nalou ri Yerusalem bona mowia ada mampakagasa koro sintou tadopa rapamula susa Eo bete Paskah ee. 56 Narata-ra isee, nionco-ramo i Yesus. Pade ranca-ra notobu ri Sou nu Allatala, nombepekutana-ramo: “Beiwa pamparata-mi? Mamei-Yada ri posusa ei, ba tado?” 57 Isira nololita ewa ee apaa tobalia-tobalia ri matana bo to Farisi nambeimo parenta bona butu dua tou to nanguncani riumba i Yesus, kana na-uli, bona mamala-ra mosoko-Ya.