Topoewu to nabelo
10:1-21
10
1 “Kakono-konona Ku'ulikaka komi: Tou to mesua ri gimpu nu bimba pade tado modala ri wombo, agiana mentode wala-yada, tou ee topangio bo toperampaki. 2 Agiana to mesua pade modala ri wombo, ia-mo topoewu bimba. 3 Topojaga gimpu moungkeka-ya wombo, pade bimba-bimba mampetalingai wotu-na tempo-na mampokio sanga-ra saongu-saongu, pade mangkeni mpesuwu-ra ri sawalikuna. 4 Ri sawalikunapa bimba-bimba ee, topoewu ee molumako mokoulu, pade bimba-bimba ee mantutu-ya lako ri bengo apaa nincani-ra wotu-na. 5 Tado madota-ra mantutu tou ntani, agiana isira kana mampanganika tou ee, apaa tado nincani-ra wotu-na.”6 I Yesus nanguli porapaika ee si sira, agiana tado nincani-ra nuapa patuju-Na nanguli porapaika ee.
7 Pade nololita mbiimo i Yesus: “Kakono-konona Ku'ulikaka komi: Yaku-mo wombo nu bimba mesua ri gimpu. 8 Sumawee tou to narata nokoulu lako si-Yaku, ee-mo topangio bo toperampaki, agiana bimba-bimba ee tado nampetalingai wotu-ra. 9 Yaku-mo wombo. Yema mesua modala si-Yaku, ia kana masalama pade ia kana mesua bo mesuwu pade mamparata tongompada nakawokoa. 10 Topangio narata kawule bona mangio, mepatesi, pade mepakaropu. Agiana Yaku narata bona manusia mamparata katuwu magana-gana to neliu mpuu kabelona. 11 Yaku-mo topoewu nabelo. Topoewu nabelo kana mambei inosa-na ri bimba-bimba-na. 12 Topobago nipagaji to tado topoewu pade tado mbii tumpu bimba-bimba ee, kana mangani mampawia bimba-bimba ee ande na-kalio serigala marata. Mangkajadika bimba-bimba kana na-dapa bo na-poposimpogara nu serigala ee. 13 Tou nipagaji ee nangani, apaa ia kawule topobago nitomboi ngkola. Tado nipotowe-na bimba-bimba ee.
14 Yaku mo topoewu nabelo. Yaku nanguncani bimba-bimba-Ku, pade bimba-bimba mbii-Ku nanguncani-Ku, 15 nasimbei ewa Tuama nanguncani-Ku, pade Yaku mbii nanguncani Tuama. Pade Yaku kana mambei inosa-Ku ri bimba-bimba-Ku. 16 Naria mbiipa bimba-bimba ntani-Ku to tadopa nesua ri rara nu gimpu ei. I sira mbii kana Ku keni, pade isira kana mampetalingai wotu-Ku, bona isira kana majadi saongu lambara ante sadua topoewu. 17 Tuama nampotowe-Ku, apaa Yaku nambei inosa-Ku, bona Ku rata mpanculi tuwu-Ku. 18 Tado namo saduaa mamala mangala inosa-Ku lako si Yaku. Yaku nambei inosa-Ku nantutu dota dodo-Ku. Yaku nakuasa nambei, pade nakuasa mbii mangala mpanculi. Ee-mo bago to nitarima-Ku lako ri Tuama-Ku.”
19 Namparonge lolita ni Yesus ee, nombebilimo tou-tou Yahudi ee. 20 Nadea-ra to nanguli: “Ia nipesua nu wao tuwu pade nagila. Nemo mi-ronge Ya.” 21 Agiana naria mbii tou ntanina nanguli: “Tou to nipesua nu wao tuwu tado mamala mololita ewa etu. Wao tuwu tado namala mampowia toburo mamala mekalio.”
I Yesus niporou nu to Yahudi
10:22-39
22 Tadomo nasae naopu ee, naratamo posusa eo Poparikonoi Sou nu Allatala ri Yerusalem. Tempo ee bula nu lengi. 23 Ranca ni Yesus nolulumako ri Sou nu Allatala, ri kandawari ni Salomo, 24 naratamo tou-tou to Yahudi nantikusi-Ya bo nampekutana-Ya: “Duuna neipia-Ko mampalambaka-ka maingu? Ande Iko mpuu-mpuu Mbagou Topepakasalama, uli pakanotomo si kami.” 25 Nesono i Yesus: “Niuli-Kumo si komi, agiana tado niparisaya-mi. Bago-bago to nipowia-Ku ante kuasa nu Tuama-Ku, ee-mo to nopanotosi nancambelai-Ku. 26 I komi tado neparisaya, apaa tado bimba-bimba-Ku komi. 27 Bimba-bimba-Ku nampetalingai wotu-Ku. Yaku nanguncani-ra, pade isira nantutu-Ku. 28 Yaku nambeikaka-ra tuwu liu-liu, pade tado mamate-ra duuna masae-sae. Tado namo saduaa to mamala mangago-ra lako ri pale-Ku. 29 Tuama-Ku to nambei-ramo si Yaku, neliu lako ri sumaweena. Tado namo saduaa to mamala mangago-ra lako ri pale nu Tuama. 30 Yaku bo Tuama nosaongu rara.”
31 Pade niala mbiimo nu to Yahudi ee watu rapopowunu-ra i Yesus bona mamate-Ya. 32 Agiana nanguli i Yesus si sira: “Nadeamo bago belo lako ri Tuama-Ku to nikalio-mi nipowia-Ku. Lako ri sumawee bago ee, bago umbana to najadi saba pade nangkajadika komi madota mowunu-Ku?” 33 Nesonomo tou-tou to Yahudi ee: “Tado bago-bago belo to nipowia-Mu etu to najadi saba pade madota-kamo mowunu-Ko, agiana apaa Iko nangkanene Allatala. Iko kawule manusia biasa, agiana nopasimbei koro-Mu ewa Allatala.” 34 Pade nesonomo i Yesus: “Ri rara Buku Taurat to niparisaya-mi naria nitulisi: Allatala nanguli: I komi ei-mo allatala. 35 Nuanu to nitulisi ri rara Buku Nagasa tado maria pobaliana duuna masae-sae. Jadi, tou-tou to nantarima lolita nu Allatala, mamala-Yamo rauli ana nu Allatala. 36 Nuapa pade niuli-mi Yaku nangkanene Allatala sabana nanguli bakote Yaku Ana nu Allatala? Bo ee Yaku nipelisi nu Tuama pade nitudu namei ri dunia. 37 Ande tado Ku powia bago to nituduka-Ku nu Tuama, nemo mi-parisaya Ku. 38 Agiana apaa nipowia-Kuda bago to nituduka-Ku nu Tuama, parisayamo ee, noudamo tado niparisaya-mi Ku. Iweemo dalana bona manoto rara-mi pade mi-ncani bakote Tuama nosaongu rara oa ante i Yaku, pade i Yaku nosaongu rara oa ante Tuama.”
39 Pade nipesimbukui mbii-ramo mosoko i Yesus, agiana namala-Ya nampanganika-ra.
I Yesus ri sambote nu ue Yordan
10:40-42
40 Naopu ee nalou mbiimo i Yesus ri sambote nu ue Yordan, ri pearia ni Yohanes nebaptis impia, pade natida-Yamo isee. 41 Nadea tou namei si-Ya pade nanguli: “Tado ami naria kadupaa nipowia ni Yohanes, agiana sumawee nuanu niuli-na nancambelai Tou ei nakono.” 42 Pade nadeamo tou isee najadi namparisaya i Yesus.