I Yesus niwila ri Betania
12:1-8
12
1 Aono eopa pade rapowiada posusa Eo Bete Paskah to Yahudi. Naloumo i Yesus ante ana-ana guru-Na ri Betania, ngata pearia ni Lazarus to nipatuwu mpanculimo ni Yesus lako ri kamatea ee. 2 Iseemo nipasadiaka i Yesus pangkondi, pade i Marta nelayani. Riolo-ra ee naria i Lazarus ante torata-torata noncunda nangkondi noroa-roa ante i Yesus. 3 Ranca-ra nangkondi, naratamo i Maria nangkeni santongo lite lana wongi narwastu to nasuli mpuu olina. Nilanai-namo paa ni Yesus, pade niparisi-na ante wulua-na. Sumawee rara ncou ee najadi nawongi nipowia nu lana wongi ee. 4 Agiana ana guru ni Yesus to nisanga i Yudas Iskariot to mampobalu-Ya ngoni ee nanguli: 5 “Nuapa pade tado nibalu lana wongi etu toloatu dinar olina, pade doina raweikaka tou netowei?” 6 I Yudas Iskariot nanguli ewa ee tado sabana nantora tou netowei. Apaa topangio amiyada. pade naoso-ya nangala doi to niboli si-ya. 7 Nangulimo i Yesus: “Palambaka-yamo. Ia namboli lana wongi etu duuna ri eo ei bona mopasadia popatana-Ku ngoni. 8 Tou netowei maria oa-da riolo-mi, agiana Yaku tadomo moroa oa ante i komi.” Kasintundu bona mopatesi i Lazarus
12:9-11
9 Nadea mpuu to Yahudi namparonge bakote naria i Yesus ri Betania. Jadi nalou-ramo nangkalio i Yesus pade nangkalio mbii i Lazarus to nipatuwu mpanculi ni Yesus lako ri kamateana ee. 10 Ee-mo sabana tobalia ri matana masintundu bona mopatesi i Lazarus mbii, 11 apaa ia-mo to najadi saba nangkajadika nadeamo to Yahudi nampawia-ra pade namparisaya i Yesus.
I Yesus niune sintou-Na mesua ri Yerusalem
12:12-19
12 Kaneilena tou to namei mowia susa Paskah namparonge kareba bakote i Yesus ranca-Na ri polumakoa mamei ri Yerusalem. 13 Niala-ramo tawa-tawa nu kou palem pade nalou mampotomuka i Yesus ante nongare lako:
“Raunemo Allatala!
Ratiroi-Yamo to narata ri rara sanga ni Pue.
Ratiroimo Mbagou nto Israel!”
14 Niratamo ni Yesus sambaa keledai pagurua, pade nisawi-Na, ewa to nitulisi ri rara Buku Nagasa:
15 “Nemo maeka komi todea ri Yerusalem.
Kaliomo mbagou-mi narata,
nencawi sambaa keledai pagurua!”
16 Tempo nu kajadia ee tadopa nincani nu ana-ana guru-Na batua nu sumawee nuanu ee. Agiana nipatuwu mpanculipa i Yesus pade nipemabose, pade nitora-rada bakote ri rara Buku Nagasa nitulisi bakote nuanu to nipowia nu tou-tou ee kana majadi si Yesus.
17 Tou-tou to naria tempo ni Yesus nampokio i Lazarus mesuwu lako ri dayo pade nopatuwu mpanculi-ya lako ri kamatea, nambei oa posabiti nancambelai nuanu ee. 18 Ee-mo sabana tou dea ee nalou si Yesus apaa nironge-ramo kadupaa to nipowia-Na ee. 19 Pade nombeulikakamo tou-tou to Farisi ee: “Tado namala-ta nowia banuapa-pa. Kalio dodomo, nadea mpuu tou nalou nantutu-Ya.”
I Yesus nampopokareba kamate-Na
12:20-36
20 Riolo nu tou-tou to Yahudi naria mbii basangkia dua to tado to Yahudi nalou ri Yerusalem bona menomba ri tempo nu susa ee. 21 Nameimo tou-tou ee si Filipus pade nanguli: “Sarara, i kami madota motomu ante i Yesus.” I Filipus ei lako ri ngata Betsaida ri ngamba Galilea. 22 Naloumo i Filipus nangulikaka i Andreas, pade nalou-ramo rodua-ra nanguli perapia ee si Yesus. 23 Nangulimo i Yesus si sira: “Naratamo tempona Ana Manusia rapemabose. 24 Kanono-konona Ku'ulikaka komi, ande saongu pae tado ratuda ri tana pade mamate ncala, ia aga bate-batena saongu dodo. Agiana ande saongu pae ratuda ri tana pade mamate ncala, ia kana mowua madea. 25 Tou to nampotowe inosa-na, kana malali inosa-na, agiana tou to tado nampotowe inosa-na, ia kana mantarima tuwu liu-liu. 26 Yema to madota mampobagoka-Ku, ia kana mantutu-Ku, bona mamala-ya moroa-roa ante i Yaku riumba-umba kalouaa-Ku. Tou to nampobagoka-Ku, ia kana rabila nu Tuama-Ku. 27 Tempo ei nasusa mpuu rara-Ku. Tadomo nincani-Ku nuapa to kana Ku'uli. Mamala-Kuda manguli: Tuama, pakasalama-Ku lako ri pesori ei. Agiana tado madota-Ku ewa ee, apaa patuju-Ku namei ri dunia bona mantodosaka kapepaa. 28 Tuama, popakaliomo kabete nu kuasa-Mu ri manusia!”. Pade nirongemo wotu lako ri suruga nanguli: “Nipopakalio-Kumo kabete nu kuasa-Ku pade Ku-popakalio mbiipa.” 29 Tou dea to nokongkore isee pade namparonge wotu ee nanguli bakote wotu ee, wotu nu berese. Agiana naria mbii to nanguli bakote malaeka-da to nampololitaka-Ya. 30 Pade nangulimo i Yesus si sira: “Wotu to nironge-mi ee tado bona mampakaroso rara-Ku, agiana mampakaroso rara-mida. 31 Naratamo tempona dunia ei ratangara. Tempo ei Mbagou Seta to nokuasai dunia kana radagimo. 32 Pade tempo-Ku raongko rapakalangko ri wongko dunia, Yaku kana mopakeni sumawee tou mamei si Yaku.” 33 Nuanu ei niuli-Na bona mopanotosi beiwa dala ngkamate-Na ri kou salib. 34 Pade nangulimo tou dea ee si-Ya: “Ri rara Buku Taurat nibasa-kamo bakote Mbagou Topepakasalama ee kana matuwu duuna masae-sae. Beiwa mbii pade niuli-Mumo bakote Ana Manusia kana raongko rapakalangko ri wongko dunia? Yema Ana Manusia ee?” 35 Nesono i Yesus: “Singoni ngkoladamo kabaasana ee maria riolomi. Jadi, polumakomo sinungka nu kabaasana ee mariadapa, bona tado naruncu nu kadedia komi. Tou to nolumako ri rara nu kadedia tado nincani-na riumba kalouaa-na. 36 Parisayamo kabaasana ee, sinungka nu kabaasana ee mariadapa si komi, bona i komi matuwu ri rara nu kabaasana.”
Naopu nanguli ewa ee, nangkosu-Yamo lako isee pade nampetabongoka-ra.
Nuapa pade to Yahudi tado namala neparisaya
12:37-43
37 Noudamo nadeamo kadupaa to nipowia ni Yesus ri ngayo-ngayo-ra, agiana tado nadota-ra namparisaya-Ya. 38 Jadi nadupamo to niuli ni nabi Yesaya ewa ei:
“Pue, tado naria to namparisaya kareba to niparata-ka.
Noudamo nipopakalio-Mumo kuasa-Mu si sira, tado mpuu niparisaya-ra.”
39 Ee-mo sabana tado namala-ra neparisaya, apaa niuli mbiimo ni Yesaya:
40 “Allatala nampakaburo mata-ra bo nampakakoo rara-ra,
bona tado mamala-ra mekalio pade rara-ra tado manguncani,
bona tado mamala-ra manculi si Yaku, pade Ku pakaori.”
41 I Yesaya nanguli ewa ee, apaa nikalio-namo pampemabose i Yesus, pade nololita nancambelai-Ya.
42 Noudamo iwee, nadea mbiida topangkeni to Yahudi namparisaya i Yesus. Agiana isira kawule neparisaya bongo-bongo, apaa naeka-ra, nemo-nemo ngoni tadomo rapaliu-ra nu to Farisi mesua ri sou penombaa. 43 Nipobelo-rapa mantarima pebila lako ri manusia pade pebila lako ri Allatala.
Lolita ni Yesus to metangara
12:44-50
44 Pade nongaremo i Yesus ante wotu narimbuku: “Tou to namparisaya-Ku, tado kawule i Yaku niparisaya-na, agiana namparisaya mbii Tuama to nantudu-Ku. 45 Pade tou to nangkalio-Ku, nangkalio mbii Tuama to nantudu-Ku. 46 Yaku namei ri dunia ei majadi kabaasana, bona butu dua to mamparisaya-Ku tado meari ri rara nu kadedia. 47 Tou to namparonge pepatuduki-Ku, agiana tado nitutu-na, tado i Yaku mosuku-ya. Apaa Yaku namei ri dunia ei tado mosuku manusia, agiana bona mampakasalama manusia. 48 Tou to nampoara-Ku pade tado nampetalingai lolita-Ku, nariamo to mosuku-ya. Lolita to niparata-Ku ee-mo ngoni to rapopotangara-ya ri Eo Kaopu nu Dunia. 49 Apaa Yaku nololita tado nantutu dota dodo-Ku. Yaku aga nanguli bo noparata nuanu to niparentaka-Ku nu Tuama-Ku, apaa Ia-mo to nantudu-Ku namei ri dunia. 50 Pade nincani mbii-Ku bakote parenta-Na ee nambei tuwu liu-liu. Jadi Yaku noparata ewa to niulika-Ku nu Tuama-Ku.”