I Yesus noelasi paa nu ana-ana guru-Na
13:1-20
13
1 Saeyopa pade rapowiada susa Eo Bete Paskah to Yahudi, nincanimo ni Yesus bakote tempona-Yamo mampaleisi dunia ei pade manculi malou ri Tuama-Na. Nipotowe mpuu-Na tou-tou to najadi todea-Na ri dunia, pade Ia nampotowe oa-ra duuna ri eo kaopuana. 2 I Yesus ante ana-ana guru-Na nangkondi noroa-roa kawengina ee. Pade Mbagou Seta nopasua liwona ri pekiri ni Yudas ana ni Simon Iskariot bona mampobalu i Yesus. 3 Nincanida ni Yesus bakote niwei puramo nu Tuama sumawee kakuasaa si-Ya. Nincani mbii-Na bakote Ia neumba lako ri Allatala pade kana manculi ri Allatala. 4 Jadi nokongkore-Yamo pade noloncu powaru ndoe-Na bo nopou peko-Na ante sandu. 5 Naopu ee nidua-Namo ue ri rara batili pade nopamula-Yamo noelasi paa nu ana-ana guru-Na pade niparisi-Na ante sandu to nipou-Na ri peko-Na ee. 6 Narata-Yapa si Simon Petrus, nangulimo i Petrus si-Ya: “Pue, nuapa pade kana Mu-elasi paa-ku?” 7 Nesono i Yesus: “Tempo ei tadopa nincani-mu nuapa patuju nuanu to nipowia-Ku ei, agiana ngkapurina ngoni kana mu-ncani.” 8 Nanguli i Petrus si-Ya: “Nemo Pue, nemo Mu-elasi paa-ku.” Nisonoi-ya ni Yesus: “Ande tado Ku-elasi paa-mu, tado mamala-ko mancosora banuapapa lako si Yaku.” 9 Nangulimo i Simon Petrus si-Ya: “Ande iweetu wea Pue, nemo kawule paa-ku Mu-elasi, agiana ante pale bo woo mbii-ku!” 10 Nanguli i Yesus si-ya: “Tou naopumo nandiu tadomo rariu-ya, apaa narawamo sumangkoro-na. Agiana paa-na kana raelasi pakarawa. I komi mbii narawamo, agiana tado sumawee-mi.” 11 Apaa nincanimo ni Yesus yema to kana mampobalu-Ya. Ee-mo sabana pade niuli-Namo: “Tado sumawee-mi narawa.”12 Naopupa i Yesus noelasi paa-ra, nipasuaki nculi-Namo powaru ndoe-Na pade noncundaki nculi. Pade nanguli-Yamo si sira: “Nincani-mida nuapa to nipowia-Ku si komi ee see? 13 I komi nampokio-Ku Guru bo Pue-mi. Nakono amida ee. 14 Jadi, ande Yaku to najadi Guru bo Pue-mi noelasi paa-mi, i komi mbii masipato mombe'elasi mpo paa. 15 Yaku nambei jonjo ei si komi, bona i komi mowia nuanu to nipowia-Kumo si komi. 16 Kakono-konona Ku'ulikaka komi: Batua tado neliu kabete-na lako ri maradika. Iwee mbiida, tudua tado neliu kabete-na lako ri topantudu-ya. 17 Ande nincani pura-mimo sumaweena ei, masanamo komi ande mi-powia.
18 Nuanu to niuli-Ku ei tado nambela si komi pura. Nincani-Kuda yema-yema to nipelisi-Kumo. Agiana nuapa to nitulisi ri rara Buku Nagasa kana rapadupa, bakote: Tou to nangkondi namporoa-Ku, kana mangewa-Ku. 19 Niuli ami-Kumo nuanu ei si komi, sintou tadopa najadi, bona ande majadi nuanu ee ngoni, ikomi kana mamparisaya bakote Yaku-mo Ia ee. 20 Ku'ulikaka komi: Kakono-konona yema mantarima tou to nitudu-Ku, ia nantarima-Ku. Pade yema mantarima-Ku, ia nantarima Tuama to nantudu-Ku.”
I Yesus nampopatora i Yudas
13:21-30
21 Naopupa i Yesus nanguli sumaweena ee, nasusa mpuu rara-Na, pade nanguli-Yamo: “Kakono-konona Ku'ulikaka komi, naria sadua riolo-mi ei kana mampobalu-Ku.” 22 Nombeololemo ana-ana guru-Na apaa naingu sabana tado nincani-ra yema to najadi patuju nu lolita-Na. 23 Naria sadua ana guru to nipotowe-Na noncunda ri siawe-Na. 24 Noraemo i Simon Petrus ri ana guru ee, bona na-pekutana i Yesus yema ntotoda to najadi patuju nu lolita ee. 25 Jadi neilimo ana guru-Na to noncunda ri siawe-Na ee pade nampekutana-Ya: “Pue, yema tou ee?” 26 Nesono i Yesus: “Tou to Kuweikaka roti to naopu nitula-Ku ri poutaa, ia-mo ee.” Pade nialamo ni Yesus santibe roti, naopu ee nitula-Na ri poutaa, pade niweikaka-Na i Yudas ana ni Simon Iskariot. 27 Pantarima ni Yudas roti ee, nipesua-yamo nu Mbagou Seta. Pade nangulimo i Yesus si-ya: “Nuapa to madota mu-powia, powiamo magasi.” 28 Agiana tado namo saduaa-ra to noncunda nangkondi isee, nanguncani nuapa patuju nu lolita ni Yesus si Yudas ee. 29 Naria-ra nampekiri bakote i Yesus nantudu i Yudas mangoli banuapapa kaparalouaa ri posusa ee, ba mambei doi ri tou-tou netowei, apaa i Yudas to niparisaya namboli doi-ra. 30 Nitarima-pa ni Yudas roti ee, nesuwu-yamo lako isee. Tempo ee nadedimo.
Parenta bou
13:31-35
31 Nesuwupa i Yudas lako isee, nangulimo i Yesus: “Bulawee ei Yaku, Ana Manusia rapemabose. Pade lako ri nuanu to najadi ri koro-Ku ngoni, Allatala mbii kana rapemabose. 32 Ande nuanu to najadi ri koro-Ku mampemabose Allatala ngoni, Allatala mbii ngoni mampemabose-Ku ante kuasa-Na. Tadomo masae Na-padupa. 33 Ana-ana-Ku, tadomo masae-Ku mamporoa komi. Ikomi kana mangonco-Ku, agiana ewa to niuli-Kumo ri topangkeni to Yahudi, iwee mbii Ku'uli si komi: Ri pearia to Kukalouii ee, tado mamala komi mamei.
34 Kuweikaka komi parenta bou, ee-mo parenta bona ikomi kana mombepotowe. Nasimbei ewa Yaku nampotowe komi, iwee mbiimo i komi kana mombepotowe. 35 Ande mombepotowe komi, sumawee tou kana manguncani bakote i komi mpuu-mpuu ana-ana guru-Ku.”
I Yesus nampopatora i Petrus
13:36-38
36 Pade nepekutanamo i Simon Petrus si Yesus: “Pue, riumba kalouaa-Mu?” Nesono i Yesus: “Riumba kalouaa-Ku, tado mamala-ko metutu tempo ei, agiana ngoni iko kana mantutu-Ku.” 37 Nangulimo i Petrus: “Pue, nuapa pade tado mamala-ku mantutu-Ko tempo ei? Madota-ku mamate mamporoa-Ko!” 38 Nesono i Yesus: “Madota mpuu-ko mamate mamporoa-Ku? Kanono-konona, tadopa motuturua manu ngoni, tolu ngkanimo-ko mampesapuka-Ku.”