Sou nu Tuama
14:1-14
14
1 “Nemo masusa rara-mi. Parisayamo Allatala pade parisaya mbii-Ku. 2 Ri Sou nu Tuama-Ku nadea pearia. Yaku malou isee bona mopasadiaka komi pearia radou. Ande tado ewa ee, tado madota-Ku manguli si komi. 3 Maopu-Ku malou mopasadiaka komi pearia, Yaku kana manculi mangala komi, bona riumba Ku maria, maria mbii komi isee.4 Pearia Ku kalouii ee, nincani-mida dala malou isee.” 5 Pade nangulimo i Tomas si-Ya: “Pue, tado nincani-ka riumba kalouaa-Mu. Beiwamo panguncani-ka dala malou i see?” 6 Nesono i Yesus: “Yaku-mo dala malou ri Tuama, bo puu nu sumawee nuanu to nakono, pade dala bona mamparata tuwu liu-liu. Tado namo saduaa to mamala mamei ri Tuama, ande tado modala si Yaku. 7 Ande rapana nincani mi Ku, tantu kana mi-ncani mbii Tuama-Ku. Tempo ei nincani-mi Ya-mo, pade nikalio-mi Ya-mo.”
8 Pade nangulimo i Filpus si Yesus: “Pue, tudoka-kamo Tuama ee, bona maosa rara-ka.” 9 Nesono i Yesus: “Nasae-Kumo noroa ante i komi, tado oa-pa nincani-mu Ku, Filipus? Tou to nangkalio-Kumo, nikalio mbii-namo Tuama. Beiwa pade niuli-mu: Tudoka-kamo Tuama ee? 10 Filipus, tado niparisaya-mu bakote Yaku nosaongu rara ante Tuama, pade Tuama nosaongu rara ante i Yaku? Nuanu to niuli-Ku si-ko tado neumba lako si Yaku dodo, agiana Tuama to nosaongu rara ante i Yaku, Ia-mo to nowia sumawee bago ee. 11 Parisaya-Kumo, bakote Yaku nosaongu rara ante Tuama, pade Tuama nosaongu rara ante i Yaku. Noudamo tado niparisaya-mi lolita-Ku, parisayamo apaa nikalio-mimo sumawee nuanu to nipowia-Ku. 12 Kakono-konona Ku'ulikaka komi: Yema namparisaya-Ku, ia kana mowia nuanu to nipowia-Ku, ba meliu ntoto mbiipa kabetena lako ri nuanu to nipowia-Ku, apaa Yaku manculi-Kumo malou ri Tuama. 13 Pade banuapa-pa to mi-perapi ri rara nu sanga-Ku, nuanu ee kana Ku powiaka komi, bona rapemabose Tuama-Ku lako ri nuanu to nipowia nu Ana-Na. 14 Banuapa-pa mpuumo to mi-perapi ri rara nu sanga-Ku, kana Ku powia.”
I Yesus notipaka Inosa Gasa
14:15-31
15 “Ande nipotowe-mi Ku, i komi kana mantutu sumawee parenta-Ku. 16 Yaku kana merapi ri Tuama, bona Na-weikaka komi Topetulungi ntanina, to kana matida bona mamporoasi komi duuna masae-sae. 17 Ia ee-mo Inosa Gasa to kana mopanotosi nuanu nakono nancambelai Allatala. Tou-tou ri dunia tado namala nantarima-Ya, apaa tado nangkalio ba nanguncani-Ya. Agiana i komi nanguncani-Ya, apaa Ia natida namporoa komi pade kana mosaongu rara ante i komi.
18 Tado Ku-pawia komi ewa ana ilu. Yaku kana manculiki si komi. 19 Singoni ngkola Ku-damo nakalio nu dunia, agiana i komi kana mangkalio-Ku. Apaa i Yaku natuwu, i komi mbii kana matuwu. 20 Ande maratamo eona ee, ikomi kana manguncani bakote Yaku nosaoungu rara ante Tuama-Ku, ikomi nosaongu rara ante i Yaku, pade Yaku nosaongu rara ante ikomi.
21 Tou to nantarima parenta-Ku pade nipowia-na, ia-mo to nampotowe-Ku. Tuama-Ku kana mampotowe tou to nampotowe-Ku. Yaku mbii kana mampotowe tou ee, pade kana mampopakalio woto-Ku si-ya.” 22 Pade naria sadua ana guru to nisanga i Yudas (tado i Yudas Iskariot) nampekutana i Yesus: “Pue, nuapa pade Mu popakalio woto-Mu si kami, tado Mu popakalio ri dunia?” 23 Nesono i Yesus: “Tou to mampotowe-Ku kana mantutu pepatuduki-Ku. Tuama-Ku kana mampotowe-ya. Tuama bo i Yaku kana mamei si-ya pade matida mamporoa-ya. 24 Tou to tado nampotowe-Ku, tado nantutu pepatuduki-Ku. Pepatuduki to nironge-mi ee, tado lako si Yaku, agiana lako ri Tuama to nantudu-Ku.
25 Sumaweena ee niuli-Ku si komi, sinungka-Ku nariadapa namporoa komi. 26 Agiana Inosa Gasa, Topetulungi to kana natudu nu Tuama ri rara sanga-Ku, Ia-mo to kana mopatuduki komi ngila ngayana pade mampopatoraka komi sumawee nuanu to niuli-Kumo si komi.
27 Kasanaa kana Kubolika komi. Kasanaa lako si Yaku dodo to Kuweika komi. To Kuwei ee tado ewa to niweika komi nu dunia. Nemo masusa rara-mi pade nemo maeka. 28 Nironge-mi Ku-mo nanguli si komi: Yaku kana malou, agiana Yaku kana mameiki nculi si komi. Ande nipotowe-mi Ku, tantu kana madonu komi apaa Yaku malou ri Tuama-Ku, apaa neliupa bete nu Tuama-Ku lako si Yaku. 29 Sumaweena ee niuli-Ku si komi tempo ei, sintou tadopa najadi sumaweena ee, bona mi-parisaya Ku ande majadipa ngoni nuanu ee. 30 Tado-mo madea nuanu Ku'uli si komi, apaa temponamo to nakuasa ri dunia ei marata, agiana tado nakuasa-ya ri koro-Ku. 31 Agiana sumaweena ee kana majadi bona manoto rara nu dunia bakote Yaku nampotowe Tuama pade nowia sumawee nuanu to niparentaka-Na Ku. Peongkomo, mangkosu-tamo lako isei.”