Puu nu anggur to nakono
15:1-8
15
1 Pade nanguli mbiimo i Yesus: “Yaku-mo puu anggur to nakono, pade Tuama-Ku tumpu bonde anggur ee. 2 Butu panga-Ku to tado nowua nilali-Na, pade panga to nowua nirawasini belo-belo bona mantambei kadea nu wuana. 3 I komi narawa amimo sabana pepatuduki to niwei-Ku si komi. 4 Posaongu rara oamo komi ante i Yaku, pade i Yaku mbii mosaongu rara oa ante i komi. Panga-panga to tado nentaka ri puuna tado mamala mowua. Aga panga-panga to nentaka dodo ri puuna ngkola mamala mowua. Iwee mbiimo ante i komi. Tado mamala komi mowua ande tado mosaongu rara komi ante i Yaku. 5 Yaku-mo puu nu anggur, pade i komi panga-pangana. Tou to mosaongu rara dodo oa ante i Yaku pade i Yaku mosaongu rara ante ia, kana mowua madea, apaa ande tado mosaongu rara ante i Yaku, tado mamala komi mowia banuapa-pa. 6 Tou to tado natatapu nosaongu rara ante i Yaku kana ratadiaka ewa panga to tado nowua to nitadiaka pade majadi mabangi. Panga-panga nabangi ee rapasintobu pade rasuwe ante apu. 7 Ande i komi mosaongu rara dodo oa ante i Yaku pade pepatuduki-Ku matida ri rara-mi, perapimo ri Tuama banuapa-pa to mi-podota, perapia-mi ee kana rapeponui. 8 Tuama-Ku kana rapemabose ande mowua madea komi. Nuanu ee nampopakalio bakote i komi mpuu-mpuu ana guru-Ku.”Parenta bona mombepotowe
15:9-17
9 “Ewa Tuama nampotowe-Kumo, iwee mbii pampotowe-Ku komi. Jadi posaongu rara oamo komi ante i Yaku, bona mi-rasai pepotowe-Ku. 10 Ande mi-powia parenta-parenta-Ku, i komi kana mamparasai oa towe-Ku, nasimbei ewa Yaku mbii nampowia parenta nu Tuama pade namparasai oa towe-Na.
11 Sumaweena ee niuli-Ku si komi, bona donu rara-Ku matida ri rara-mi, pade donu rara-mi ee majadi magana. 12 Ei-mo parenta-Ku si komi: Pombepotowemo komi, nasimbei ewa pampotowe-Ku komi. 13 Tado naria towe to neliu kabetena lako ri towe nu tou to nambei inosa-na bona mantulungi wega-wega-na. 14 Ikomi ei-mo wega-Ku, ande ikomi mowia nuanu to niparentaka-Ku komi. 15 Tadomo oa Ku'uli ikomi batua, apaa batua tado nanguncani nuapa to nipowia nu maradika-na. Agiana ikomi Ku'uli wega-Ku, apaa sumawee nuanu to nironge-Ku lako ri Tuama, niuli-Kumo si komi. 16 Tado ikomi to nampelisi-Ku, agiana Yaku-da to nampelisi komi pade nantudu komi malou bona mowua madea, ee-mo wua to tado maria kaopuana. Mangkajadika Tuama kana mambeikaka komi sumawee nuanu to niperapi-mi si-Ya ri rara nu sanga-Ku. 17 Ei-mo parenta-Ku si komi: Pombepotowemo komi.”
Dunia nampodaa i Yesus bo ana-ana guru-Na
15:18-27
18 “Ande napodaa komi nu dunia, toramo bakote lombo Yaku-mo nokoulu nipodaa nu dunia. 19 Ande rapana i komi neumba lako ri dunia, tantu i komi napotowe nu dunia apaa i komi todeana. Agiana nipelisi-Kumo komi lako ri dunia ee, jadi i komi tadomo todea nu dunia. Ee-mo sabana pade nipodaa komi nu dunia. 20 Toramo lolita to niuli-Kumo si komi: Batua tado neliu bete-na lako ri maradika-na. Ande i Yaku niduasi-ramo, i komi mbii kana raduasi-ra. Ande nitutu-ra pepatuduki-Ku, i sira kana mantutu mbii pepatuduki-mi. 21 Sumaweena ee kana rapowia-ra si komi sabana i komi topantutu-Ku, apaa tado nincani-ra Tuama to nantudu-Ku. 22 Ande rapana tado narata-Ku pade tado nanguli sumaweena ee si sira, tado majeko-ra. Agiana tempo ei tadomo mamala rauli-ra: Tado nincani-ka bakote nuanu to nipowia-ka ee jeko. 23 Tou to nampodaa-Ku, nampodaa mbii Tuama-Ku. 24 Ande rapana tado nipowia-Ku nuanu to tadopa naria nipowia nu tou ntani ri ngayo-ngayo-ra, tado majeko-ra. Agiana tempo ei nikalio-ramo nuanu to nipowia-Ku, agiana isira nampodaa-Ku bo nampodaa mbii Tuama-Ku. 25 Agiana kana ewa ee ami-da, bona madupa nuanu to nitulisi ri rara Buku Taurat to nibasa-ra: Isira nampodaa-Ku noudamo tado naria sabana.
26 Yaku kana mantudu mamei si komi Topetulungi to neumba lako ri Tuama. Ia-mo Inosa Gasa to kana mopanotosi nuanu to nakono nancambelai Tuama. Ande marata-Ya, Ia kana mambei posabiti nancambelai-Ku. 27 Pade ikomi mbii kana mambei posabiti nancambelai-Ku, apaa i komi noroa-roa ante i Yaku lako ri paramula nu pobago-Ku ri dunia.”