Matundu
16:1-4a
16
1 “Sumaweena ei niulikaka-Ku komi bona nemo masue rara-mi bo mampoara-Ku. 2 Ikomi kana rapopesuwu lako ri sou-sou penombaa. Pade kana marata tempona bakote tou to nopatesi komi manguli isira nampabila Allatala ante nuanu to nipowia-ra ee. 3 Isira nowia nuanu ee si komi, sabana tado nincani-ra Tuama pade tado mbii nanguncani-Ku. 4a Agiana tempo ei Ku'ulimo si komi, bona ande majadi ngoni nuanu ee, mi-toramo bakote nariamo niuli-Ku si komi.”Pobago nu Inosa Gasa
16:4b, 15
4b “Nuanu ei tado niuli-Ku si komi lako ri paramulana, apaa naria-Kudapa noroa-roa ante ikomi. 5 Agiana tempo ei Yaku kana malou ri Tuama to nantudu-Ku, pade tado namo sadua lako riolo-mi mampekutana: Riumba-Ko malou? 6 Agiana apaa niuli-Kumo nuanu ee si komi, najadi nasusamo rara-mi ei. 7 Nuanu niuli-Ku si komi ei nakono mpuu. Ande malou-Ku, ikomi kana mantarima nuanu to nabelo. Apaa, ande rapana tado malou-Ku, Topetulungi ee tado mamei-Ya si komi. Agiana ande malou-Ku, Yaku kana mantudu Topetulungi ee mamei si komi. 8 Ande marata-Ya, Ia kana mopanotosi mpuu-mpuu bakote tou-tou ri dunia tado nanguncani nuapa batua nu jeko ee, nuapa batua nuanu to nanoa, pade beiwa Allatala motangara tou-tou ri dunia. 9 Ia kana mopanotosi bakote tou to tado mamparisaya-Ku, tou ee najeko. 10 Ia kana mopanotosi bakote Yaku nanoa, apaa Yaku nalou ri Tuama-Ku pade tadomo oa mi-kalio Ku. 11 Pade Ia kana mopanotosi bakote nopamulamo Allatala metangara, apaa to nakuasa ri dunia ei nitangaramo.
12 Nadeadapa nuanu to madota Ku'uli si komi, agiana tempo ei tadopa mi-pakule mantarima. 13 Agiana ande maratamo Inosa Gasa ee, Ia-mo to kana mangulikaka komi sumawee nuanu to nakono. Ia tado mololita mantutu dota dodo-Na, agiana Ia kana manguli nuanu to nironge-Namo, pade Ia mbii kana mangulikaka komi nuanu to kana majadi ri eo ngkapurina. 14 Ia kana mampemabose-Ku, apaa nuanu to niparata-Na si komi, nitarima-Na lako si Yaku. 15 Sumawee nuanu to naria ri Tuama-Ku, nuanu pura-Kuda ee. Ee-mo sabana pade niuli-Ku si komi: Ia kana moparata si komi nuanu to nitarima-Na lako si Yaku.”
Kasusaa to nampokoului pedagia
16:16-33
16 “Singoni ngkola damo tado-mo mi-kalio Ku, pade singoni ngkola mbiidamo i komi kana mangkalio-Ku.” 17 Namparonge lolita-Na ee, basangkia dua ana-ana guru ni Yesus nombepekutana: “Nuapa patujuna-Na nanguli si kita: Singoni ngkola damo tado-mo mi-kalio Ku, pade singoni ngkola mbiidamo i komi kana mangkalio-Ku? Pade nuapa patuju-Na nanguli: Yaku malou ri Tuama?” 18 Isira nombepekutana oa: “Nuapa batuana: Singoni? Tado nincani-ta ba nuapa nipololita-Na.” 19 Nincanida ni Yesus bakote isira madota mampekutana-Ya. Jadi nanguli-Yamo: “Isee niuli-Ku: Singoni ngkola damo tado-mo mi-kalio Ku, pade singoni ngkola mbiidamo i komi kana mangkalio-Ku. Nuanu ee to nipombepekutanai-mi? 20 Kakono-konona Ku'ulikaka komi: Ikomi kana mokeo bo motumangi, agiana dunia kana madonu. Kana masusa rara-mi, agiana susa rara-mi ee kana mobali majadi kadonua. 21 Tempo nu bangkele moana, nasusa mpuu rara-na apaa naratamo tempo-na mantodosaka kapepaa. Agiana mesuwupa ana-na, nikalinganimo nu bangkele ee kapepaa to nitodosaka-na apaa nadonu bakote sadua manusia niotemo ri rara dunia. 22 Iwee mbiimo ante i komi. Tempo ei nasusa rara-mi, agiana Yaku kana mampotomuka nculi komi mbii, mangkajadika komi kana madonu mpanculi, pade tado namo saduaa to mamala mangala kadonua ee lako si komi. 23 Pade ri eo ee, tadomo maria banuapa-pa mi-pekutana si Yaku. Kakono-konona Ku'ulikaka komi: Banuapa-pa mpuumo to mi-perapi ri Tuama ri rara nu sanga-Ku, nuanu ee kana raweikaka komi nu Tuama. 24 Duuna ri eo ei komi tadopa naria nerapi banuapa-pa ri rara nu sanga-Ku. Perapimo, ikomi kana mantarima, bona kadonua-mi ee magana mpuu.”
25 “Sumaweena ei niuli-Ku si komi ante porapaika. Agiana kana marata tempona tado-mo mampake porapaika-Ku, agiana Ku panotosi loumi si komi nancambelai Tuama. 26 Ri tempo ee-mo komi kana merapi ri Tuama ri rara nu sanga-Ku. Bona mi-ncani, tado Ku perapika komi banuapa-pa lako ri Tuama, 27 apaa Tuama dodo nampotowe komi. Ia nampotowe komi apaa ikomi nampotowe-Ku, pade namparisaya bakote Yaku neumba lako ri Allatala. 28 Neumba lako ri Tuama ami Ku-da, pade narata-Kumo ri rara dunia. Agiana tempo ei Ku kana mampaleisi dunia ei manculiki ri Tuama.”
29 Pade nangulimo ana-ana guru-Na si-Ya: “Tempo ei-Ko Pue nipanotosi-Mumo nololita, tado-mo ante porapaika. 30 Nincani-kamo bakote Iko nanguncani ngila ngayana. Tado-mo raparaluu oa nu bayema-yema mampekutana banuapa-pa si-Ko. Ee-mo sabana i kami namparisaya bakote Iko neumba lako ri Allatala.” 31 Nisonoi-ramo ni Yesus: “Jadi, niparisaya-mimo? 32 Toramo, kana marata tempona, kakono-konona naratamo tempona, bakote ikomi kana rapoposimpogara. Ikomi kana manculi ri sou dodo-mi pade mampaleisi-Ku sadudua-Ku. Agiana tado kawule sadudua-Ku, apaa Tuama-Ku naria namporoasi-Ku. 33 Sumaweena ei niuli-Ku si komi bona ikomi mamparata kasanaa sabana nosaongu rara ante i Yaku. Ri dunia ei komi kana mantodosaka kapepaa, agiana pakarosomo rara-mi, apaa nidagi-Kumo dunia.”