I Yesus nosambayani ana-ana guru-Na
17:1-26
17
1 Naopu-pa i Yesus nanguli sumaweena ee, nitingara-Namo langi pade nanguli: “Tuama, naratamo tempona. Pemabosemo Ana-Mu, bona Ana-Mu mbii mampemabose-Ko. 2 Niwei-Mumo kuasa si Yaku moparenta sumawee manusia bona mamala-Ku mambei tuwu liu-liu ri sumawee tou to niwei-Mu si Yaku. 3 Ei-mo tuwu liu-liu ee, bona tou manguncani Tuama, Allatala to nakono to sadudua ngkola ee, pade manguncani i Yesus Kristus to nitudu nu Tuama. 4 Nipemabose-Kumo Ko Tuama ri dunia ei ante dala nampakaopu bago to niwei-Mu si Yaku. 5 Tuama, pemabose-Kumo ri ngayo-Mu, nasimbei ewa pampemabose-ta noroa-roa sintou tadopa nipajadi dunia.6 Nipanotosi-Kumo sanga-Mu Tuama ri sumawee tou lako ri dunia to niwei-Mu si Yaku. Isira ee todea-Mu, pade niwei-Mu si Yaku. Nitutu-ramo lolita-Mu. 7 Tempo ei nincani-ramo bakote sumawee nuanu to niwei-Mu si Yaku, neumba lako si-Ko Tuama. 8 Niparata-Kumo si sira lolita to niwei-Mu si Yaku, pade nitarima-ramo. Nincani-ramo bakote Yaku mpuu-mpuu neumba lako si-Ko, pade niparisaya-ramo bakote Iko-da to nantudu-Ku. 9 Yaku nosambayani-ra. Tado dunia nisambayani-Ku, agiana nosambayani tou-tou to niwei-Mumo si Yaku, apaa isira ee-mo todea-Mu. 10 Sumawee tou to najadi todea-Ku, najadi todea-Mu mbii, pade sumawee tou to najadi todea-Mu, najadi todea-Ku mbii. Pampemabose-Ku nikalio ri rara nu katuwu-ra. 11 Tempo ei Ku manculi si-Ko Tuama. Tadomo oa meari ri dunia-Ku, agiana isira ri dunia dodo. Tuama to nagasa, jagai-ramo ante kuasa ri rara sanga-Mu, sanga to niwei-Mumo si Yaku, bona isira majadi mosaongu rara, nasimbei ewa posaongu rara nu Tuama bo i Yaku. 12 Sinungka-Ku namporoa-radapa, nijagai-Ku ramo ante kuasa to niwei-Mu si Yaku. Nijagai-Kumo ana guru-Ku, nangkajadika tado namo saduaa-ra naronto, agiana sadua tou to masipato ami kana maronto, bona madupamo nuanu to nitulisi ri rara Buku Nagasa. 13 Tempo ei-Ku malou ri Tuama. Sumaweena ei niuli-Ku bula-Ku ri dunia-dapa, bona isira mpuu-mpuu mamparasai kadonua-Ku. 14 Niparata-Kumo si sira lolita nu Tuama, pade dunia nampodaa-ra, apaa isira tado neumba lako ri dunia, nasimbei ewa Yaku mbii tado neumba lako ri dunia. 15 Tado niperapi-Ku ri Tuama bona mangala-ra lako ri dunia ei, agiana Yaku nerapi bona najagai-ra nu Tuama lako ri Mbagou Seta. 16 Nasimbei ewa Yaku tado neumba lako ri dunia, isira mbii tado neumba lako ri dunia. 17 Patuduki-ramo ante lolita-Mu to nakono bona i sira majadi todea-Mu to nagasa. Lolita-Mu ee-mo pepatuduki to nakono. 18 Nasimbei ewa Tuama nantudu-Ku namei ri dunia, iwee mbii-Kumo mantudu-ra malou matiku dunia. 19 Yaku nambei koro-Ku si-Ko Tuama, bona mamparata kabeloa-ra, pade bona isira mbii mamala majadi todea-Mu to nagasa ante manguncani pepatuduki to nakono.
20 Tado kawule isira ngkola ei nisambayani-Ku, agiana nisambayani-Ku mbii ante tou-tou to kana mamparisaya-Ku ngoni sabana namparonge kareba to rapopowole-ra. 21 Tuama, Ku perapi bona isira sumawee majadi mosaongu rara, ewa Tuama nosaongu rara ante i Yaku, pade ewa Yaku nosaongu rara ante Tuama. Ku perapi bona isira mbii mosaongu rara ante i Kita, bona sumawee dunia mamparisaya bakote Tuama-da to nantudu-Ku. 22 Niweikaka-Ku ramo pampemabose to niwei-Mu si Yaku, bona isira majadi mosaongu rara, nasimbei ewa posaongu rara-Ta. 23 Yaku nosaongu rara ante isira, pade Tuama nosaongu rara ante i Yaku, bona isira mpuu-mpuu mosaongu rara, mangkajadika nancani nu dunia bakote Tuama-da to nantudu-Ku, pade bakote Tuama nampotowe-ra ewa Tuama nampotowe-Ku.
24 Tuama, Yaku madota bona isira to niwei-Mu si Yaku, maria mamporoa-Ku ri pearia-Ku, bona rakalio-ra pampemabose-Ku to niwei-Mu si Yaku, apaa Iko nampotowe-Ku sintou tadopa nipajadi dunia. 25 Tuama to nanoa, dunia tado nanguncani-Ko, agiana Yaku nanguncani-Ko, pade isira ei mbii nanguncani bakote Iko-da to nantudu-Ku. 26 Nipanotosi-Ku sanga-Mu si sira, pade Yaku kana mopanotosi oa si sira, bona towe-Mu matida dodo ri rara-ra pade Yaku mosaongu rara ante isira.”