I Yesus nipemabose ri Yerusalem
21:1-11
21
1 Majungku-rapa ri Yerusalem, narata-ramo ri ngata Betfage ri bulu Zaitun. Isee i Yesus nantudu rodua ana guru-Na molumako mokoulu, 2 ante petetesi: “Koumo komi ri ngata to ri ngayo-mi etu. Marata komi isee, mikalio sambaa keledai tina nitaka pade naria ana-na ri siawe-na. Bolesimo keledai ee pade kenimo rombaa lou tumei. 3 Ande maria tou mangontika komi, ulimo: I Pue namparalou keledai ei, Na-popanculidamo. Tou ee kana mampalambaka keledai ee rakeni.”4 Nuanu ee najadi bona madupa lolita nu Allatala to niuli nu nabi ngkoulu ewa ei:
5 “Ulimo ri todea nu ngata Sion:
Kalio mbagou-mi namei si komi.
Ia naede rara pade nencawi sambaa keledai.
Sambaa ana nu keledai to nangura.”
6 Naopu ee naloumo ana guru-Na rodua pade nampowia ewa to nitetesika-ra ni Yesus. 7 Nikeni-ramo keledai ee ante ana-na, pade nilampini-ramo kuntongo nu keledai-keledai ee ante powaru ndoe-ra. Naopu ee nencawimo i Yesus. 8 Tempo ni Yesus noliu ri dala ee, nadea tou nowente powaru-powaru ndoe-ra ri dala, pade saganta nopua raa-raa ngkou pade nidele-ra ri tongo dala. 9 Pade tou dea to nolumako ri ngayo bo ri bengo ni Yesus nongare-ngare, nanguli:
“Matuwumo muli ni Daud!
Nitiroi-Yamo to narata ri rara sanga ni Pue!
Unemo Allatala to nalangko mpuu!”
10 Pesua ni Yesus ri Yerusalem, nagesoamo ngata ee. Pade tou-tou ri ngata ee nombepekutana: “Yema-da tou ei?”
11 Nesono-mo tou dea to nantutu i Yesus ee: “Ia ei-mo i Yesus, nabi lako ri Nazaret ngamba Galilea.”
I Yesus nopagasa Sou nu Allatala
21:12-17
12 Naopu ee, nesua-mo i Yesus ri karawaa Sou nu Allatala, pade nowura sumawee topobalu-balu bo topangoli isee. Ia nokalibantua meja-meja nu topopagoli doi pade poncundaa-poncundaa nu topobalu tonci banggebodo. 13 Pade nanguli-Yamo ri tou-tou ee: “Ri rara Buku Nagasa nitulisi: Sou-Ku kana rakasangai sou posambayaa. Agiana nipajadi-mi potobua nu topangio-damo!”
14 Naopu ee, naratamo tou-tou to naburo pade to napungku si Yesus ri Sou nu Allatala ee, pade isira sumawee nipakabelo-Na. 15 Agiana tobalia-tobalia ri matana pade topande-topande ri Buku Taurat nasodo nangkalio kadupaa-kadupaa to nipowia ni Yesus. Pade isira mbii nasodo apaa namparonge ngana-ngana ngare-ngarena nadonu ri sou nu Allatala ante nanguli: “Matuwumo Muli ni Daud!” 16 Nanguli-ra si Yesus: “Nironge-Muda nuanu to niuli-ra edou?” Nesono i Yesus: “Io, nironge-Ku. Tadopa naria nibasa-mi isi nu Buku Nagasa to nanguli: Ngana-ngana pade ngana to lako niote nipatuduki-Mu ramo bona manguli dodia peune to nabelo mpuu?”
17 Naopu ee nipaleisi-ramo ni Yesus, pade nangkosu lako ri ngata ee nalou ri Betania pade nasambengia isee.
I Yesus nampokaranalaka kou ara
21:18-22
18 Sangkaba-baa kaneilena, nolumakomo i Yesus ante ana-ana guru-Na manculi ri ngata Yerusalem. Ranca-ra nolumako, naoromo i Yesus. 19 Nikalio-Namo sampuu kou ara ri soso dala. Nalou-Yamo nojungkuki kou ee, agiana tado namo saongua wua-na nirata-Na, kawule tawa-na narumbu. Nangulimo i Yesus ri kou ee: “Mopamula lako ri eo ei, tado-mo mowua-ko duuna masae-sae!” Bulawee ee mbii, nalalomo kou ara ee. 20 Pangkalio nu ana-ana guru-Na kajadia ee, nakioma-ramo, pade nepekutana: “Beiwa pade kapola-pola namate sumampuu-mo kou ara etu?” 21 Nesono i Yesus: “Ku'ulikaka komi, ande ikomi meparisaya pade tado morandua rara-mi, kana mamala komi mowia nuanu to nipowia-Kumo ri kou ara ei. Pade tado kawule ee ngkola mbii, agiana ikomi kana mamala manguli ri bulu ei: ‘Kateongkomo pade katetadimo ri rara ntasi’, nuanu etu kana majadi. 22 Nuapa-pa to mi-perapi ri rara nu sambaya-mi, ande mi-parisaya, kana mi-tarima.”
Pepekutana nancambelai kuasa ni Yesus
21:23-27
23 Naopu ee nesuamo i Yesus ri Sou nu Allatala pade nepatuduki isee. Ranca-Na nepatuduki, naratamo tobalia-tobalia ri matana pade topangkeni-topangkeni to Yahudi namei si-Ya pade nepekutana: “Ante kuasa nuapa-Ko nowia sumaweena ee? Pade yema nambeikaka-Ko kuasa ee?” 24 Nesono i Yesus: “Yaku mbii madota mampekutana komi. Pade ande mi-sono, kana Ku'ulikaka komi ante kuasa ni yema-Ku nowia sumaweena ei. 25 I Yohanes nebaptis ante kuasa ni yema? Kuasa nu Allatala-da ba manusia-da?” Nombepololitakamo tobalia-tobalia ri matana pade topangkeni-topangkeni to Yahudi ee, pade nanguli: “Ande ta-uli ante kuasa nu Allatala, Ia kana mangulikaka-ta: Ande iweedae, nuapa pade tado niparisaya-mi i Yohanes? 26 Agiana ande ta-uli: Ante kuasa nu manusia, naeka mbii-tada ri tou dea apaa isira sumawee nanguli i Yohanes ei Nabi.” 27 Pade nisonoi-ramo i Yesus: “Tado nincani-ka.” Nangulimo i Yesus si sira: “Ande iweetu wea Yaku mbii tado madota manguli si komi ante kuasa ni yema-Ku nowia sumaweena ei.”
Porapaika nancambelai ngana rodua
21:28-32
28 Nanguli mbiimo i Yesus si sira: “Beiwa pamparata-mi nancambelai nuanu ei: Naria sadua to noana rodua ana baleilo. Naloumo tou ee ri ana-na ulumbua pade nanguli: Ana, koumo-ko mobago ri bonde anggur eo ei. 29 Nesono ana ee: Tado madota-ku malou. Agiana naopu ee nogolimo pekiri-na pade nalou-yamo ri bonde anggur ee 30 Naopu ee nalou mbiimo tou ee ri ana-na kasupua pade nanguli lolita ewa to niuli-na ri ana-na ulumbua. Nesono ana ee: Io, malou-kudamo. Agiana tado nalou-ya. 31 Jadi, lako riolo nu ngana rodua ee yema to nowia dota nu tuama-na?” Nesono-ra: “Ana ulumbua.” Nangulimo i Yesus si sira: “Parisayamo: Topedusu-topedusu balasitee pade bangkele-bengkele najeko kana mokoulu majadi todea ri rara Poparentaa nu Allatala. Tado ikomi. 32 Apaa i Yohanes Topebaptis narata pade nopanotosika komi dala ngkatuwu to nipodota ni Pue, tado nadota komi namparisaya pepatuduki-na. Topedusu-topedusu balasitee pade bangkele-bangkele najeko ngkola namparisaya-ya. Agiana noudamo nikalio pura-mimo sumaweena ee, tado oa nibali-mi pampapekiri-mi pade tado namparisaya i Pue.”
Porapaika nancambelai topobago-topobago bonde anggur
21:33-46
33 Nanguli mbii-mo i Yesus si sira: “Rongemo porapaika to sangayana ei mbii: Nariamo sadua tumpu bonde notuda anggur. Nipowia-namo wala natiku, pade nokae lowu popieaa anggur, pade nopatinda sou pojagaa ri rara bonde ee. Naopu ee ni popesewa-namo bonde anggur ee ri topobago-topobago, pade neongko-yamo nalou ri ngata ntani. 34 Naratapa tempona rapupu-mo wua nu anggur, nitudumo nu tumpu bonde ee batua-batua-na malou ri topobago-topobago bonde anggur ee bona mantarima bagia-na. 35 Agiana topobago-topobago bonde ee nosoko batua-batua nu tumpu bonde ee. To saduana ninampa, to ntanina nipatesi, pade to ntanina mbii niwunu-ra nu watu 36 Jadi, nitudu mbiimo nu tumpu bonde ee batua-batua ntanina, neliupa kadea-ra lako ri to nitudu-na lombona. Agiana isira mbii nipowia ewa batua-batua to nitudu lombona. 37 Kaopuana tumpu bonde ee nopakatu ana dodo-na damo nalou si sira, apaa nipekiri-na: Ana-ku ei kana rabila-ra. 38 Agiana pangkalio nu topobago-topobago bonde anggur ee ana nu tumpu bonde ee, nombeulikaka-ramo: Ha, ei-yamo topancosora bonde ei. Tumei-tamo mopatesi-ya, bona ikita damo mancosora bonde ei. 39 Pade nisoko-ramo ana ee, nikeni-ra ri sawaliku nu bonde, pade nipatesi-ra.” 40 Nipekutana-ramo ni Yesus: “Ande manculi tumpu bonde ee ngoni, nuapamo to kana napowia ri topobago-topobago ee?” 41 Nesono-ra: “Ia kana mopatesi tou-tou to nadaa ee, pade mampopesewaki bonde anggur ee ri tou ntani to madota mambei bagia lako ri uli nu bonde ee si-ya ande maratapa tempona.” 42 Nangulimo i Yesus si sira: “Tadopa naria nibasa-mi nuanu nitulisi ri rara Buku Nagasa ewa ei?:
Watu to nitadiaka nu basi
najadi watu to niparalou ntotomo.
Ei-mo to nipowia ni Pue,
nabelo mpuu!”
43 Nanguli mbiimo i Yesus: “Ku'ulikaka komi, sumawee nuanu to najadi bagia-mi ri Poparentaa nu Allatala, kana ra'ala lako si komi pade rawei ri tou ntani to nantutu dota nu Allatala.
44 [Pade tou to manawu ri watu ee, ia kana marogatei, pade tou to naparuncu nu watu ee, kana marututei.”]