I Zakheus
19:1-10
19
1 Karata ni Yesus ri Yerikho, nolumako mpapola oa-Yamo nampaliu ngata ee. 2 Ri ngata ee naria sadua topangkeni topedusu balasitee to nasugi. Sangana i Zakheus. 3 Ia madota mangkalio yema i Yesus ee, agiana apaa nadea gaga tou pade ia mbii naboko, jadi tado namala-ya nangkalio i Yesus. 4 Pade nokumbeno-yamo nampalelumi tou-tou ee, pade nentode sampuu kou, bona mamala na-kalio i Yesus moliu isee.5 Karata ni Yesus ri toto nu kou ee, nitingara-Namo ri wumbuna pade nanguli: “Zakheus, pesompomo-ko magasi! Apaa eo ei-Ku madota masambengia ri sou-mu.”
6 Nagasi-gasimo i Zakheus nesompo nampotomuka i Yesus ante donu rara-na. 7 Sumawee tou to nangkalio nuanu ee, nokangua. Nanguli-ra: “Ha, malou mosaroa ri sou nu tou to najeko-Ya!”
8 Tempo-ra ri sou-na, nokongkoremo i Zakheus pade nanguli si Yesus: “Pue, santongo lako ri gagu-ku ei kana ku-wei ri to petowei pade ande naria nuanu nibagiu-ku lako ri sadua tou kana ku-popanculi aopo ngkani kadeana.”
9 Pade niulimo ni Yesus: “Eo ei ikomi ri sou ei nipakasalama nu Allatala, apaa eo ei mbii natantu mpuumo kaparisaya-mu nasimbei ante kaparisaya ntotua-mu i Abraham. 10 Apaa, Yaku, Ana Manusia narata bona mangonco pade mampakasalama tou to napusa.”
Porapaika nancambelai doi bulawa
19:11-27
11 Ranca nu tou namparonge oa dapa i Yesus nololita, niuli-Namo sangaya porapaika. Apaa tempo ee najungku-Yamo ri Yerusalem, pade nipekiri nu tou rakalio-ramo bulawee ee Allatala moparenta majadi Mbagou ri dunia. 12 Nanguli i Yesus: “Nariamo sadua maradika nalou ri ngata to nakawao bona raongko majadi mbagou ri ngata ee, pade maopu ee manculi-yamo. 13 Moliwo-yapa meongko, nipokio-namo sampulu batua-na pade ni weikaka-na doi bulawaa sore sampeka-ra. Niuli-na si sira: Pagolimo doi ei bula-ku malou.
14 Agiana todea ri ngata ee nampodaa-ya. Jadi, neongko-yapa, nipakatu-ramo suro bona manguli: Tado madota-ka ande tou ei majadi mbagou-ka!
15 Agiana maradika ee kana nipelisi-yada najadi mbagou, naopu ee nanculi-yamo ri ngata-na. Nipokio-namo batua-batua-na mamei si-ya, bona na-ncani basangkiamo kadea nu doi to nipagoli-ra. 16 Naratamo batua to paramula-na pade nanguli: Maradika, sampeka doi bulawa to niweikaka-mu ku najadi sampulu mpekamo.
17 Nanguli maradika ee ri batua-na ee: Nabelo mpuu-da nuanu to nipowia-mu etu, iko ei batua to nabelo! Apaa iko natundu ri kara-kara kodi, jadi tarimamo kakuasaa mangkakamu sampulu ngata.
18 Narata mbiimo batua karoduana pade nanguli: Maradika, sampeka doi bulawa to niweikakamu-ku ee ni pajadiku alima-mo.
19 Nangulimo mbagou ee ri batua-na ee: Iko makuasa mangkakamu alima ngata.
20 Pade narata mbiimo batua-na katotoluna, nanguli: Maradika, eimo doi bulawa to niweikaka-mu ee, niboli dodo-ku ri rara nu pasapu. 21 Naeka-ku siko maradika, apaa iko tou naseke. Iko nangala nuanu to tado nuanu dodo-mu, pade nampepae lako ri nuanu to tado nituda dodo-mu.’
22 Nangulimo mbagou ee si-ya: Iko batua to nadaa! Nantutu lolita dodo-mu, kana ku suku-ko. Nincani-muda yaku tou naseke, nangala nuanu to tado nuanu dodo-ku pade nampepae lako ri nuanu to tado ni tuda dodo-ku. 23 Ande iwee dae nuapa pade tado ni wei-mu doi-ku ee ri tou to namala nopagoli doi? Bona ande manculi-ku mamalamo ku-ala nculi ante anana! 24 Naopu ee nangulimo mbagou ee ri tou-tou to nokongkore isee: Alamo doi etu lako si-ya pade wei ri batua to naria sampulu doi bulawa ee!
25 Agiana tou-tou ee nanguli: Maradika, ia nariamo sampulu doi bulawa!
26 Nesono mbagou ee: Ku'ulikaka komi, butu dua tou to nariamo si-ya, ia kana raweikaka madea mbiipa. Agiana yema to tado nakariaa, nuapa to naria si-ya kana ra'ala pura mbii. 27 Pade bulawee ee kenimo tumei bali-bali-ku etu to tado nadota-ra yaku majadi mbagou-ra. Patesi-ramo sumawee ri ngayo-ku!”
I Yesus nipemabose ri Yerusalem
19:28-44
28 Noupupa i Yesus nanguli sumaweena ee nolumako-Yamo nampokoului-ra pade nopapola polumakoa-Na malou ri Yerusalem. 29 Najungkupa ri Betfage pade Betania ri bulu Zaitun, nitudu-Namo rodua ana guru-Na mokoulu. 30 Nanguli-Ya si sira: “Koumo komi ri ngata kodi ri ngayo-mi edou, ande mesuapa komi ri ngata ee, kana mikalio sambaa keledai pagurua nitaka. Keledai ee tadopa naria nisawi ntou. Kakasimo keledai ee, pade kenimo tumei. 31 Pade ande maria tou mampekutana komi: Nuapa pade nikakasi-mi keledai etu? Sonomo ewa ei: I Pue namparalou.” 32 Nalou mpuumo rodua ana guru-Na ee. Pade nirata-ra sumawee najadi ewa nuanu to niuli-Na ee. 33 Ranca-ra nokakasi keledai ee, nangulimo tumpu keledai ee: “Nuapa pade nikakasi-mimo keledai etu?”
34 Nesono-ra: “I Pue namparalou keledai ei.” 35 Pade nikeni-ramo keledai ee si Yesus. Naopu ee nilampini-ramo keledai ee ante powaru ndoe-ra pade notoundaka i Yesus nencawi keledai ee. 36 Bula ni Yesus noliu nencawi keledai ee, tou-tou nowente powaru ndoe-ra ri dala.
37 Mapara maratapa i Yesus ri Yerusalem, ri pompanouaana ri bulu Zaitun, sumawee topantutu-Ya ee nopamula-ramo nongare-ngare nangune Allatala pade nosukuru si Yesus, apaa sumawee kakuasaa nikalio dodo-ramo kadupana. 38 Nongare-ramo:
“Nitiroimo Mbagou to narata, to nitudu nu Allatala.
Nasanamo ri rara suruga, pade niunemo Allatala!”
39 Basangkia dua to Farisi lako riolo nu tou dea ee nanguli si Yesus: “Guru, tudumo ana-ana guru-Mu malino.”
40 Nesono i Yesus: “Ku'ulikaka komi, ande isira ei malino, watu-watu ei kana mongare.”
41 Najungkupa i Yesus ri Yerusalem, nipokeosi-Namo ngata ee, 42 nanguli-Ya: “Piondo, nabelo mpuupa ande eo ei mu-ncani nuapa to mamala mampakarata posingkabelo. Agiana bulawee ee iko tado namala nangkalio-ya. 43 Sabana kana marata tempona, bali-mu kana mantoleliki-ko, pade mamparusu-ko lako ri sumawee soki-sokina. 44 Pade isira kana mampakaropu-ko ante todea-mu pade tado-namo saongua watu mombesuncu ri wumbu nu watu ntani-na, apaa tado nincani-mu tempona, neipia Allatala marata mampakasalama-ko, Yerusalem.”
I Yesus nopagasa Sou nu Allatala
19:45-48
45 Nesuamo i Yesus ri karawaa Sou nu Allatala pade nopamula-Yamo nowura sumawee topobalu-balu isee. 46 `Nanguli-Ya si sira: “Naria nitulisi ri rara Buku Nagasa: Sou-Ku kana rapajadi sou posambayaa. Agiana ikomi nopajadi pearia nu tou daa!’ ”