Porapaika nancambelai topobotusi kara-kara to tado nanoa
18:1-6
18
1 Naopu ee nilolitamo ni Yesus sangaya porapaika nopatuduki ana-ana guru-Na, bona mosambaya oa-ra pade nemo masue rara. 2 Niuli-Na: “Ri saongu ngata, naria sadua topobotusi kara-kara to tado naeka ri Allatala pade tado netapari noupa yema. 3 Ri ngata ee mbii naria sadua tobalu, to narata oa ri topobotusi kara-kara ee nerapi bona ratunduka ri rara nu kara-kara-na. Nanguli tobalu ee: Tulungikua-ku mantingayosi bali-ku. 4 Basangkia saena topobotusi kara-kara ee tado nadota nantulungi tobalu ee. Agiana kaopuana topobotusi kara-kara ee nampekiri: Noudamo yaku ei tado naeka ri Allatala pade tado nantapari yema-yema, 5 agiana apaa namei oa tobalu ei nampawayoti-ku, agilou-namo kutunduka kara-kara-na. Apaa ande tado, kana mamei oa-yamo mampawayoti-ku.”6 Pade nangulimo i Yesus: “Peirara-mo nuapa to niuli nu topobotusi kara-kara to tado nanoa ee! 7 Nedamorauli Allatala, Ia kana mantunduka kara-kara todea dodo-Na to nerapi si-Ya eo bengina. Tado naria-Ya notento-tento mantulungi-ra. 8 Ku'ulikaka komi: Ia kana magasi-gasi mantunduka kara-kara-ra! Agiana, ande Yaku, Ana Manusia marata, mariadapa Ku-rata tou to namparisaya-Ku ri dunia ei?”
Porapaika nancambelai to Farisi ante to pedusu balasitee
18:9-14
9 Nilolita mbiimo ni Yesus porapaika ei to niwunuka-Na ri tou to nampandaente tou ntani-na, agiana nampangaku koro-na nabelo. 10 Nanguli i Yesus: “Naria-mo rodua tou to nalou ri karawaa Sou nu Allatala mosambaya. Sadua to Farisi pade to sadua-na topedusu balasitee. 11 To Farisi ee nokongkore nopatani pade nosambaya: Oo Allatala, yaku nosukuru si-Ko, apaa yaku ei tado ewa tou ntani-na, to norampaki nuanu ntou, to nebagiu, ba to nobualo, pade tado ewa topedusu balasitee edou. 12 Yaku nopuasa rongkani saminggu, pade yaku nambei si-Ko sampulu bagia lako ri sumawee pamparata-ku.
13 Agiana to pedusu balasitee ee nokongkore nakawao, pade tado ntoto na-naa nantingara langi. Pade notitimbolu bambara-na apaa nancoso rarana, nanguli: Oo Allatala, potowekua-ku to najeko ei.
14 Ku'ulikaka komi: Tempo-ra nanculi ri sou, to pedusu balasitee ee-mo to niparikonoi nu Allatala, tado to Farisi ee. Sabana yema-yema to mampakalangko rara-na kana rapakarede, pade yema-yema to mampakarede rara-na kana rapakalangko.”
I Yesus nantiroi ngana-ngana
18:15-17
15 Basangkia dua tou nangkeni ngana-ngana kodi si Yesus bona Na-kakamu pade motiroi-ra. Pangkalio nu ana-ana guru-Na nuanu ee, niposodo-ramo tou-tou ee. 16 Agiana i Yesus nampokio ngana-ngana ee, pade nanguli ri ana-ana guru-Na: “Palambakamo ngana-ngana etu mamei si Yaku! Nemo mitagi-ra, apaa tou ewa isira etumo to masipato majadi todea nu Allatala ri Poparentaa-Na. 17 Ku'ulikaka komi: Tou to tado matundu Ri Allatala ewa sadua ngana kodi, kana tado mamala-ra majadi todea nu Allatala ri Poperantaa-Na.”
To nasugi nakaja mesua ri Poparentaa nu Allatala
18:18-27
18 Naria sadua topangkeni to Yahudi nampekutana i Yesus: “Guru to nabelo, nuapa-mo to kana kupowia bona mamala-ku mantarima tuwu liu-liu?”
19 Nesono i Yesus: “Nuapa pade niulikaka-mu Ku to nabelo? Tado namo yema to nabelo, sangadina Allatala ngkola. 20 Nincani-mumo parenta-parenta nu Allatala: Nemo mobualo, nemo mepatesi, nemo mangio, nemo maboa, pade mubilada tuama-mu ante tina-mu.”
21 Nesono tou ee: “Sumawee parenta etu nitutu-kumo lako ri kangura-kudapa.”
22 Namparonge ee, nangulimo i Yesus: “Nariapa sangaya to kana mu-powia: Balu-mo sumawee gagu-mu, weimo doina ri tou to netowei, bona iko kana mamparata gagu ri suruga. Maopu eeda pade mamei-ko mantutu-Ku.”
23 Agiana pamparonge ntou ee, nasusamo raraa-na apaa nasugi mpuu-ya.
24 Nincanida ni Yesus tou ee nasusa mpuu rara-na, eemo sabana pade nanguli-Yamo: “Nakaja mpuu to nasugi majadi todea nu Allatala ri rara Poparentaa-Na! 25 Nagampangipa saongu unta mesua ri kamboa nu jaru, pade to nasugi majadi todea nu Allatala ri rara Poparentaa-Na.”
26 Tou-tou to namparonge i Yesus nanguli ewa elouria, nepekutana: “Ande iweetu wea, yemada mamala rapakasalama?”
27 Nesono i Yesus: “Nuanu to tado mamala napowia nu manusia, mamala napowia nu Allatala.”
Tombo mantutu i Yesus
18:28-30
28 Pade nangulimo i Petrus: “Beiwa ante ikami? Nipawia pura-kamo sumawee nuanu to naria si kami pade nantutu-Ko.”
29 Nanguli i Yesus si sira: “Ku'ulikaka komi, kakono-konona butu dua tou to nampawia sou-na, bangkele-na ba sarara-na, totua-na ba ana-ana-na sabana nampopowole ri tou ntani nancambelai Poparentaa nu Allatala, 30 tou ee kana mantarima nculi melabipa kadeana ri tempo ee mbii, pade ri eo ngkapurina ia kana mantarima tuwu liu-liu.”
Pepoparonge katolungkanina nancambelai kapepaa ni Yesus
18:31-34
31 Nipasintobumo ni Yesus sampulu rodua ana-ana guru-Na mopatani pade niulikaka-Na: “Ronge! Bulawee ei mbii ikita kana malou ri Yerusalem, pade radou sumawee to nitulisi nu nabi-nabi nancambelai-Ku, Ana Manusia kana rapadupa. 32 Yaku kana rawei ri tou-tou to tado to Yahudi, to kana mampowadi-wadi, mangkanene, pade manteilusi-Ku. 33 Isira kana moduasi pade mopatesi-Ku, agiana ri eo katolueona, Yaku kana matuwu nculi.”
34 Sumawee ee tado namo saodia nincani nu ana-ana guru-Na ee. Batua nu lolita-lolita-Na ee niwunika si sira. Tado nincani-ra ba nuapa niuli-Na.
I Yesus nampopekalio sadua toburo najungku ri Yerikho
18:35-43
35 Tempo ni Yesus mapara maratamo ri Yerikho, naria sadua toburo noncunda ri soso dala pade nerapi-rapi. 36 Pamparonge-na tou dea ee noliu, nepekutana-yamo: “Nuapada etu tulou?”
37 Nisonoi-ra toburo ee: “I Yesus to Nazaret ee noliu.”
38 Pade nongaremo toburo ee: “Yesus, muli ni Daud, potowe-ku!” 39 Tou-tou to nolumako nokoulu namposodo-ya, pade nantudu-ya malino. Agiana narimboso ntotopa pongare-na: “Muli ni Daud, potowe-ku!”
40 Neuntumo i Yesus pade nantudu tou mangkeni toburo ee si-Ya. Karatana isee nipekutana-yamo ni Yesus: 41 “Nuapa mu-podota Ku powiaka-ko?”
Nesono toburo ee: “Pue, yaku madota mekalio!”