Basangkia ngaya pepatuduki
17:1-6
17
1 Nangulimo i Yesus ri ana-ana guru-Na: “Kana maria nuanu najadi saba pade mangkajadika tou mowia jeko. Agiana maweso-mo tou mowia sabana ee. 2 Agilounamo watu pogilia raloe ri tambolo-na pade tou ee ratadiaka ri rara ntasi, bona nemo mowia saba-ya mangkajadika maria sadua lako ri tou-tou to tado naroso kaparisaya-na ei majeko. 3 Etumo sabana mainga-da.Ande sarara-mu mowia jeko, ontika-ya. Ande nasoso-mo rara-na, ampungi-ya. 4 Ande mowia jeko-ya siko pitu ngkani rara-na saeyo, pade butu ngkanina mowia jeko ee mamei oa-ya siko meranga mpale, ampungi-ya.”
5 Pade nangulimo suro-suro ee si Pue Yesus: “Pue, pakaroso kaparisayaa-ka.” 6 Nesono i Yesus: “Ande maria kaparisaya-mi noudamo ewa kabete besa nu sesawi ngkola, mamala komi manguli ri kou ara ei: Katewukamoko pade matetuda ri tasi! Kou ee kana mantutu parentamu.”
Maradika pade batua
17:7-10
7 “Rapana sadua lako si komi naria batua-na nopajeko ri bonde ba noewu bimba. Ande manculi-pa batua ee nariada-ko nanguli: Magasi-ko mamei mangkondi? 8 Kana tado! Agiana kana mu'uli ri batua ee: Pasadiaka-ku kondia. Pakemo powaru-mu to narawa, pade peagika-ku bula-ku mangkondi pade manginu. Maopu ee-da pade mamala-ko mangkondi.’ 9 Nariada komi nosukuru ri batua ee, sabana batua ee nowiamo nuapa to niparentaka-ya? 10 Iweetu mbiimo ikomi. Ande nipowiamimo sumawee to niparentaka komi, ulimo: Ikami ei kawule batua to nampowia nuanu to kana kapowia.”
Sampulu to nadua bose
11 Ri rara mpolumakoa nalou ri Yerusalem, i Yesus noliu ri posioloa ngamba Samaria pade Galilea. 12 Pesua-Na ri saongu ngata kodi, namei-mo si Yesus sampulu to nadua bose. Isira ee nokongkore ri kakawaoaa-na 13 Pade nongare-ramo: “Yesus, Guru, potowe-ka kami!”
14 Pangkalio-ra ni Yesus, niuli-Namo: “Kou-mo komi ri tobalia-tobalia-mi, perapimo bona rakalio-ra koro-mi.”
Ranca-ra nolumako nabelomo dua-ra. 15 Panguncani-pa nu sadua lako si sira nabelomo dua-na, nanculiki-yamo ante nongare-ngare lako nangune Allatala, 16 pade notumbukotu-yamo ri ngayo ni Yesus, pade nosukuru si-Ya. Tou ee to Samaria.
17 Naopu ee nanguli-mo i Yesus: “Tado sampulu to nipakabelo? Riumba-mo to sasio-pa? 18 Nuapa pade kawule tou tado to Yahudi ei ngkola nanculi nosukuru ri Allatala?” 19 Pade nanguli-mo i Yesus ri tou ee: “Peongkomo-ko pade koumo-ko. Apaa niparisayamu-Kuda, naorimo dua-mu.”
Karataa Poparentaa nu Allatala
17:20-37
20 Basangkia dua to Farisi nepekutana si Yesus neipiamo Allatala marata moparenta. Nesono i Yesus: “Poparentaa nu Allatala tado rapamula ante pampetonondi-pampetonondi to mamala rakalio nu tou, 21 mangkajadika tou mamala manguli: Kalio, ei-yamo! Ba emei-ya ria! Apaa kakono-konona, Poparentaa nu Allatala nariamo ri tongo-tongo-mi.”
22 Naopu ee nangulimo i Yesus ri ana-ana guru-Na: “Kana marata tempona ikomi madota mamparasai kambana saeyo ngkolamo lako ri eo karataa Poparentaa-Ku, Ana Manusia, agiana tado mamala mi-rasai. 23 Tou-damo ngoni kana manguli si komi: Kalio, emei-ya! Ba: Kalio, isei-ya! Agiana nemo mesuwu komi mangonco-ya. 24 Ewa pebibi nu kila ri langi pade newanta lako ri wuntuna tudu ri wuntuna, iwee mbiimo ngoni karataa-Ku, Ana Manusia ri eona. 25 Agiana paramulana, Yaku kana madea mantodosaka kapepaa pade naporou nu tou-tou ngkapuri ei.
26 Nasimbei ante inggu nu tou-tou to natuwu ri tempo ni Nuh impia, iwee mbiimo ngoni to kana majadi ri eo karataa-Ku, Ana Manusia. 27 Tou nangkondi bo nanginu, pade samata nourusi toponcamboko. Iwee oamo najadi duuna nesua i Nuh ri rara duanga bete, pade naratamo ue bose nololo sumawee tou ee duuna namate. 28 Iwee mbii ri tempo ni Lot impia. Tou nangkondi bo nanginu, nobalu-balu, nantuda pade nopatinda sou. 29 Agiana nesuwupa i Lot lako ri Sodom, ri eo ee mbii nanoumo apu pade watu mporiria lako ri langi pade nampakaropu pura-ra. 30 Iwee mbiimo ngoni inggu nu manusia ri eo karataa-Ku, Ana Manusia. 31 Ri tempo ee, tou ranca-na ri wumbu nu sou-na, nemo mesompo mangala dagana-dagana ri rara nu sou-na. Iwee mbiida tou to ranca-na ri bonde nemo manculi ri sou-na. 32 Mi-tora nuapa to najadi ri bangkele ni Lot! 33 Tou to nampesimbukui mampakasalama katuwu-na, kana maronto tuwu-na. Agiana yema-yema tou to naronto tuwu-na sabana nantutu-Ku, ia kana masalama. 34 Ku'ulikaka-ka komi: Ri tempo ee ngoni, rodua tou bula-ra naleta ri saongu paletaa, sadua kana mateongko pade sadua kana maboli. 35 Rodua bangkele bula-ra nogili gando, sadua kana mateongko pade sadua kana maboli.
[ 36 Rodua tou bula-ra nobago ri bonde, sadua kana mateongko, pade sadua kana maboli.]” 37 Nepekutanamo ana-ana guru-Na: “Riumba nuanu ee majadi, Pue?”
Nesono i Yesus: “Riumba naria nuanu namate, isee mbii nosintobu tonci kaloa.”