Sou nu Allatala kana rapakarobo
24:1-2
24
1 Nesuwu-pa i Yesus lako ri Sou nu Allatala, naratamo ana-ana guru-Na namei si-Ya pade notudo sou-sou to naria ri karawaa Sou nu Allatala ee. 2 Nanguli i Yesus si sira: “Nangkalio kagaya sou-sou etu komi? Bona mi-ncani, tado maria namo saongua watu nu sou-sou etu maboli mombe suncu ri peariana. Sumaweena kana rapakarobo.”Paramula nu kapepaa
3 Naopu ee naloumo i Yesus ri Bulu Zaitun, pade ranca-Na noncunda isee, naratamo ana-ana guru-Na nampololitaka-Ya bongo-bongo. Nanguli-ra: “Guru, ulikaka-ka neipia sumawee nuanu niuli-Mu ee see kana majadi? Nuapa pampetonondi karata-Mu pade pampetonondi kaopu nu dunia?” 4 Nesono i Yesus: “Mainga-da komi, nemo matebagiu komi. 5 Sabana madea tou kana marata ante mampobalu sanga-Ku pade manguli: Yaku-mo Mbagou Topepakasalama to nitipa nu Allatala, pade madea tou to kana rabagiu-ra. 6 Ikomi kana mamparonge wotu-wotu nu poiwali pade kareba-kareba nu poiwali, agiana nemo maeka. Sabana sumaweena ee kana majadi, agiana tadopa kaopua nu dunia ee. 7 Ngata to saonguna kana mangewa ngata ntanina, pade kambagouaa to saonguna kana mangewa kambagouaa ntanina. Riumba-riumba kana majadi oro mpei bo linu. 8 Sumaweena ee paramulana-dapa ngkola, ewa dua to nitodosaka nu sadua bangkele to moliwo moana.
9 Ri tempo ee ikomi kana rasoko pade rawei bona raduasi bo rapatesi. Sumawee dunia kana mampodaa komi, apaa ikomi topantutu-Ku. 10 Ri tempo ee madea tou kana mobali kaparisayaa-ra, pade mepanawu bo mombepodaa. 11 Madea nabi-nabi to tado nakono meonga pade madea tou rabagiu-ra. 12 Inggu nadaa kana mowolea madea mpuu mangkajadika madea tou tado-mo mampotowe singkapada manusia. 13 Agiana tou to mentida duuna kaopuana kana rapakasalama. 14 Pade Kareba Belo nancambelai beiwa Allatala moparenta kana raparata ri sumawee dunia, bona sumawee tou kana mamparonge. Maopu ee-da pade marata-da kaopu nu dunia.”
Peduasi ntomo pade Mbagou-mbagou topepakasalama to tado nakono
24:15-28
15 “Ikomi kana mangkalio sadua to nadaa mpuu to nipodaa nu Allatala, mokongkore ri pearia to nagasa, ewa to niuli ni nabi Daniel. (Tou to nobasa lolita ee kana napeirara batuana!) 16 Ri tempo ee, tou to natida ri ngamba Yudea kana mangani ri bulu. 17 Tou naria ri wumbu nu sou nemo mesompo pade mesua mangala banuapa-pa lako ri rara nu sou. 18 Tou naria ri bonde nemo manculi mangala powaru ndoe-na. 19 Ri eo ee mapepa mpuu narasai nu bangkele to notiana, pade bangkele to nopasusu ana-na, apa santongo mate mpuu-ra mangani. 20 Posambayamo bona ikomi nemo ngoni mangani bula nu lengi ba bula nu Eo Peuntua. 21 Ri eo-eo to nepakaekai ee kana maria kasusaa bete ewa to tadopa naria najadi lako ri paramula nu dunia nipajadi duuna ri eo ei, pade tado-mo maria majadi ngoni ri eo ngkapurina. 22 Ande rapana tado rapakagasi nu Allatala tempo peduasi ee, natantumo tado namo sadua tou masalama. Agiana apaa towe rara nu Allatala ri todea-Na, nangkajadika Allatala kana mampakagasi tempo peduasi ee.
23 Ri tempo ee ande maria tou manguli si komi: Kalio, Mbagou Topepakasalama to nitipa nu Allatala ee naria isei, ba emei Ya-ria, nemo mi-parisaya tou ee. 24 Sabana ngoni kana maria meonga tou-tou to nangaku mbagou topepakasalama bo tou-tou to nangaku nabi, ntanono tado. Isira kana mowia parabuata-parabuata to meliu mpuu, pade mowia kadupaa-kadupaa bona mobagiu tou. Ande mamala, noudamo todea nu Allatala to nipelisi-Na rabagiu-ra mbii. 25 Jadi, toramo! Niulikaka ami-Kumo komi nokoulu noudamo tadopa najadi nuanu ee. 26 Ande maria tou manguli si komi: Kalio, Mbagou Topepakasalama to nitipa nu Allatala ee emei Ya-ria ri tongo mpada bei, nemo malou komi isee. Ba ande maria tou manguli: Kalio, nentabongo isei-Ya, ri rara nu kamara, nemo mi-parisaya. 27 Sabana eo karataa Ana nu Manusia ewa kila nebibi lako ri mataeo, pade mewanta tudu ri kasoloa. 28 Riumba maria binata mamate, isee kana naria tonci to pangkondi binata namate.”
Karataa nu Ana Manusia
Porapaika nancambelai kou ara
24:29-36
29 “Tadomo nasae naopu kasusaa ri tempo ee, eo kana majadi madedi, pade wula tadomo mewanta. Betue-betue kana manawu lako ri langi, pade sumawee to nakuasa ri laerawa kana mosimpogaara. 30 Maopu ee pampetonondi karata Ana nu Manusia kana manoto rakalio ri langi. Ri tempo ee sumawee manusia ri dunia kana mokeo. Isira kana mangkalio, Ana nu Manusia marata ri wumbu nu gawu ante kakuasaa pade pampemabose to nabete mpuu. 31 Tabue bete kana rapopomomoni, pade Ana nu Manusia kana mantudu malaeka-malaeka-Na mopasintobu todea-Na lako ri aopo suno nu dunia, lako ri wuntu nu langi to sambirana, tudu ri wuntu nu Langi to sambira mbiina.”
32 “Alamo pepatuduki lako ri kou ara. Ande panga-pangana malusumo pade mopamula mencubemo tawana, mi-ncanimo bakote mapara mapokayomo. 33 Iwee mbii ande mi-kalio ngila ngayana ee majadimo, mi-ncanimo bakote najungku mpuumo tempona. 34 Ku'ulikaka komi, tadopa mamate pura tou to natuwu tempo ei, ngila ngayana to niuli-Ku ee majadimo. 35 Langi pade dunia kana malipo, agiana lolita-Ku bate-batena duuna masae-sae.
36 Tado naria to nanguncani neipia eo-na pade jaa-na, malaeka-malaeka ri suruga tado manguncani, Ana nu Allatala mbii tado nanguncani, kawule Tuama ngkola to nanguncani.”
Pedederi bona mainga
24:37-44
37 “Ande marata, Ana Manusia ngoni, tarina ewa ri tempo ni Nuh ngkoulu. 38 Ri eo-eo sintou tadopa narata ue bose ee, tou-tou nangkondi bo nanginu, pade noncamboko. Ewa ee oa-mo najadi butu eo-na duuna ri eo ni Nuh nesua ri rara nu duanga bete. 39 Tempo nu ue bose ee namparumpa-ra pura, lako nanoto-da rara-ra nuapa to najadi. Iwee mbii-mo ngoni tarina ande marata, Ana Manusia. 40 Ri tempo ee, ande maria rodua baleilo to ranca-ra nobago ri bonde: Sadua kana rakeni, pade sadua raboli. 41 Ande maria rodua bangkele to ranca-ra nogili gando: Sadua kana rakeni, pade sadua kana raboli. 42 Jadi, mainga-da, sabana tado nincani-mi neipia Pue-mi marata.
43 Toramo ei! Ande rapana tumpu sou nanguncani tinti sangkia kawengina to pangio marata, tantu tado maleta-ya, bona to pangio ee tado mamala mesua ri rara nu sou-na. 44 Ee-mo sabana, ikomi mbii kana mainga. Apaa Ana Manusia marata ri tempo to tado nincani-mi.”
Porapaika nancambelai batua to natundu pade batua to nadaa
24:45-51
45 Nanguli mbiimo i Yesus: “Ande rapana maria batua to natundu bo napande, ia-mo to kana naongko nu maradika-na majadi topoatoro batua-batua ntanina, bona ia mambeikaka-ra kondia ande maratapa tempona. 46 Masana mpuu batua ee ande manculi tumpu sou-na, pade mamparata-ya ranca-na nowia bago-na. 47 Parisayamo, maradika-na ee kana mampopatumpuka sumawee gagu-na ri batua ee. 48 Agiana ande batua ee madaa, ia kana manguli bongo ri rara-na: 49 Masae-dapa pade manculi-da maradika-ku. Pade nopamula-yamo nonampa batua-batua ntanina, pade nangkondi bo nanginu ante tou-tou nalangu. 50 Naopu ee nanculimo maradika-na ri eo bo jaa to tado nincani-ncani-na. 51 Nangkajadika batua ee kana raduasi mpuu-mpuu nu maradika-na, pade ratadiaka ri pearia nu tou-tou to nabelo wongko. Isee-ramo kana mokeo pade mantodosaka kapepaa.”