Sou nu Allatala kana rarobo
13:1-2
13
1 Tempo ni Yesus nesuwu nampawia karawaa Sou nu Allatala,
naria sadua lako ri ana-ana guru-Na nanguli:
“Guru,
kalio sou-sou edou,
kamata watu-watuna.
Nabete mpuu!”
2 Nesono i Yesus:
“Nangkalio sou-sou nabete edou-ko?
Tado-namo saongua ngoni watu nu sou-sou edou maboli mombesuncu ri peariana.
Sumaweena kana rarobo.”
Paramula nu kapepaa
13:3-13
3 Naopu ee naloumo i Yesus ri Bulu Zaitun,
pade noncunda nongayosi Sou nu Allatala.
Naratamo i Petrus,
i Yakobus,
i Yohanes pade i Andreas nampololitaka-Ya bongo-bongo.
4 Nanguli-ra si-Ya:
“Guru,
ulikaka kami,
neipia sumawee ee kana madupa?
Pade nuapa pampetonondi ande maratapa tempona?”
5 Nisonoi-ra ni Yesus:
“Maingada,
nemo rabagiu komi.
6 Madea tou marata mampobalu sanga-Ku pade manguli,
‘Yaku-mo Mbagou Topepakasalama,’
pade mobagiu tou dea.
7 Ande mi-ronge wotu-wotu to poiwali pade kareba-kareba to poiwali,
nemo maeka komi.
Sumawee ee kana rapadupa,
agiana tadopa kaopu nu dunia ee.
8 To sangatana kana moiwali mangewa to sangatana.
Kambagoua to saonguna kana moiwali mangewa kambagoua ntanina.
Riumba-umba kana maria linu bo narata nu oro mpei.
Sumawee ee paramula nu kapepaa ri wongko nu dunia ei dapa.
[To nantambei oa kantomona,
ewa dua to nitodosaka nu bangkele noana,
kasae-saeaa,
kadua-duaa.]
9 Kana mainga komi,
sabana ikomi ei kana rasoko bo rakeni ri ngayo topotangara.
Kana ranampa ri rara nu sou-sou penombaa.
Ikomi kana rakeni ri ngayo topoparenta-topoparenta pade mbagou-mbagou,
sabana ikomi ei topantutu-Ku.
Pade isee-mo loga-mi mampololita mancambelai-Ku si sira.
10 Kareba Belo lako ri Allatala ee kana rapopowole ri sumawee manusia ri dunia.
11 Pade ande rasoko komi pade rakeni ri topotangara agama,
nemo masusa rara-mi mampekiri nuapa nuanu miuli.
Agiana maratapa tempona rapopololita-mo komi,
uli-mo nuapa to niulikaka komi.
Apaa lolita mi-uli ee tado lolita dodo-mi,
agiana lolita to narata lako ri Inosa Gasa.
12 Kana maria tou mambei sarara-na bona rapatesi.
Iweetu mbii nuanu to majadi riolo nu tuama ante ana-na.
Ngana-ngana kana mangewa tina-tuamana,
pade mambei totua-ra bona rapatesi.
13 Ikomi kana rapodaa nu sumawee tou sabana ikomi topantutu-Ku.
Agiana yema to maroso peparisayana si Yaku duu-na kaopuana,
ia kana napakasalama nu Allatala.”
Kapepaa ntomo pade mbagou Topepakasalama to tado nakono
13:14-23
14 “Kana mikalio sadua to nadaa mpuu to nipodaa nu Allatala.
Tou ee mokongkore pade mampakarumu pearia to nitagika-ya.
(Yema-yema mobasa kana napeirara nuapa batuana) Tempo ee tou to natida ri ngamba Yudea kana mangani ri wumbu bulu.
15 Tou-tou to naria ri wumbu nu sou,
ande mesompoya nemo mesua-ya ri rara ncou mangala banuapa-pa.
16 Tou to naria ri bonde nemo manculi mangala powaru ndoe-na.
17 Metowei-mo bangkele-bangkele to notiana bo nopasusu ana-na ri tempo ee.
18 Mosambaya-da bona kajadia ee nemo majadi ranca nu eo daa.
19 Ri eo-eo kapepaa ee kana maria kasusaa to tadopa naria nadupa lako popamula nu Allatala nopajadi dunia duuna ngkapuri ei,
pade tado-mo maria mbii ngoni majadi.
20 Ande rapana tado napakagasi nu Allatala tempo kapepaa ee,
tado-namo saduaa tou masalama.
Agiana apaa nantora todea-Na,
Allatala nampakagasi tempo ee.
21 Ri tempo ee ande sadua manguli si komi:
‘Kalio,
Mbagou Topepakasalama ee naria isei!’
Ba ‘Kalio,
emei-Ya ria!’
Nemo mi-parisaya tou ee.
22 Apaa mbagou-mbagou topepakasalama to tado nakono pade nabi-nabi to tado nakono kana marata.
Isira kana mampowia kakuasa melabi-labi pade mampowia nuanu nadupa bona mampabagiu tou dea,
ande mamala ante todea nu Allatala mbii kana rabagiu.
23 Etumo sabana,
kana mainga komi!
Sumawee ee nipopanguncanika-Kumo komi noudamo tadopa najadi nuanu ee.”
Karataa nu Ana Manusia pade porapaika nancambelai kou ara
13:24-32
24 “Maliupa tempo nu kapepaa ee,
eo majadi madedi,
wula tado-mo mewanta.
25 Betue-betue manawu lako ri langi,
pade sumawee karampua nakuasa ri langi mosimpogara.
26 Pade ri tempo ee,
sumawee tou mangkalio-Ku,
Ana Manusia marata ri dunia nakeni mpesompo nu gawu ante sumawee kakuasaa pade pampemabose-Ku.
27 Yaku kana mantudu malaeka-malaeka-Ku mopasiromu tou-tou nipelisi-Ku lako ri aopo soki nu dunia,
lako ri wuntu-wuntu nu dunia marata ri wuntu-wuntu nu langi.”
28 “Ala-mo pepatuduki lako ri porapaika nancambelai kou ara.
Ande mi-kalio raa-raana motawa maroamo,
mi-ncanimo mapara mapokayomo.
29 Iweetu mbii,
ande mi-kaliopa sumawee nuanu niuli-Ku ee,
mi-ncanimo bakote najungkumo tempo-Ku marata.
30 Ku'ulikaka komi:
Kakono-konona sumawee kajadia ei kana majadi,
noudamo tadopa mamate pura tou natuwu ngkapuri ei.
31 Langi bo dunia mamala-da maopu,
agiana lolita-Ku ei bate-batena duu-na masae-sae.
32 Noudamo iwee,
tado-namo saduaa tou manguncani neipia eona ba neipia jaana.
Malaeka-malaeka ri suruga tado nincani-ra,
bo Yaku dodo,
Ana nu Allatala tado nanguncani,
aga Tuama-Ku ri suruga ngkola to nanguncani.”
Pepatuduki bona mainga
13:33-37
33 “Ee-mo sabana kana mainga bo majaga-jaga komi,
apaa tado nincani-mi neipia tempona.
34 Nuanu ee nasimbei ante tou to nampawia sou-na nalou ri kakawaosana.
Pade nantudu batua-batua-na mourusi sou-na,
nipakatantu-namo bago-ra sadua-sadua.
Topojaga wombo,
nitetesi-na bona mainga mpuu-mpuu.
35 Etumo i komi kana mainga,
apaa tado nincani-mi neipia tumpu sou ee manculi,
ba kinowia-da,
ba ntongo bengi-da,
ba parabaa-da,
ba sangkababaa-da.
36 Bona ande marata ncanora-ya,
tado narata ranca-mi maleta.
37 Nuapa niuli-Ku si komi ei,
niuli mbii-Ku ri sumawee tou,
bona kana mainga komi mopea karata-Ku!”