I Yesus nampomasala topande-topande ri Buku Taurat bo tou-tou to Farisi
23:1-36
23
1 Naopu ee nangulimo i Yesus ri tou dea bo ri ana-ana guru-Na: 2 “Topande-topande ri Buku Taurat pade tou-tou to Farisi namparata kakuasaa mopatudukika parenta Taurat to niwei ni Musa. 3 Ee-mo sabana ikomi kana matundu bo mantutu nuanu to nipatudukika-ra komi. Agiana nemo mi-tutu inggu-ra, apaa isira dodo tado nampowia nuanu to nipepatudukii-ra. 4 Isira namperapi bona mampowia ada-ada to nakaja pade nambei parenta-parenta to nantomo, agiana tado nadota-ra nantulungi tou bona mowia parenta ee. 5 Sumawee nuanu to nipowia-ra bona kawule nakalio nu tou ngkola, isira nampake pampetonondi katundu-ra si Pue ewa pambolia tulisia isi nu Buku Nagasa to nipataka-ra ri wingke bo ri pale-ra, pade nampakalanga renda nu powaru ndoe-ra. 6 Nipobelo-ra noncunda ri poncundaa to nabelo ri posusaa, pade poncundaa to nibila ri sou penombaa. 7 Nipobelo-ra nabila nu tou ri potomu, pade nadonu-ra ande rapokio nu tou Guru. 8 Agiana ikomi, nemo madota rapokio Guru, apaa guru-mi sadua ngkola-da, pade ikomi sumawee nosarara. 9 Pade nemo mi-pokio bayema-yema ri dunia ei Tuama, apaa Tuama-mi kawule sadua ngkola, Ia-mo Tuama to ri suruga. 10 Pade nemo madota komi rapokio topangkeni, apaa topangkeni komi kawule sadua ngkola, Ia-mo Mbagou Topepakasalama. 11 Tou to nabete riolo-mi, kana majadi batua-mi. 12 Tou to nampakalangko rara-na kana rapakaede, pade tou nampakaede rara-na kana rapakalangko. 13 Mawesomo komi, topande-topande ri Buku Taurat pade ikomi tou-tou to Farisi! Ikomi to nabelo wongko, apaa ikomi nampalawa tou bona majadi todea nu Allatala. Ikomi dodo tado nadota najadi todea nu Allatala, pade tou ntani to madota, nilawa-mi.
14 [Mawesomo komi, topande-topande ri Buku Taurat pade tou-tou to Farisi. Ikomi tou-tou to nabelo wongko, apaa ikomi nampabagiu tobalu-tobalu pade norampaki sou-ra. Pade bona motalendusi inggu-mi to nadaa ee, nosambaya komi nipakalanga-langa-mi. Ee-mo sabana mantomo mpuu ngoni suku to kana mi-tarima.]
15 Mawesomo komi, topande-topande ri Buku Taurat pade tou-tou to Farisi, ikomi tou-tou to nabelo wongko, apaa ikomi nalou ri kakawaosana newote tasi, pade nampebutu lorena nangonco kambana saduamo tou mesua mantutu kaparisayaa-mi. Mesuapa tou ee mantutu kaparisaya-mi, ikomi mampowia tou ee najadi rongkani peliu nu kadaa nu inggu-na lako si komi, pade masipato mesua ri naraka.
16 Mawesomo komi topangkeni-topangkeni naburo, apaa ikomi nepatuduki ewa ei: Ande tou mosumpa ante mangkasangai Sou nu Allatala, tou ee tado nakondi nu sumpa-na ee. Agiana ande tou ee mosumpa ante mangkasangai bulawa ri rara Sou nu Allatala, ia nakondi nu sumpa-na ee. 17 Nadoyo mpuu komi. Ikomi ewa tou naburo! Umba to neliu kabetena, bulawa-da ba Sou nu Allatala to nampakagasa bulawa ee-da? 18 Ikomi nopatudukika ei mbii: Ande tou mosumpa ante mangkasangai meja penombaa ri Sou nu Allatala, tou ee tado nakondi nu sumpa-na. Agiana ande tou ee mosumpa ante mangkasangai penomba to nipopenomba-na ri wongko meja penombaa ee, ia nakondi nu sumpa-na ee. 19 Naburo mpuu-da komi. Umbapa nabete, penomba-da ba meja penombaa to nampakagasa penomba ee-da? 20 Ee-mo sabana, ande sadua tou mosumpa ante mangkasangai meja penombaa, batuana ia nosumpa ante nangkasangai meja penombaa bo sumawee nuanu to nipopenomba ri wongkona. 21 Pade ande sadua tou mosumpa ante mangkasangai Sou nu Allatala, ee batuana ia nosumpa ante nangkasangai Sou nu Allatala ante Allatala to neari isee. 22 Pade sadua tou mosumpa ante mangkasangai suruga, batuana ia nosumpa ante nangkasangai poncundaa nu Allatala bo Allatala to noncunda ri poncundaa ee.
23 Mawesomo komi topande-topande ri Buku Taurat bo tou-tou to Farisi! Ikomi tou-tou to nabelo wongko. Ikomi natundu mpuu nantutu parenta nambei sampulu bagia lako ri sumawee uli nu tana-mi ri Allatala, tudu ri rampa-rampa niwei mbii-mi sampulu bagia ri Allatala. Agiana parenta bete, ewa moinggu manoa, towe rara pade mampeponui potipa tado nipowia-mi. Kakono-konona parenta bete ee-da to mpuu-mpuu mi-powia, pade nemo mangkalingani parenta-parenta ntanina mbii. 24 Ikomi topangkeni-topangkeni nasimbei ewa to naburo. Lale ri rara nu inua-mi nilali-mi, agiana unta-da to niome-mi.
25 Mawesomo komi topande-topande ri Buku Taurat bo ikomi tou-tou to Farisi. Ikomi to nabelo wongko. Poutaa -poutaa bo loya-loya-mi nielasi-mi duuna narawa-rawa sawalikuna, bo ee rara-na narumu mpuu ante ngila-ngaya nuanu to nirata-mi ante inggu-mi to nadaa. 26 Hee to Farisi to nasimbei ewa to buro! Elasi ncala ulu rara nu poutaa-poutaa bo loya-loya-mi pakarawa-rawa, bona sawalikuna mbii majadi marawa.
27 Mawesomo komi topande-topande ri Buku Taurat bo ikomi tou-tou to Farisi! Ikomi to nabelo wongko. Ikomi ewa dayo-dayo to nirandu nabula, ri sawalikuna nikalio nabelo, agiana ri rarana naponu ante dongke pade ngila ngaya nuanu narumu bo nawou. 28 Iwee mbii ante ikomi. Lako ri sawalikuna kalioaana nabelo ri tou, agiana ri rarana, ikomi naponu ante inggu to nadaa pade nabelo wongko.
29 Mawesomo komi topande-topande ri Buku Taurat bo ikomi tou-tou to Farisi. Ikomi to nabelo wongko, apaa ikomi nopatinda sou dayo-dayo nu nabi-nabi nipakabelo-belo-mi, pade nopataka randu-randu nagaya ri dayo nu tou-tou to natundu ri Allatala. 30 Pade ikomi nanguli: Ande rapana ikami natuwu ri tempo katuwua nu totua-ka ngkoulu, tado madota-ka mantutu tou mopatesi nabi-nabi. 31 Jadi, ante lolita-mi ee, nipangaku dodo-mimo bakote ikomi muli nu tou-tou to nopatesi nabi-nabi. 32 Jadi, papolamo oa mampowia jeko-jeko to nasimbei ante jeko to nipowia nu totua-mi ngkoulu ee! 33 Ikomi tou nadaa pade muli nu tou nadaa. Beiwamo kamala-mi mampakasalama koro-mi lako ri suku nu naraka? 34 Rongemo pakabelo-belo: Yaku kana mantudu nabi-nabi, tou-tou to nabija, pade topepatuduki-topepatuduki malou si komi. Saganta-ra kana mipatesi, pade saganta kana misalibkan. Maria to kana mi-duasi ri rara nu sou-sou penombaa, pade samata mi-dapa-dapa lako ri saongu ngata malou ri ngata ntanina. 35 Ee-mo sabana, ikomi kana rasuku sabana pepatesi to nipowia ri sumawee tou to tado nasala, nopamula lako ri popatesi i Habel to tado nasala, duuna popatesi i Zakharia ana ni Berekhya, to nipatesi-mi riolo Sou nu Allatala ante meja penombaa. 36 Ku'ulikaka komi: Sumawee-na ee kana nakolo nu tou-tou to natuwu ngkapuri ei!”
Nampokasuruka Yerusalem
23:37-39
37 “Yerusalem, Yerusalem, nabi-nabi nipatesi-mu. Suro-suro nu Allatala niwunu-mu nu watu duu-na namate. Basangkia ngkani-Ku madota mokalipui sumawee tou nampearii-ko ewa tina nu manu nantalendusi ana-ana-na ri unde nu kapi-na, agiana tado nadota komi! 38 Ee-mo sabana Sou nu Allatala kana Na-paleisi pade tadomo oa Na-poroasi-ko. 39 Bona mi-ncani: Mopamula lako eo ei tadomo mu-kalio-Ku duu-na marata tempona iko manguli:
Nitiroi-Yamo to narata ri rara sanga ni Pue.”