Jeko pade kapepaa
13:1-5
13
1 Tempo ee naratamo basangkia dua tou nopatuntu si Yesus nancambelai tou-tou to Galilea to nipatesi ni Pilatus, ranca-ra nambei penomba-ra ri Allatala. 2 Namparonge lolita ee, nanguli-mo i Yesus si sira: “Nipekiri-mi bakote tou-tou to Galilea nipatesi ewa ee, ee-mo mopadupa bakote nadea-pa jeko-ra lako ri to Galilea ntani-na? 3 Tado! Agiana toramo: Ande ikomi tado mancoro lako ri jeko-jeko-mi, ikomi sumawee mbii kana maropu, ewa isira. 4 Beiwa ante tou sampulu uwalu to namate ri Siloam, niparuncu nu menara ee? Nipekiri-mi nuanu ee nopanotosi bakote isira ee neliu jeko-ra lako ri tou-tou ntanina to neari ri Yerusalem? 5 Tado! Sangkanipa Ku'ulikaka komi: Ande ikomi tado mancoro lako ri jeko-jeko-mi, ikomi pura mbii kana maropu ewa isira.”Porapaika kou ara to tado nowua
13:6-9
6 Naopu ee nipololita mbii-mo ni Yesus porapaika ei: “Naria sadua tou notuda kou ara ri bonde anggur-na. Sauatu eo nalou-yamo nangonco wua nu kou ee, agiana tado-namo saonguaa wuana nirata-na. 7 Pade nanguli-yamo ri topobago bonde-na ee, Kalio, rarana tolu mpae-kumo namei nangonco wua nu kou ara ei, agiana tado namo saongua nirata-ku. Agilouna towomo kou etu! Apaa kou etu kawule nampakaopu rudu ntana ei. 8 Agiana nesono topobago bonde ee: Palambaka-yamo ulu matuwu kambana sampae ei-pa, maradika. Ku-subi-damo tana ri sosona pade ku-bolika pupuk. 9 Mbelakana ba mowua-yamo ri pae marata ngoni. Agiana ande tado oa mowua-ya, mamalamo-ko maradika metudu motowo-ya.’ ”
Nampakabelo tou nadua ri Eo Peuntua to Yahudi
13:10-17
10 Sauatu ri Eo Peuntua nto Yahudi, nepatuduki-mo i Yesus ri saongu sou penombaa nto Yahudi. 11 Isee naria bangkele to sampulu walu mpae-yamo nadua, apaa nipesua nu wao tuwu ri koro-na. Bangkele ee nabungku, pade tado-mo namala-ya nokongkore nanoro.
12 Pangkalio-ya ni Yesus, nipokio-yamo ni Yesus, pade nanguli: “Tina, nabelomo dua-mu!” 13 Pade niuntu-mo ni Yesus pale-Na ri bangkele ee, pade bula wee ee mbii nanoro-mo pokongkore nu bangkele ee, pade nangune Allatala.
14 Agiana woo nu sou penombaa to Yahudi ee nasodo apaa i Yesus nampakabelo tou ri Eo Peuntua nto Yahudi, ee-mo sabana pade nanguli-yamo ri tou dea: “Naria aonoyo eo pobagoa, kamei-mo ri eo-eo ee bona rapakabelo, nemo ri Eo Peuntua.”
15 Nesono i Yesus: “He, to nabelo wongko! Ri Eo Peuntua sumawee tou nopaloso japi ba keledai-na lako ri gimpu pade nangkeni-ra nesuwu bona rapanginui-ra. 16 Jadi, isei naria sadua bangkele muli ni Abraham, rara-na sampulu uwalu mpae-yamo nisilu nu Mbagou Seta. Tado mamala-ya rapakabebasi lako ri posilu-ya ee ri Eo Peuntua?”
17 Sono ni Yesus ee nowia bali-bali-Na naeya mpuu, agiana sumawee tou-tou ntanina nadonu nangkalio sumawee kadupaa to nipowia ni Yesus.
Porapaika nancambelai besa nu sesawi pade ragi
13:18-21
18 Nepekutana-mo i Yesus: “Ante nuapamo Ku-popasimbeika ande maratapa tempona Allatala moparenta? 19 Tarina ewa porapaika ei: Saongu besa nu sesawia niala nu tou pade nituda-na ri bonde-na. Besa nu sesawi ee natuwu pade najadi kou, pade tonci-tonci nowia podumua-ra ri panga-pangana.”
20 Pade nanguli mbii-mo i Yesus: “Ante nuapamo Ku-popasimbeika ande maratapa tempona Allatala moparenta? 21 Tarina ewa ragi to niala nu sadua bangkele pade nigonta-na ante sangkusou topung, duu-na nempene pura.”
Yema to rapakasalama
13:22-30
22 Ri polumakoa malou ri Yerusalem, i Yesus noliu ri ngata-ngata pade ri ngata-ngata kodi nepatuduki lako. 23 Naria-mo tou nampekutana-Ya: “Pue, saodi ngkola-da tou to kana rapakasalama?”
24 Nesono i Yesus: “Pesimbukui-mo mesua ri wombo napii. Apaa Ku'ulikaka komi: Nadea tou kana mampesimbukui bona mesua, agiana tado namala-ra mesua. 25 Ande mokongkore-mo tumpu sou pade nawuntamo wombo-na, ikomi mokongkore ri sawalikuna pade mokado-kado wombo manguli lako: Maradika, ungkeka-ka wombo! Pade mesono-yamo: Tado nincani-ku lako riumba komi! 26 Agiana mesono komi: Ikami ei nangkondi pade nanginuka-mo ante Iko, pade Iko mbii nepatuduki ri dala-dala nu ngata-ka! 27 Agiana nanguli mbii-mo tumpu sou ee si komi: Tado nincani-ku komi lako riumba komi narata. Pangani komi lako isei, ikomi to nowia nuanu nadaa!
28 Tempo-mi nangkalio i Abraham, i Ishak pade i Yakub ante sumawee nabi nadonu ri rara Poparentaa nu Allatala, ikomi kana mokeo pade mapepa apaa ikomi niwura nesuwu! 29 Pade nadea mbii tou-tou to tado to Yahudi kana marata lako ri Mataeyo pade lako ri Kasoloa, pade tou lako ri Utara bo lako ri Selatan, isira kana moncunda mangkondi sangkani-ngkani ri rara Poparentaa nu Allatala. 30 Kakono-konona, maria tou to matepopuri majadi matepokoulu, pade maria tou to matepokoulu kana majadi matepopuri.”
I Yesus kana mamate ri ngata Yerusalem
Nampokasuruka Yerusalem
13:31-35
31 Tempo ee mbii, naria basangkia dua to Farisi namei si Yesus pade nanguli, “Koumo-Ko, paleisi-mo pearia ei, apaa i Herodes madota mopatesi-Ko.”
32 Nesono i Yesus: “Koumo komi mangulikaka i Herodes to nadea akala-na etu: Eo ei pade neile Yaku nowura wao tuwu pade nampakabelo to nadua, agiana ri eo katolu eona Yaku kana mampakaopu bago-Ku.’ 33 Noudamo iwee Yaku kana mopapola mbii polumakoa-Ku eo ei, neile pade neipua, sabana tado mamala sadua nabi rapatesi ri sawaliku nu ngata Yerusalem.
34 Yerusalem, Yerusalem! Nabi-nabi nipatesi-mi! Suro-suro nu Allatala niwunu-mi nu watu duu-na namate! Basangkia ngkani-Kumo madota mokalipui komi, ewa tina nu manu to notalendusi ana-ana-na ri unde nu kapina, agiana tado nadota komi! 35 Kakono-konona Allatala kana mampaleisi komi. Bona mi-ncani, mopamula lako eo ei tado-mo mikalio-Ku oa, duu-na miuli:
Nitiroi-Yamo to narata, to nitudu nu Allatala!”