Porapaika nancambelai sadua toposawu
13:1-23
13
1 Ri eo ee nesuwumo i Yesus lako ri sou ee pade nalou noncunda ri soso nu rano. 2 Nadea mpuu tou notobu nantikusi-Ya, ee-mo sabana pade nalou-Yamo noncunda ri rara nu duanga, pade tou dea ee nokongkore ri sowea. 3 Naopu ee nipatuduki-ramo ni Yesus ngila ngayana ante porapaika. Nanguli-Ya: “Naria sadua topobonde nalou nosawu. 4 Ranca-na nosawu, naria sawua-na to nanawu ri tana to nipodala. Pade naratamo tonci nantilo pura sawua ee duuna naopu. 5 Naria mbii sawua-na to nanawu ri tana nawatua. Sawua-sawua ee nagasi nencube apaa tana-na nanipi. 6 Agiana napane-pa eo, lolo nu sawua ee nopamulamo nalele, naopu ee nabangi pade namate apaa tado nandala lari-na. 7 Naria mbii sawua-na to nanawu ri rara nu kawoko mporui. Kawoko mporui ee natuwu pade noparumpisi lolona duuna namate. 8 Naria mbii sawua-na to nanawu ri tana narudu, naopu ee nowua. Naria saatu ngkani kadeana, naria aono mpulu ngkani, pade naria mbii tolu mpulu ngkani kadeana” 9 Naopu-Yapa nampololita porapaika ee, nanguli-Yamo: “Yema notalinga, kana meronge!”10 Naopu ee naratamo ana-ana guru-Na pade nampekutana-Ya: “Nuapa pade nampake porapaikamo-Ko nampololitaka tou dea edou?” 11 Nesono i Yesus: “Ikomi niweikakamo komi rasi bona manguncani ntoliro beiwa Poparentaa nu Allatala, agiana isira tado niweikaka. 12 Tou to nantarima lolita nu Allatala, kana ratambeika-ya bona kadea-deaa lolita nu Allatala to nancani. Agiana tou to tado nadota nantarima lolita nu Allatala, nou kambana saodi nincani-na, kana ra'ala pura lako si-ya. 13 Ee-mo sabana Yaku nampake porapaika ande mololita ante tou dea, apaa noudamo nekalio-ra, agiana ewa to tado nekalio. Noudamo neronge-ra, agiana ewa to tado neronge pade tado nincani-ra nuapa to nironge-ra. 14 Ante ee, madupamo lolita nu Allatala to nipoawili ni nabi Yesaya:
Isira kana meronge oa, agiana tado manguncani;
Isira kana mekalio oa, agiana tado nincani-ra nuapa to majadi.
15 Sabana pekiri nu tou-tou ei najadi napombomo,
talinga-ra najadi nawongo
pade mata-ra napiri-mo.
Ei nadupa bona mata-ra nemo mekalio,
talinga-ra nemo meronge,
pekiri-ra nemo manoto
pade nemo manculi si Yaku, pade Ku-pakabelo-rada.”
16 Nanguli mbii i Yesus ri ana-ana guru-Na: “Norasi mpuu komi, apaa ikomi mpuu-mpuu nangkalio pade namparonge-mo pepatuduki-Ku. 17 Ku'ulikaka komi, nadea nabi bo tou to natundu ri Allatala impia madota mangkalio nuanu to nikalio-mi ei, agiana tado namala nikalio-ra. Madota mpuu-ra mamparonge nuanu nironge-mi ei, agiana tado namala nironge-ra.
18 Jadi rongemo nuapa batua nu porapaika to posawu ee. 19 Sawua to nanawu ri tana to nipodala ewa tou-tou to namparonge kareba nancambelai beiwa Allatala moparenta, agiana tado nincani-ra. Naratamo Mbagou nu Seta nangago lolita ee lako ri rara-ra. 20 Sawua to nanawu ri tana nawatua, ewa tou-tou to namparonge kareba ee, pade nantarima ante donu rara. 21 Agiana tado nolari nandala, nangkajadika kareba ee tado natida ri rara-ra. Narata-pa kapepaa ba peduasi sabana namparisaya kareba ee, nangkosu-ramo. 22 Sawua to nanawu ri kawoko mporui ewa tou-tou to namparonge kareba ee, agiana nokantabu rara nancambelai katuwu-ra pade madota matuwu masugi. Sumaweena ee noparumpisi kareba lako ri Allatala ee ri rara-ra, nangkajadika tado nowua. 23 Pade sawua to nanawu ri tana narudu ewa tou-tou to namparonge kareba ee pade nipeirara mpuu-ra. Isira ee-mo to nowua nadea, naria saatu ngkani kadeana, naria aono mpulu ngkani, pade naria tolu mpulu ngkani kadeana.”
Porapaika nancambelai dono to natuwu riolo nu gando
24 Nilolita mbiimo ni Yesus sangaya porapaika ri tou dea ee, nanguli-Ya: “Poparentaa nu Allatala mamala rapasimbei ante sadua toposawu sawua to nabelo ri bonde-na. 25 Naria sambengi, ranca nu sumawee tou nalurumo naleta, naratamo bali-na nosawu wua nu dono riolo nu gando ee pade nangani-yamo lako isee. 26 Natuwu-pa tinuda-na ee pade moliwo mesuwumo bulina, nikalio mbii-mo dono ee natuwu riolo nu gando. 27 Jadi naloumo to nipagaji nobago ri bonde ee nampekutana tumpu bonde: Apa tado sawua nabelo to nisawu-mu ri bonde ee-ria maradika. Lako riumba da wea peumbaa nu dono ee-ria? 28 Nesono tumpu bonde ee: Etu bago nu bali-ku. Pade nanguli mbiimo to nipagaji-na ee: Ande madota-ko maradika, malou ka-mowuka dono-dono ee-ria. 29 Nesono tumpu bonde ee: Nemo. Apaa ande rawuka dono-dono ee, matewuka ante gando mbiimo ngoni. 30 Palambakamo dono-dono etu matuwu moroa ante gando duuna marata tempona rapepae. Ku'ulikaka-damo ngoni to mampepae. Pasintobu ncala ulu dono-dono etu, ondo, pade suwe ri apu. Maopu ee-da pade pasintobu mbii gando, pade boli ri rara liko.”
Porapaika nancambelai besa nu sesawi pade ragi
13:31-35
31 Nilolita mbiimo ni Yesus sangaya porapaika ri tou dea, nanguli-Ya: “Poparentaa nu Allatala tarina ewa porapaika ei: Saongu besa nu sesawi niala nu sadua tou, pade nituda-na ri bonde-na. 32 Besa nu sesawi nakodi mpuu. Agiana ande matuwu-yadamo, ia-mo to nabete mpuu riolo nu tinuda-tinuda ntanina. Ia najadi sampuu kou bete, nangkajadika tonci-tonci namei nowia pourua-ra ri raa-raa-na.”
33 Naria mbii sangaya porapaika ntanina niuli ni Yesus ri tou dea: “Poparentaa nu Allatala tarina ewa ragi niala nu sadua bangkele, pade nigonta ante aopo mpulu lite topuu duuna nempene pura sumaweena!”
34 Sumawee pepatuduki ee see niuli ni Yesus ri tou dea ante porapaika. Tado naria-Ya nepatuduki tado ante porapaika, 35 bona madupamo lolita to niuli nu nabi:
“Yaku nampake porapaika ande mololita ante isira.
Yaku kana manguli nuanu to niwunika lako ri paramula nu dunia ei nipajadi.”
Popanotosi porapaika nancambelai dono riolo nu gando
13:36-43
36 Naopu ee, nipawiamo ni Yesus tou dea ee, pade nesua ri sou. Naratamo ana-ana guru-Na pade nanguli: “Panotosimo si kami batua nu porapaika nancambelai dono riolo nu gando ee” 37 Nesono i Yesus: “ Ana nu Manusia, nirapaika toposawu sawua to nabelo. 38 Dunia ei nirapaika bonde ee. Tou-tou to najadi todea nu Allatala nirapaika sawua to nabelo. Topantutu Mbagou Seta nirapaika dono. 39 Mbagou nu Seta nirapaika bali to nosawu wua nu dono ri bonde ee pade malaeka-malaeka nu Allatala nirapaika topepae. 40 Ewa dono nitobu pade nisuwe ri rara nu apu, iwee mbiimo nuanu to kana majadi ri Eo Kaopua nu dunia ngoni. 41 Ana nu Manusia kana mantudu malaeka-malaeka-Na mopasintobu lako riolo nu todea-Na sumawee tou to nampakanawu tou-tou ri rara nu jeko pade sumawee tou ntanina to nowia nuanu nadaa. 42 Isira sumawee kana ratadiaka ri rara nu apu to nengkalala. Isee-ramo kana mokeo bo mantodosaka kapepaa. 43 Pade tou-tou to nowia dota nu Allatala kana mewanta ewa eo ri rara Poparentaa nu Allatala Tuama-ra. Jadi, yema notalinga, ia kana meronge!”
Porapaika nancambelai gagu nitalou pade mutiara to nasuli olina
44 “Poparentaa nu Allatala nirapaika gagu to nitalou ri bonde, to nirata nu tou ntani, pade nitaluo nculi mbii nu tou to namparata ee. Apaa nikeni nu donu rara-na, nalou-yamo ri sou-na pade nobalu sumawee isi nu sou-na, naopu ee nanculiki-yamo nangoli bonde potalouaa gagu ee.”
45 “Iwee mbii Poparentaa nu Allatala tarina ewa porapaika ei: Naria sadua topopagoli nangonco mutiara-mutiara to nasuli olina 46 Nirata-napa saongu mutiara to nasuli mpuu olina, nalou-yamo nobalu sumawee gagu-na nipopangoli-na mutiara ee.”
Porapaika nancambelai landa
47 “Poparentaa nu Allatala tarina nirapaika ewa landa to nitaa ri rano, to nosoko ngila ngaya nu bou. 48 Nadea-pa bela nu landa ee, nisoremo nu topolanda-topolanda ri lorena. Naopu ee noncunda-ramo pade nopatani bou-bou ee. Bou to nabelo niboli ri rara nu batili, pade bou to tado nabelo nitadiaka. 49 Iwee mbiimo nuanu to kana majadi ri Eo Kaopu nu Dunia. Malaeka-malaeka nu Allatala kana malou mopatani tou-tou nadaa lako ri tou-tou to nowia dota nu Allatala. 50 Naopu ee tou-tou to nadaa ee nitadiaka ri rara nu apu to nengkalaa. Isee-ramo kana mokeo pade mantodosaka kapepaa.”
51 Naopu ee, nipekutanamo ni Yesus ana-ana guru-Na: “Nincani-mida batua nu porapaika-porapaika ee see?” Nesono-ra: “Io, nincani-kada.” 52 Jadi, nangulimo i Yesus si sira: “Butu dua topande ri buku Taurat to najadi todea nu Allatala-mo, ia nasimbei ewa tumpu sou to nosuwuraka gagu nabou bo gagu nasae lako ri pambolia gagu-na.”
I Yesus niporou ri Nazaret
13:53-58
53 Naopu-pa i Yesus nanguli porapaika-porapaika ee, nipaleisi-Namo pearia ee, 54 nanculi ri ngata pangotea-Ya. Isee-Ya nalou nepatuduki ri sou penombaa to Yahudi, pade tou-tou to namparonge-Ya isee, namoleara mpuu. Nanguli-ra: “Lako riumba-da tou ei namparata kapandea ewa edou? Pade lako riumba-Ya namparata kuasa bona mowia kadupaa? 55 Apa tado ana nu basi-Ya edou? Tado i Maria ee Tina-Na, pade sarara-sarara-Na i Yakobus, i Yusuf, i Simon, bo i Yudas? 56 Apa tado neari isei mbii sarara-sarara-Na bangkele? Lako riumba-Ya namparata sumaweena edou?” 57 Nasuemo rara-ra, pade niporou-ramo i Yesus. Pade nangulimo i Yesus si sira: “Sadua nabi nibila riumba-riumba, agiana ri ngata pangotea-Ya pade ri sou dodo-Na, tado nibila-Ya” 58 Ee-mo sabana pade tado nadea kadupaa to nipowia ni Yesus isee, apaa tado niparisaya-ra.