I Yesus nipoara ri Nasaret
6:1-6a
6
1 Naopu ee nanculimo i Yesus ante ana-ana guru-Na nalou ri ngata-Na,
ri Nazaret.
2 Ri Eo Peuntua to Yahudi,
nopamula-Yamo nepatuduki ri sou penombaa to Yahudi.
Nadea mpuu tou isee.
Pamparonge nu tou-tou ee pepatuduki ni Yesus,
namoleara-ramo.
Nanguli-ra:
“Nincani-Na lako riumba pura nuanu niuli-Na edou?
Pande beiwa gagamia nianuka-Ya?
Nuapa pade nadupa pura nuanu nipowia-Na?
3 Ande panguncani-ka,
basi-Yada ngoni edou,
ana ni Maria,
sarara ni Yakobus,
i Yoses,
i Yudas pade i Simon!
Sarara-Na bangkele mbii neari iseida.”
Ee-mo sabana nasuemo rara-ra,
pade nipoara-ramo i Yesus.
4 Pade nangulimo i Yesus si sira:
“Sadua nabi ra-bila riumba-umba,
agiana ri ngata dodo-na,
ri olo nu sarara-na bokoyo puse-na tado rabila-ya.”
5 Ri ngata dodo-Na,
i Yesus tado namala nowia nuanu nadupa.
Agiana wule nampakaori basangkia dua tou nadua ante nountu pale-Na ri koro-ra.
6a Namoleara-Ya,
apaa tado-mo neparisaya-ra.
I Yesus nantudu sampulu rodua suro
6:6b-13
6b Naopu ee,
naloumo i Yesus ri ngata-ngata kodi riolona isee,
pade nepatuduki.
7 Nipokio-Namo sampulu rodua suro,
pade nitudu-Na rodua-rodua,
bo nambeika-ra kuasa bona mamala mowura wao tuwu.
8 Ia mbii nantetesi-ra:
“Nemo mangkeni nuapa-nuapa ri polumakoa-mi,
wule kenimo tioko kou.
Nemo mangkeni kondia,
batutu,
ba doi mpuumo.
9 Pakemo sandala,
agiana nemo mangkeni rontonga powaru.”
10 Pade niuli mbiiNa:
“Ande mesua komi ri saongu sou,
pearimo komi ri sou ee,
duu-na mipaleisi ngata ee.
11 Agiana ande marata komi ri saongu ngata,
pade tou-tou isee tado madota mantarima bo mamparonge komi,
paleisimo ngata ee.
Pade tampeasi-mo rambu ntana lako ri paa-mi bona majadi pepopatora si sira.”
12 Pade neongko-mo sampulu rodua suro-Na ee.
Nalou-ramo nampopowole kareba bakote manusia kana mancoro lako ri jeko-jeko-ra.
13 Nadea wao tuwu niwura nu suro-suro-Na,
noela to nadua ante lana zaitun pade nipakaori-ra.
I Yohanes Topebaptis nipatesi
6:14-29
14 Sumawee kareba nancambelai kajadia ee nironge mbii ni Mbagou Herodes,
apaa natolelemo sanga ni Yesus riumba-umba.
Naria tou nanguli:
“I Yohanes Topebaptis natuwu mpanculi-mo.
Ee-mo sabana Ia nakuasa nampowia nuanu nadupa.”
15 Naria mbii tou nanguli:
“Ia ee i Elia.”
Naria mbii to nanguli:
“Ia ee nabi,
nasimbei ewa nabi-nabi ngkoulu.”
16 Nirongepa ni Herodes kareba ee,
nanguli-yamo:
“Ia ei-mo mpia i Yohanes Topebaptis to nitudukaku tou notompo woo-na.
Natuwu nculi mbii-yamo.”
17 Apaa nitudumo ni Herodes tou mosoko i Yohanes pade mopasua-ya ri rara ntarungku.
I Herodes nowia ewa ee sabana i Herodias,
bangkele ni Filipus sarara dodo-na,
to nipobangkelemo ni Herodes.
18 Nancambelai nuanu ee,
nadea ngkanimo i Yohanes nangontika i Herodes,
ewa ei:
“Tado mamala-ko moncamboko ante bangkele nu sarara dodo-mu etu.”
19 Ee-mo sabana i Herodias namboli daa rara-na si Yohanes,
pade madota mopatesi i Yohanes,
agiana tado namala nipowia-na,
apaa nitolawani oa ni Herodes.
20 Apaa nitudumo ni Herodes tou mojagai belo-belo kasalamaa ni Yohanes ri rara ntarungku,
apaa naeka mbii-yada si Yohanes.
Nincani-na i Yohanes ei tou nanoa to nitudu nu Allatala.
Pade ande mololita i Yohanes nipobelo mbii-da ni Herodes,
noudamo nosesaa rara-na namparonge.
21 Kaopuana nirata mbii-da ni Herodias loga-na,
ri eo pangotea i Herodes.
Tempo ee i Herodes nowia susa ri sumawee pangkabete,
tadulako-tadulako,
bo panakoulu nu todea ri Galilea.
22 Tempo ee ana torandaa ni Herodias nogale-gale,
nampakasana rara ni Herodes bo torata-torata-na.
Pade nangulimo i Herodes ri ana torandaa ee:
“Nuapa nipobelo-mu,
perapimo.
Kana kuweikaka-ko!”
23 Pade notipamo i Herodes ri ana torandaa ee ante sumpa.
Nanguli-ya:
“Nuapa-nuapa to mu-perapi kana ku-weikaka-ko,
noupa santongo lako ri kambagoua-ku ei kuweikaka-ko.”
24 Pade nesuwumo ana ee nalou nampekutana tina-na:
“Nina,
nuapa to nabelo ku-perapi?”
Nesono tina-na:
“Perapimo woo ni Yohanes Topebaptis.”
25 Nagasi-gasimo ana torandaa ee nanculiki si Herodes pade nanguli:
“Yaku mamperapi woo ni Yohanes Topebaptis,
bulawee ee rakenika-ku raboli ri baki.”
26 Namparonge perapia ee,
nentuumo rara ni Herodes.
Agiana tado mamala natance perapia ee,
apaa natalaulu-yamo notipa ri ngayo nu torata-torata-na.
27 Pade nitudu-namo sadua surodado malou mangala woo ni Yohanes Topebaptis.
Naloumo surudado ee ri rara ntarungku,
pade notompo woo ni Yohanes Topebaptis.
28 Naopu ee nikeni-namo woo ee ri baki pade niweikaka-na ana torandaa ee.
Pade ana torandaa ee nambeikaka tina-na.
29 Pamparonge nu ana guru ni Yohanes kajadia ee,
nalou-ramo nangala bata ni Yohanes pade nitana-ra.
I Yesus nopakondi tou alima njobu
6:30-44
30 Sampulu rodua suro to nitudu ni Yesus ee nanculimo,
pade notobu-ramo ante i Yesus.
Nipasibali-ramo si Yesus sumawee nuanu nipowia-ra pade nuanu nipatudukika-ra tou.
31 Nadea mpuu tou welou bo tumei,
nangkajadika tadomo namala kawa ni Yesus bo suro-suro-Na nangkondi.
Ee-mo sabana pade niulimo ni Yesus ri suro-suro-Na:
“Outamo ri kalinoaana,
bona mamala-ta mopatani,
bo meuntu singoni.”
32 Jadi noduanga-ramo nalou ri kalinoana.
33 Agiana nadea tou nangkalio-ra nangkosu lako isee,
pade nanguncani kalouaa-ra.
Nangkajadika tou-tou lako ri sumawee ngata ri ngamba ee,
noku-kumbeno nodala ntana nampokoului i Yesus bo suro-suro-Na.
34 Pencowe ni Yesus bo suro-suro-Na,
nikalio-Na tou dea.
Natowemo rara-Na si sira,
apaa tou dea ee ewa bimba to tado naria topoewu.
Pade nopamula-Yamo nopatuduki ngila ngayana si sira.
35 Nakinowiapa,
nangulimo suro-suro-Na:
“Madedimo ei,
pade pearia ei nakalinoaa.
36 Agina Mu-tudumo tou-tou ei manculi,
bona mamala-ra mangoli kondia-ra ri ngata-ngata riolona ei.”
37 Nesono i Yesus:
“Ikomi-mo mopakondi-ra.”
Nesono suro-suro-Na:
“Haa,
i kami kana malou mangoli roti nuanu olina roatu dinara nakondi nu sumawee tou ei?”
38 Pade nipekutana-ramo ni Yesus:
“Sangkiaongu roti to naria si komi?
Ande pekalio!”
Naopu-ra nangkalio,
nanguli-ra:
“Alimaongu roti pade rombaa bou.”
39 Pade nitudumo ni Yesus sumawee tou ee see,
moncunda santaguna-santaguna ri tongo mpada.
40 Pade noncunda belo-ramo,
naria saatu santaguna,
pade naria lima mpulu santaguna.
41 Pade nialamo ni Yesus alima ongu roti pade rombaa bou ee,
pade nitingara-Namo langi,
pade nosukuru ri Allatala.
Naopu ee,
nitibe-tibe-Namo roti ee ante pale-Na pade niweikaka-Na suro-suro-Na,
bona rabagi-bagika-ra tou dea ee.
Iwee mbii bou rombaa ee,
nibagi-bagika mbii tou dea.
42 Nangkondi-ramo duuna nabosu.
43 Naopu-ra nangkondi nitobumo nu suro-suro-Na labina,
sumaweena naponu sampulu rombakatepa.
44 Naria alima njobu kadea nu baleilo to nangkondi ee.
I Yesus nolumako ri wongko nu ue
6:45-52
45 Naopupa ee nagasi-gasimo i Yesus nantudu ana-ana guru-Na mencawi duanga mampokouluka-Ya malou ri Betsaida ri sambote nu rano,
ranca-Na nantudu lako tou dea ee manculi.
46 Nanculi purapa tou dea ee,
nalou-Yamo nosambaya ri bulu.
47 Naratapa dedina,
duanga nu ana-ana guru ni Yesus ri pentongoanamo,
agiana i Yesus naboli ri lorenadapa.
48 Nikalio-Na ana-ana guru-Na santongo mate nobose duanga-ra apaa nitampe nu ngolu mataeyo.
Parabaa ee rapa-rapana ri olo nu tinti tolu ante tinti aono,
naratamo i Yesus si sira nolumako ri wongko nu ue,
kemampalelumi-ra.
49 Pangkalio-ra i Yesus nolumako ri wongko nu ue,
niuli-ra seta-Yada.
Pade nokalara-ramo naeka,
50 apaa sumawee-ra nangkalio-Ya nolumako ri wongko nu ue,
ee-mo pade nabatoro-ra.
Agiana nanguli i Yesus si sira:
“Karoo komi!
Nemo maeka komi.
Yaku-da ei.”
51 Naopu ee nencawi-Yamo ri duanga-ra,
pade neuntumo ngolu ee.
Nakioma mpuu ana-ana guru-Na.
52 Kadupaa to najadi ri alima ongu roti ee tado oapa nincani-ra.
Tado mpuu-pa nanoto rara-ra.
I Yesus nampakaori tou-tou nadua ri Genesaret
6:53-56
53 Narata-rapa ri sambote nu rano,
nencowe-ramo ri sowea Genesaret.
54 Pesompo-ra lako ri duanga,
kalou-lou nincanimo nu tou-tou bakote to narata ee i Yesus.
55 Pade noku-kumbeno-ramo nalou ri sumawee ngamba ee,
pade nopamula-ramo nangkeni tou-tou nadua nikowa-ra ante ali paletaa-na si Yesus.
Ande raronge-ra i Yesus naria ri saongu ngata,
rakeni mbii-ra to dua isee.
56 Riumba-umba i Yesus marata,
ri ngata kodi,
ri ngata bete,
ba ri soki-soki nu ngata,
isee mbii tou mangkeni pade mountu to dua ri potomu,
pade nerapi si Yesus,
bona Na-paliu-ra kambana motui doe nu powaru ndoe-Na.
Pade sumawee tou to nangkakamu-Ya,
naori pura.